تصویر بشکریہ ایکس
وجے واڑہ: آندھرا پردیش کے وزیر اعلیٰ این چندرابابو نائیڈو نے جمعرات کو وجے واڑہ میں ریاستی حکومت کی جانب سے منعقدہ افطار پارٹی میں مسلمانوں کو وقف جائیدادوں کی حفاظت اور ان کے فلاحی منصوبوں کے لیے اپنی حکومت کی مضبوط وابستگی کا یقین دلایا۔ انہوں نے کہا کہ تلگو دیشم پارٹی (ٹی ڈی پی) حکومت ہمیشہ سے وقف املاک کی حفاظت کرتی آئی ہے اور آئندہ بھی یہ سلسلہ جاری رہے گا۔
نائیڈو کے اس بیان کے بعد سیاسی حلقوں میں قیاس آرائیاں شروع ہو گئی ہیں کہ آیا ٹی ڈی پی مرکز میں وقف (ترمیمی) بل 2024 پر بی جے پی کے لیے مشکلات پیدا کرے گی؟ ٹی ڈی پی نریندر مودی کی قیادت والی این ڈی اے حکومت کا اہم اتحادی ہے اور بی جے پی کو اس بل کو پارلیمنٹ میں منظور کرانے کے لیے اس کی حمایت درکار ہوگی۔ اگر ٹی ڈی پی پیچھے ہٹتی ہے تو یہ بل پاس کرانا بی جے پی کے لیے مشکل ہو سکتا ہے۔
రంజాన్ మాసం సందర్భంగా విజయవాడలో రాష్ట్ర ప్రభుత్వం ఇచ్చిన ఇఫ్తార్ విందులో పాల్గొన్నాను. రాష్ట్రానికి, ప్రజలకు అంతా మంచి జరగాలని ముస్లిం సోదరులతో కలిసి అల్లాను ప్రార్థించాను. ముస్లిం మైనారిటీ వర్గానికి నాడు, నేడు, రేపు… ఎప్పుడూ అండగా ఉంటానని తెలియజేశాను. పవిత్ర రంజాన్ మాసంలో… pic.twitter.com/tqKSYlm29f
— N Chandrababu Naidu (@ncbn) March 27, 2025
وزیر اعلیٰ نے وقف بورڈ کو معطل کرنے والے متنازع گورنمنٹ آرڈر (جی او) 43 کا حوالہ دیتے ہوئے کہا کہ اس کے باعث وقف بورڈ کے کام کاج میں رکاوٹ پیدا ہوئی تھی۔ انہوں نے کہا، “ہماری حکومت کے اقتدار میں آتے ہی ہم نے اس حکم کو منسوخ کر دیا اور وقف جائیدادوں کے تحفظ کو یقینی بنایا۔ ساتھ ہی وقف بورڈ کو دوبارہ فعال کیا۔”
نائیڈو نے مسلمانوں کی معاشی حالت بہتر بنانے کے لیے اپنی حکومت کے اقدامات پر روشنی ڈالی۔ انہوں نے کہا کہ ٹی ڈی پی حکومت کے دوران مسلمانوں کے ساتھ انصاف ہوا ہے اور این ڈی اے کے دور اقتدار میں ان کی حالت مزید بہتر ہوگی۔ وزیر اعلیٰ نے بتایا کہ 2025-26 کے بجٹ میں اقلیتوں کی فلاح و بہبود کے لیے 5,300 کروڑ روپے مختص کیے گئے ہیں۔
نائیڈو نے سابق وزیر اعلیٰ این ٹی راما راؤ کی مسلم فلاحی اسکیموں کا حوالہ دیتے ہوئے ٹی ڈی پی کے مسلمانوں سے تاریخی تعلق کو اجاگر کیا۔ انہوں نے کہا کہ راما راؤ نے مائناریٹی فنانس کارپوریشن قائم کی تھی اور کئی فلاحی اسکیمیں نافذ کی تھیں۔ نائیڈو نے یہ بھی بتایا کہ ٹی ڈی پی حکومت نے حیدرآباد میں حج ہاؤس تعمیر کرایا تھا اور امراوتی میں ایک اور حج ہاؤس کی بنیاد رکھی تھی، تاہم وائی ایس آر کانگریس حکومت کی لاپرواہی کی وجہ سے اس کا کام رک گیا۔
— N Chandrababu Naidu (@ncbn) March 27, 2025
افطار پارٹی میں وزیر اعلیٰ نے اماموں اور مؤذنوں کے وظیفے میں اضافے کا بھی اعلان کیا۔ انہوں نے کہا کہ اماموں کو اب 10,000 روپے ماہانہ جبکہ مؤذنوں کو 5,000 روپے ملیں گے۔ اس تقریب میں ریاستی وزیر برائے اقلیتی بہبود این محمد فاروق، وزیر برائے معدنیات کولو رویندر اور رکن اسمبلی محمد نصیر احمد سمیت ٹی ڈی پی کے کئی اہم رہنما موجود تھے۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
