Hyderabad Building Collapse: حیدرآباد کے باچوپلی علاقہ میں شدید بارش کی وجہ سے ایک بڑا حادثہ پیش آیا ہے۔ علاقے میں زیر تعمیر مکان کی دیوار گرنے سے چار سالہ بچے سمیت سات افراد جاں بحق ہوگئے۔ یہ اطلاع پولیس نے بدھ کو دی۔ باچوپلی پولیس نے بتایا کہ یہ واقعہ منگل کی رات پیش آیا۔ اس المناک واقعے میں ہلاک ہونے والے تارکین وطن مزدور تھے جن کا تعلق اڈیشہ اور چھتیس گڑھ سے تھا۔ پولیس نے بتایا کہ بدھ کی صبح ایک مشین سے کھدائی کی گئی جس کی مدد سے ملبے تلے دبی لاشوں کو نکالا گیا۔
کئی علاقوں میں موسلادھار بارش
حیدرآباد اور تلنگانہ کے کئی علاقوں میں منگل کو شدید بارش کی وجہ سے نظام زندگی درہم برہم ہوگیا ہے۔ شہر میں کئی مقامات پر پانی جمع ہونے سے ٹریفک معطل رہی۔ گریٹر حیدرآباد میونسپل کارپوریشن کے حکام کے مطابق ڈیزاسٹر ریلیف فورس (DRF) کی ٹیمیں پانی کی نکاسی اور سڑکوں سے گرے ہوئے درختوں کو ہٹانے کے لیے تعینات کی گئی ہیں۔
محکمہ موسمیات نے جاری کیا الرٹ
محکمہ موسمیات نے نہ صرف حیدرآباد اور تلنگانہ بلکہ دیگر کئی ریاستوں میں بھی موسلادھار بارش کی پیش گوئی کی ہے۔ اس کے ساتھ ہی علاقوں میں ہائی الرٹ بھی جاری کر دیا گیا ہے۔ یہ بھی کہا گیا ہے کہ لوگ صرف ہنگامی حالات میں ہی گھروں سے نکلیں۔ پرنسپل سکریٹری (میونسپل ایڈمنسٹریشن اینڈ اربن ڈیولپمنٹ) ڈانکیشور نے جی ایچ ایم سی کمشنر رونالڈ روز کے ساتھ شہر کے مختلف آبی علاقوں کا دورہ کیا اور مختلف مقامات پر ڈی آر ایف ٹیموں کو تعینات کرکے بچاؤ کارروائیوں کے لیے ہدایات دیں۔
یہ بھی پڑھیں- Mukhtar Ansari Death: ‘کچھ تو رحم کریں، ملزم نے اپنے والد کو کھویا ہے’، عباس انصاری کو مختار کے 40 وے میں شرکت کی ملی اجازت
تیز بارش کے باعث گر گئے بجلی کے کھمبے
تیز آندھی اور بارش کے باعث پانی کی سپلائی بھی متاثر ہوئی ہے۔ کئی مقامات پر بجلی کے کھمبے بھی گر گئے ہیں جس کی وجہ سے لوگوں کے گھروں میں پوری بجلی نہیں پہنچ پا رہی ہے۔ اس وجہ سے میونسپل کارپوریشن کے افسران کی مختلف ٹیمیں شہر کے کئی علاقوں میں بھیجی گئی ہیں۔ ٹیمیں کئی علاقوں سے پانی بھرنے اور گرے ہوئے درختوں کو ہٹا رہی ہیں۔
-بھارت ایکسپریس
