نیپال فرار ہونے کی کوشش میں امرت پال! سرحد پر چوکسی بڑھائی گئی، کئی دنوں سے مفرور ہے خالصتانی حامی
Amritpal Singh: پولیس پنجاب کے مفرور خالصتانی حامی امرت پال سنگھ کو تلاش کرنے میں ناکام ہے۔ ساتھ ہی اس کے پوسٹر ہند-نیپال سرحد کے لکھیم پور کھیری کے گوری پھنٹہ سرحد پر چسپاں کیے گئے ہیں۔ اس کے ساتھ ہی سرحد پر تمام ایجنسیوں کو ہائی الرٹ کر دیا گیا ہے۔ خاص طور پر بارڈر سیکورٹی فورس (SSB) کو آنے اور جانے والی ہر گاڑی کی تلاشی لینے کی ذمہ داری سونپی گئی ہے۔ ہر شخص پر نظر رکھنے کی ہدایات دی گئی ہیں۔
مفرور امرت پال کو لے کر اتر پردیش لکھیم پور کھیری گوری پھنٹہ سرحد پر ہائی الرٹ جاری کر دیا گیا ہے۔ ایس ایس بی ہر گاڑی اور شخص کے سامان کی جانچ کر رہا ہے۔ ڈاگ اسکواڈ کی مدد سے ہر گاڑی کو روک کر طویل چیکنگ کی جا رہی ہے، تاکہ پنجاب کا مفرور امرت پال نیپال روانہ نہ ہو جائے۔ اطلاعات موصول ہو رہی ہیں کہ وہ نیپال روانہ ہونے کے موڈ میں ہے۔ امرت پال پنجاب کی 80000 پولیس کو چکمہ دے کر پنجاب سے باہر چلا گیا ہے اور اب انٹیلی جنس ایجنسیوں سے اطلاع مل رہی ہے کہ وہ نیپال فرار ہونے کی تیاری میں ہے۔
سرحدی مقامات پر ایک سخت چیکنگ مہم چلائی جا رہی ہے تاکہ امرت پال کی کسی بھی شکل میں شناخت ہو سکے۔ اسی لیے بارڈر پر ہر دکان وغیرہ پر اس کی ہر شکل کے پوسٹر چسپاں کیے گئے ہیں۔ اطلاعات موصول ہو رہی ہیں کہ امرت پال نیپال کے راستے پاکستان فرار ہونے کی تیاری میں ہے۔ واضح رہےکہ حال ہی میں یہ بات سامنے آئی ہے کہ امرت پال کے تار پاکستان کے انٹیلی جنس ڈیپارٹمنٹ آئی ایس آئی سے بھی جڑے ہوئے ہیں۔ امرت پال اس وقت کہاں ہے، یہ ایک بڑا سوال ہے۔
گزشتہ دنوں اسے ہریانہ کے کروکشیتر میں دیکھا گیا تھا۔ یہ ان پٹ ملنے کے بعد کہ وہ سادھو کے بھیس میں دہلی میں داخل ہوسکتا ہے، جس کے لیے پنجاب پولیس آئی ایس بی ٹی بس اسٹیشن پہنچی اور سی سی ٹی وی فوٹیج کو اسکین کیا گیا۔ پنجاب پولیس ایک ہفتے سے امرت پال کی تلاش میں ہے لیکن ابھی تک اسے کامیابی نہیں ملی ہے۔
-بھارت ایکسپریس
