مہاراشٹر کے 800 سے زیادہ اردو میڈیم اسکولوں نے ثقافتی طور پر نامناسب (غیرمہذب)ہونے کا حوالہ دیتے ہوئے ریاستی حکومت کی ‘ ون اسٹیٹ،ون یونیفارم’ اسکیم کے تحت فراہم کردہ یونیفارم کو مسترد کر دیا ہے اور واپس کر دیا ہے۔ یہ اسکول لڑکیوں کے لیے مکمل فراک یاسلوار قمیض اور دوپٹوں کے ساتھ ساتھ لڑکوں کے لیے فل شرٹ اور پینٹ کا مطالبہ کر رہے ہیں۔ موجودہ یونیفارم، جو لڑکوں کے لیے ہاف پینٹ اور لڑکیوں کے لیے فراکس پر مشتمل ہے، کو اسکولوں نے “غیر موزوں”، “نامناسب” قرار دیا ہے۔اکھل بھارتیہ اردو سکھشک سنگھ کے بانی اور جنرل سکریٹری ساجد نثار نے کہا، “حکومت نے 8 جون 2023 کو 44,60,004 طلباء کو مفت یونیفارم فراہم کرنے کے لیے ‘ون اسٹیٹ،ون یونیفارم’ پالیسی متعارف کرائی تھی۔ تاہم، 20 لاکھ سے زیادہ طلباء کو ابھی تک یونیفارم نہیں ملا ہے۔ فراہم کردہ یونیفارم لڑکوں کے لیے ہاف شرٹ اور ہاف پینٹ پر مشتمل تھی، جبکہ لڑکیوں کو صرف فراکس دیے گئے تھے۔ ہمارے اردو میڈیم اسکولوں کے طلبہ کے لیے، معیار اول سے ہشتم تک، ہم لڑکوں کے لیے فل شرٹ اور پینٹ، اورلڑکیوں کے شلوار کے ساتھ فراکس یا قمیض اور دوپٹہ کا مطالبہ کرتے ہیں۔ 19 ستمبر کو ہم نے اپنے مطالبات پیش کرنے کے لیے اسکولی تعلیم کے وزیر دیپک کیسرکر سے ملاقات کی، لیکن ابھی تک کوئی جواب نہیں ملا ہے۔
میرا بھائیندر کے ایک اردو اسکول کی والدین اور استاد ثمینہ مختار نے کہا تھا کہ والدین نامناسب لباس سے مطمئن نہیں ہیں۔ ہم پالیسی کے معیاری رنگ کی مخالفت نہیں کرتے، لیکن ہم ایسے یونیفارم چاہتے ہیں جو ہماری ثقافتی تقاضوں کو پورا کرتی ہوں۔ کرلا کے ایک استاد، نیاز شیخ نے کہا کہ یہ احتجاج اردو میڈیم کے طلباء کی ضروریات پر توجہ نہ دینے کے بارے میں وسیع تر خدشات کو اجاگر کرتے ہیں۔ وہیں دوسری جانب مہاراشٹر اسٹیٹ پرائمری ٹیچرز کمیٹی کے ریاستی صدر وجے کومبی نے انکشاف کیا کہ ودربھ کے تقریباً 75 فیصد اسکولوں کو ابھی تک یونیفارم نہیں مل سکا ہے۔وہیں یونیفارم کی خراب کوالیٹی اور تاخیر کی وجہ سے بھی اسکولوں میں عمومی ناراضگی اور احتجاج کا ما حول دیکھنے کو مل رہا ہے۔
اس معاملے پر اپوزیشن جماعتوں نے برسراقتدار حکومت پر نااہلی کا الزام لگایا ہے۔ صورتحال اس وقت مزید خراب ہوئی جب یہ انکشاف ہوا کہ تقسیم کی جانے والی کئی یونیفارم ناقص معیار کی تھیں۔ این سی پی ایم ایل اے روہت پوار نے کہا، آپ میرا مذاق اڑا سکتے ہیں، لیکن ان غریب طلبہ کا مذاق مت اڑائیں۔ اگر آپ ایسا کرتے ہیں تو تقدیر آپ کا مذاق اڑائے گی، اور آپ کی حکومت ان یونیفارم کی طرح غیر مستحکم ہو جائے گی۔اپوزیشن لیڈر امباداس دانوے نے 15 اگست 2024 کی ڈیڈ لائن کو پورا کرنے میں ناکام ہونے پر حکومت پر تنقید کی، یہ نوٹ کرتے ہوئے کہ یونیفارم حاصل کرنے والے 45 لاکھ طلباء میں سے صرف 24 لاکھ نے ستمبر کے آخر تک ایسا کیا تھااور وہ یونیفارم بھی غیر معیاری ہیں! اس حکومت نے بدعنوانی کی تمام حدیں پار کر دی ہیں۔
بھارت ایکسپریس۔
