وزیراعظم نریندر مودی کی قیادت والی مرکزی حکومت آج پارلیمنٹ میں تین اہم بل پیش کرنے جا رہی ہے۔ ان میں ایسا التزام شامل ہے، جس کے تحت اگر کوئی وزیراعظم، مرکزی وزیر، وزیراعلیٰ یا کسی بھی ریاست یا مرکز کے زیر انتظام علاقے کا وزیر سنگین مجرمانہ الزامات کے تحت مسلسل 30 دنوں تک گرفتار یا حراست میں رہتا ہے، تو اسے عہدے سے ہٹا دیا جائے گا۔ یہ بل آج مرکزی وزیر داخلہ امت شاہ لوک سبھا میں پیش کریں گے۔
مرکزی حکومت بدھ کو پارلیمنٹ میں تین اہم بل پیش کرنے والی ہے، جن کے ذریعے وزیراعظم، مرکزی وزیر، وزیراعلیٰ یا مرکز کے زیر انتظام علاقے کے وزیر کو سنگین مجرمانہ الزامات میں گرفتار یا حراست میں لیے جانے کی صورت میں عہدے سے ہٹانے کے لیے قانونی خاکہ فراہم کیا جائے گا۔
خبر رساں ایجنسی پی ٹی آئی کے مطابق، جو بل پیش کیے جائیں گے، وہ درج ذیل ہیں:
- حکومتِ یونین ٹیریٹریز (ترمیمی) بل، 2025
- آئین (130ویں ترمیم) بل، 2025
- جموں و کشمیر تنظیم نو (ترمیمی) بل، 2025
ان بلوں پر مزید غور و خوض کے لیے، مرکزی وزیر داخلہ امت شاہ لوک سبھا میں ایک تحریک بھی پیش کریں گے،
تین بل کون سے ہیں؟
وزیر داخلہ امت شاہ تین بل پیش کریں گے:
130واں آئینی ترمیمی بل
جموں و کشمیر تنظیم نو ترمیمی بل
مرکزی زیرانتظام علاقوں کی حکومت سے متعلق ترمیمی بل
یہ تینوں بل پارلیمنٹ کی مشترکہ کمیٹی کو بھیجے جانے کی تجویز بھی پیش کی جائے گی۔
بل میں کیا ہے؟
بل کے مطابق:”اگر کوئی وزیر اپنے عہدے پر رہتے ہوئے کسی قانون کے تحت جرم کے الزام میں گرفتار ہوتا ہے اور 30 دن کی مدت تک حراست میں رہتا ہے، اور اس جرم کی سزا 5 سال یا اس سے زیادہ ہو سکتی ہے، تو 31ویں دن پر اسے وزیراعظم کی سفارش پر صدر جمہوریہ کے ذریعے عہدے سے ہٹا دیا جائے گا۔
اگر وزیراعظم 31ویں دن تک صدر کو سفارش نہیں کرتے، تو وزیر خود بخود اگلے دن سے اپنے عہدے سے برطرف تصور کیا جائے گا۔”
فی الحال کسی وزیر کی گرفتاری کے بعد عہدے پر بنے رہنے پر کوئی قانونی پابندی نہیں ہے۔ جیسے دہلی کے سابق وزیراعلیٰ اروند کیجریوال اور تمل ناڈو کے وزیر وی سینتھل بالاجی کئی الزامات میں گرفتاری کے باوجود اپنے عہدے پر قائم رہے۔
آپریشن سندور پر PM مودی کا تبصرہ
وزیراعظم مودی نے حال ہی میں ‘آپریشن سندور’ پر تبصرہ کرتے ہوئے شفافیت اور جوابدہی کی بات کی، جس سے اس بل کو قانونی جواز ملتا نظر آ رہا ہے۔
کانگریس پارٹی کا ردِ عمل
کانگریس نے اس بل کو سیاسی چال قرار دیا۔
رہنما گورو گوگوئی نے کہا:”یہ بل دراصل بہار میں راہل گاندھی کی ووٹر ادھیکار یاترا سے توجہ ہٹانے کی ایک مایوس کن کوشش ہے۔ پہلے سی ایس ڈی ایس – بی جے پی آئی ٹی سیل کا ڈراما، اور اب یہ بل!”
اپوزیشن کو غیر مستحکم کرنے کی کوشش؟
سینئر وکیل اور کانگریسی رہنما ابھشیک منو سنگھوی نے کہا:”یہ کیسا دُشچکر ہے! نہ گرفتاری کا کوئی ضابطہ، نہ اصول
اپوزیشن لیڈروں کی اندھی دھند گرفتاریاں – اور پھر نئے قانون کے تحت انہیں فوری برطرف کر دینا
اپوزیشن کو غیر مستحکم کرنے کا بہترین طریقہ: سیاسی جانبداری پر مبنی ایجنسیاں اپوزیشن وزرائے اعلیٰ کو گرفتار کریں، چاہے وہ انتخابات جیت گئے ہوں”
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
