ہریانہ اسمبلی الیکشن کے لئے مایاوتی کی بی ایس پی اور ابھے چوٹالہ کی آئی این ایل ڈی کے درمیان الائنس کا اعلان ہوگیا ہے۔
BSP INLD Alliance in Haryana Assembly Election 2024: ہریانہ میں انڈین نیشنل لوک دل (آئی این ایل ڈی) کے ساتھ مایاوتی کی پارٹی بی ایس پی نے آج (جمعرات، 11 جولائی) الائنس کا اعلان کیا۔ آج اس کا باضابطہ اعلان کردیا گیا۔ مایاوتی کے جانشین آکاش آنند نے الائنس کا اعلان کیا۔ جانشین کے عہدے پرواپسی کے بعد پہلی بارآکاش آنند کی طرف سے یہ ایک اہم قدم ہے۔
آکاش آنند نے کہا کہ مایاوتی اورابھے چوٹالہ کی تفصیل سے بات چیت ہوئی تھی۔ 90 میں سے 37 اسمبلی سیٹوں پربی ایس پی اور باقی پر آئی این ایل ڈی الیکشن لڑے گی۔
ابھے چوٹالہ نے کیا کہا؟
وہیں آکاش آنند کے ساتھ پریس کانفرنس میں موجود ابھے چوٹالہ نے کہا کہ یہ الائنس مفاد کے لئے نہیں ہے۔ بی جے پی نے 10 سالوں میں اور کانگریس نے اپنے راج میں ریاست کو لوٹا ہے۔ ہم غیربی جے پی، غیرکانگریسی لائنس ریاست میں تیار کریں گے اور حکومت بنائیں گے۔
کس کی کیا ہے پوزیشن؟
اسمبلی الیکشن سے پہلے بی ایس پی اور آئی این ایل ڈی کے الائنس سے برسراقتداربی جے پی اور اپوزیشن کانگریس کی پریشانی میں اضافہ ہوسکتا ہے۔ ریاست میں اسی سال کے آخر میں اسمبلی الیکشن ہونے والے ہیں۔ آئی این ایل ڈی مایاوتی کے سہارے دلت ووٹ کو سادھنے کی کوشش میں ہے۔ ہریانہ میں دلتوں کی آبادی تقریباً 20 فیصد ہے۔ لوک سبھا الیکشن 2024 میں ہریانہ میں بی ایس پی کو 1.28 فیصد ووٹ ملے تھے۔ وہیں آئی این ایل ڈی کو 1.74 سے اکتفا کرنا پڑا۔ 2019 کے اسمبلی الیکشن میں آئی این ایل ڈی کو صرف ایک سیٹ ملی تھی اور 2.44 فیصد سے اکتفا کرنا پڑا تھا۔ وہیں بی ایس پی کو 4.21 فیصد ووٹ ملے تھے۔ گزشتہ الیکشن میں آئی این ایل ڈی نے اکالی دل کے ساتھ الائنس کیا تھا۔
ابھے چوٹالہ نے کی مایاوتی سے ملاقات
ابھے چوٹالہ نے 6 جولائی کومایاوتی سے ملاقات کی تھی۔ اس دوران آکاش آنند بھی موجود تھے۔ تب ابھے چوٹالہ نے ایکس پرلکھا، ”بی ایس پی سربراہ اوریوپی کی سابق وزیراعلیٰ عزت مآب بہن کماری مایاوتی جی سے ان کی رہائش گاہ پرملاقات کی اورملک -ریاست کے اہم موضوعات پرتبادلہ خیال کیا۔”
بھارت ایکسپریس۔
