وزیرِ اعظم نریندر مودی نے جمعہ کی صبح گجرات کے ایکتا نگر میں نرمدا ندی کے کنارے واقع ’’اسٹیچو آف یونٹی‘‘ پر راشٹریہ ایکتا دیوس کے موقع پر بھارت کے پہلے وزیرِ داخلہ سردار ولبھ بھائی پٹیل کو عقیدت کے پھول نذر کیے۔ اس موقع پر انہوں نے ملک کی یکجہتی، سالمیت اور امن کے تحفظ کا حلف لیتے ہوئے کہا کہ ’’میں اپنے وطن کی یکجہتی اور سالمیت کے تحفظ کے لیے خود کو وقف کرتا ہوں‘‘۔ یہ دن ہر سال 31 اکتوبر کو سر دار پٹیل کی خدمات کے اعتراف میں منایا جاتا ہے۔ وزیرِ اعظم مودی کی حکومت نے 2014 میں ان کی یاد میں ’’راشٹریہ ایکتا دیوس‘‘ منانے کی روایت شروع کی تھی تاکہ ملک میں یکجہتی، ہم آہنگی اور حب الوطنی کے جذبے کو فروغ دیا جا سکے۔
راشٹریہ ایکتا دیوس کے موقع پر ایکتا نگر میں شاندار پریڈ اور ثقافتی تقاریب کا انعقاد کیا گیا جن میں بھارت کی ثقافتی اور جغرافیائی تنوع میں اتحاد کے جذبے کو نمایاں کیا گیا۔ بی ایس ایف، سی آر پی ایف اور مختلف ریاستوں کی پولیس کے دستوں نے پریڈ میں اپنے جوش و جذبے کا مظاہرہ کیا۔ وزیرِ اعظم مودی صبح آٹھ بجے کے قریب اسٹیچو آف یونٹی پہنچے، جہاں انہوں نے سر دار پٹیل کے مجسمے پر پھول چڑھائے اور خاموشی کے ساتھ انہیں یاد کیا۔ بعد ازاں وہ پریڈ گرانڈ میں پہنچے اور دستوں کی سلامی لی۔ اس موقع پر بڑی تعداد میں عوام، طلبہ اور رضاکار بھی موجود تھے۔
اس سے قبل وزیرِ اعظم نے اپنے ’ایکس‘ (سابق ٹوئٹر) پیغام میں لکھا کہ ’’بھارت سر دار ولبھ بھائی پٹیل کو ان کی 150ویں یومِ پیدائش پر سلام پیش کرتا ہے۔ وہ ہمارے ملک کے اتحاد کے معمار تھے، جنہوں نے بھارت کے ابتدائی برسوں میں اس کی تقدیر سنوارنے میں اہم کردار ادا کیا۔ ان کی قوم پرستی، دیانت داری اور عوامی خدمت کے جذبے سے نسلیں متاثر ہوتی رہیں گی‘‘۔
India pays homage to Sardar Vallabhbhai Patel on his 150th Jayanti. He was the driving force behind India’s integration, thus shaping our nation’s destiny in its formative years. His unwavering commitment to national integrity, good governance and public service continues to… pic.twitter.com/7quK4qiHdN
— Narendra Modi (@narendramodi) October 31, 2025
ایک ویڈیو پیغام میں مودی نے کہا کہ ’’سر دار پٹیل میں لوگوں کو ایک لڑی میں پرونے کی غیر معمولی صلاحیت تھی، خواہ ان کے خیالات مختلف کیوں نہ ہوں۔ انہوں نے ریاستوں کے انضمام سے لے کر آزادی کی تحریک میں عوام کو ایک جھنڈے تلے متحد کرنے تک اپنی زندگی قوم کے اتحاد کے لیے وقف کر دی‘‘۔ راشٹریہ ایکتا دیوس کے اس موقع پر ملک بھر میں دوڑ، ریلیوں اور عہدِ یکجہتی کے پروگراموں کا بھی انعقاد کیا گیا تاکہ سر دار پٹیل کے ’’ایک بھارت، شریشٹھ بھارت‘‘ کے خواب کو عملی شکل دی جا سکے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
