کیرالہ اسمبلی میں خواتین اور بچوں کے تحفظ کے مدعے پر ہنگامہ
ترواننت پورم: کیرالہ کے ارناکولم ضلع میں ایک آٹھ سالہ بچی کے ساتھ حالیہ جنسی زیادتی کے بعد ریاست میں خواتین اور بچوں کی حفاظت کے مدعے پر منگل کے روز اسمبلی میں کانگریس کی قیادت والی اپوزیشن یو ڈی ایف اور حکمراں ایل ڈی ایف کے ارکان کے درمیان زوردار بحث ہو گئی۔ اپوزیشن اتحاد یونائیٹڈ ڈیموکریٹک فرنٹ (یو ڈی ایف) نے الزام لگایا کہ ریاستی حکومت خاص طور پر پولیس اور محکمہ داخلہ ریاست میں خواتین اور بچوں کی حفاظت کو یقینی بنانے میں بری طرح ناکام رہے ہیں۔
ان الزامات کے جواب میں حکمراں بائیں بازو کے جمہوری محاذ (ایل ڈی ایف) نے کہا کہ پولیس نے مجرموں کو پکڑنے اور اس طرح کے واقعات کی تکرار کو روکنے کے لیے سخت اقدامات کیے ہیں۔ اپوزیشن نے دعویٰ کیا کہ محکمہ داخلہ میں پولیس ایک ‘جماعت’ کے کنٹرول میں ہے۔ وزیر اعلیٰ پنارائی وجین نے اس پر برہمی کا اظہار کرتے ہوئے کہا کہ اس طرح کے الزامات لگانے والے شخص کی ذہنی صحت کی جانچ کی ضرورت ہے۔ ہوم ڈیپارٹمنٹ چیف منسٹر وجین کے ماتحت ہے۔
اپوزیشن نے خواتین اور بچوں کے تحفظ کے معاملے پر بحث کے لیے التوا کا نوٹس دیا۔ جولائی کے آخری ہفتے میں پیش آنے والے ایک واقعے کو لے کر ریاست بھر میں غصہ تھا۔ اس واقعے میں بہار کے ایک مزدور کی پانچ سالہ بیٹی کو جنسی زیادتی کا نشانہ بنا کر قتل کر دیا گیا تھا۔ پولیس کے مطابق ملزم بھی بہار کا رہائشی تھا اور واقعے کے فوراً بعد پکڑا گیا۔ دوسرا واقعہ گزشتہ ہفتے پیش آیا، جب بہار سے تعلق رکھنے والے ایک اور مزدور کی آٹھ سالہ بیٹی کو اغوا کر کے جنسی زیادتی کا نشانہ بنایا گیا۔ ملزم کیرالہ کا رہنے والا ہے۔ وہ چوری کے کئی مقدمات میں بھی ملزم ہے۔
التوا کا نوٹس دینے والے UDF کے ایم ایل اے انور سدات نے پوچھا کہ کیا پولیس چیف منسٹر کے کنٹرول میں ہے یا کسی گروپ کے کنٹرول میں؟ پارٹی کے الزامات کے درمیان، وجین نے کہا کہ پولیس نے تمام معاملات میں سخت کارروائی کی ہے اور مجرموں کو گرفتار کیا ہے اور ان کے خلاف مقدمات درج کیے ہیں۔ انہوں نے کہا کہ کیرالہ پولیس جرائم کی تحقیقات اور امن و سلامتی برقرار رکھنے کے معاملے میں ملک کی بہترین پولیس میں سے ایک ہے اور یہ ریاست کے لیے فخر کی بات ہے۔
بھارت ایکسپریس۔
