ہندوستان کے ٹیسٹ اور ون ڈے کپتان شبھمن گل اتوار سے نیو چنڈی گڑھ میں چھتیس گڑھ کے خلاف شروع ہونے والے رنجی ٹرافی کے دوسرے مرحلے کے میچ میں پنجاب کی جانب سے کھیلیں گے۔ یہ فیصلہ ایسے وقت میں لیا گیا ہے، جب گل نیوزی لینڈ کے دورے پر روانہ ہونے سے پہلے ریڈ بال کرکٹ یعنی طویل فارمیٹ کی کرکٹ میں کچھ وقت گزارنا چاہتے ہیں۔ 27 سالہ شبھمن گل کو آخری وقت میں ٹیم میں شامل کیا گیا ہے، جبکہ ادے سہارن ٹیم کی کپتانی جاری رکھیں گے۔ نیوزی لینڈ میں ہندوستان کی ون ڈے سیریز 4 سے 15 نومبر تک کھیلی جائے گی، لیکن گل صرف ابتدائی تین میچوں میں حصہ لیں گے۔ اس کے بعد وہ 50 اوور کے فارمیٹ کی کپتانی شریس ایئر کے حوالے کردیں گے اور اپنی پوری توجہ اس کے بعد ہونے والی دو میچوں کی ٹیسٹ سیریز پر مرکوز کریں گے۔
انڈیا اے کے دورے کا حصہ نہیں ہوں گے گل
اسی دوران انڈیا اے کی ٹیم بھی نیوزی لینڈ کے دورے پر ہوگی، جہاں وہ نیوزی لینڈ اے کے خلاف تین غیر سرکاری ٹیسٹ میچ کھیلے گی۔ ان تینوں میچوں کے لیے یشسوی جیسوال اور کے ایل راہل کو ٹیم میں منتخب کیا گیا ہے۔ تاہم، گل اس ٹیم کا حصہ نہیں ہوں گے، جبکہ پہلے امید کی جارہی تھی کہ وہ انڈیا اے کی جانب سے کھیل سکتے ہیں۔ لیکن یہ منصوبہ کامیاب نہیں ہوسکا، کیونکہ 7 سے 10 نومبر تک لنکن میں ہونے والا تیسرا چار روزہ میچ ہندوستان کے دوسرے اور تیسرے ون ڈے میچوں سے ٹکرا رہا ہے۔ اسی وجہ سے رنجی ٹرافی میں کھیلنا گل کے لیے ٹیسٹ سیریز سے پہلے طویل فارمیٹ کی کرکٹ کی مشق کرنے کا اچھا موقع بن گیا ہے۔ امکان ہے کہ گل پنجاب کے لیے چوتھے نمبر پر بلے بازی کریں گے، جس کی وجہ سے جشن پریت سدھو کو پلیئنگ الیون سے باہر بیٹھنا پڑ سکتا ہے۔
پربھسمرن سنگھ کی واپسی سے پنجاب کی بلے بازی مضبوط ہوگی
وکٹ کیپر بلے باز پربھسمرن سنگھ کی ٹیم میں واپسی سے پنجاب کی بلے بازی مزید مضبوط ہوجائے گی۔ وہ گزشتہ ہفتے آسام کے خلاف سیزن کے پہلے میچ میں حصہ نہیں لے سکے تھے، کیونکہ اس وقت وہ انڈیا اے کی ٹیم کے ساتھ تھے۔ پڈوچیری میں آسٹریلیا اے کے خلاف کھیلی گئی 50 اوور کی سیریز میں، جس میں ہندوستان کو 1-2 سے شکست ہوئی تھی، پربھسمرن نے 39 اور 17 رن بنائے تھے۔
پہلے میچ میں پنجاب کی شاندار کارکردگی
پنجاب نے اپنے سیزن کا آغاز مثبت انداز میں کیا ہے۔ آسام کے خلاف پہلے میچ میں پہلی اننگز میں برتری کی بنیاد پر ٹیم نے تین پوائنٹس حاصل کیے تھے۔ اس مقابلے میں وہان ملہوترا، ایمان جوت چہل اور سلیل اروڑہ، تینوں نے سنچریاں بنائی تھیں۔ یہ میچ تجربہ کار ہندوستانی تیز گیند باز امیش یادو کے لیے بھی کافی اہم رہا، جنہوں نے دو سال سے زیادہ عرصے کے بعد فرسٹ کلاس کرکٹ میں واپسی کی۔ گھریلو سیزن سے پہلے ودربھ سے پنجاب میں شامل ہونے والے امیش نے 70 رن دے کر پانچ وکٹیں حاصل کیں۔ فرسٹ کلاس کرکٹ میں یہ 16واں موقع ہے، جب انہوں نے ایک اننگز میں پانچ یا اس سے زیادہ وکٹیں حاصل کی ہیں۔ شبھمن گل، پربھسمرن سنگھ اور پہلے میچ میں سنچریاں بنانے والے تین کھلاڑیوں کی موجودگی سے پنجاب کی بلے بازی کافی مضبوط نظر آرہی ہے۔ ٹیم نئے پی سی اے اسٹیڈیم میں اپنے گھریلو شائقین کے سامنے چھتیس گڑھ کے خلاف اپنی اچھی کارکردگی کا سلسلہ برقرار رکھنا چاہے گی۔
پنجاب کی ٹیم: ہرنور پنّو، وہان ملہوترا، شبھمن گل، ادے سہارن (کپتان)، جشن پریت سدھو، سلیل اروڑہ (نائب کپتان)، رمن دیپ سنگھ، پربھسمرن سنگھ (وکٹ کیپر)، ہربریت برار، ایمان جوت سنگھ چہل، ہر جس ٹنڈن، گرنور برار، امیش یادو، گرمسمرن سنگھ، سنویر سنگھ اور سہج دھون۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
