آئی سی سی چیمپئنز ٹرافی 2025 کے سیمی فائنل میں آسٹریلوی ٹیم کو بھارت کے ہاتھوں 4 وکٹوں سے شکست کا منہ دیکھنا پڑا۔ سیمی فائنل میں شکست کے بعد کپتان اسٹیو اسمتھ نے ون ڈے کرکٹ سے ریٹائرمنٹ کا اعلان کردیا ہے۔ تاہم، اسمتھ ٹیسٹ اور ٹی 20 انٹرنیشنل میں سلیکشن کے لیے دستیاب ہوں گے۔ یہ فیصلہ ممکنہ طور پر لاس اینجلس میں منعقد ہونے والے اگلے اولمپک گیمز کا حصہ بننے کی ان کی خواہش کو ظاہر کرتا ہے۔ لاس اینجلس اولمپکس 2028 میں ہونے والے ہیں جس میں کرکٹ بھی حصہ لینے جا رہی ہے۔
قریب 35سالہ اسٹیو اسمتھ نے بھارت کے ہاتھوں شکست کے بعد اپنے ساتھی کھلاڑیوں کو اس فیصلے سے آگاہ کیا۔ اسمتھ نے کہاکہ’ایسا لگتا ہے کہ اب ریٹائرمنٹ کا صحیح وقت ہے۔ یہ ایک شاندار سفر تھا اور میں نے اس کے ہر لمحے کا لطف اٹھایا۔ بہت سارے حیرت انگیز لمحات اور حیرت انگیز یادیں ہیں۔ دو ورلڈ کپ جیتنا بہت بڑی کامیابی تھی۔ اس کے علاوہ بہت سے شاندار ساتھیوں نے اس سفر کا اشتراک کیا۔ اب 2027 ون ڈے ورلڈ کپ کی تیاری شروع کرنے کا ایک بہترین موقع ہے، اس لیے یہ صحیح وقت لگتا ہے۔اسٹیو اسمتھ کا مزید کہنا تھا کہ ‘ٹیسٹ کرکٹ اب بھی ترجیح ہے اور میں ورلڈ ٹیسٹ چیمپئن شپ کا فائنل، سردیوں میں ویسٹ انڈیز اور پھر گھر پر انگلینڈ کے خلاف کھیلنے کے لیے پرجوش ہوں۔ مجھے لگتا ہے کہ مجھے اس پلیٹ فارم پر اپنا حصہ ڈالنے کے لیے ابھی بھی بہت کچھ ہے۔
Steve Smith has played his last ODI #ChampionsTrophy
— cricket.com.au (@cricketcomau) March 5, 2025
آپ کو بتادیں کہ پیٹ کمنز کی چوٹ کی وجہ سے اسٹیو اسمتھ چیمپئنز ٹرافی میں آسٹریلوی ٹیم کی کپتانی کی ذمہ داری نبھا رہے تھے۔ اسمتھ نے سیمی فائنل میں شکست کے بعد کہا تھا کہ یہ ایک مشکل وکٹ تھی اور بیٹنگ کے حالات آسان نہیں تھے۔ اسمتھ کا خیال تھا کہ اگر ان کی ٹیم 280 سے زیادہ رنز بنا لیتی تو میچ کا نتیجہ مختلف ہو سکتا تھا۔اسٹیو اسمتھ نے آسٹریلیا کے لیے 170 ون ڈے میچ کھیلے جس میں انھوں نے 43.28 کی اوسط اور 86.96 کے اسٹرائیک ریٹ سے 5800 رنز بنائے۔ اس میں 12 سنچریاں اور 35 نصف سنچریاں شامل ہیں۔ اسٹیو اسمتھ کا ون ڈے میں سب سے زیادہ اسکور 164 رنز ہے جو 2016 میں سڈنی کرکٹ گراؤنڈ میں نیوزی لینڈ کے خلاف بنا تھا۔ اسمتھ نے ون ڈے میں بھی 28 وکٹیں حاصل کیں۔اسٹیو اسمتھ نے 64 ون ڈے میچوں میں آسٹریلیا کی کپتانی کی جس میں کینگرو ٹیم کو 32 میں کامیابی اور 28 میں شکست کا سامنا کرنا پڑا۔ جبکہ چار میچ بے نتیجہ رہے۔ اسٹیو اسمتھ 2015 اور 2023 ون ڈے ورلڈ کپ جیتنے والی کینگرو ٹیم کے رکن رہے ہیں۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
