ملک کی سب سے پرانی سیاسی جماعت کانگریس ایک بار پھر زمینی سطح پر متحرک ہونے کی تیاری میں ہے۔ اس بار کانگریس نے اپنے اہم فلاحی منصوبے مہاتما گاندھی نیشنل رورل ایمپلائمنٹ گارنٹی ایکٹ یعنی منریگا کو مرکز بنا کر ’منریگا بچاؤ سنگرام‘ کے نام سے ملک گیر تحریک شروع کرنے کا اعلان کیا ہے۔ کانگریس کا الزام ہے کہ مرکزی حکومت اس اسکیم کو کمزور کرنے کی مسلسل کوشش کر رہی ہے، جس کے خلاف پارٹی دیہی بھارت میں عوامی بیداری پیدا کرے گی۔اس مہم کی قیادت کر رہی کانگریس کی کوآرڈینیشن کمیٹی نے 5 جنوری کو ایک اہم اجلاس منعقد کیا، جس میں تحریک کی مکمل حکمتِ عملی طے کی گئی۔ پارٹی نے تمام جنرل سیکریٹریوں، ریاستی انچارجز اور سیکریٹریوں کو ہدایت دی ہے کہ وہ 8 جنوری تک ہر حال میں ضروری دستاویزات نچلی سطح کی کمیٹیوں تک پہنچا دیں۔ کانگریس کی اس بار کی حکمت عملی صرف شہروں تک محدود نہیں رہے گی بلکہ بلاک اور پنچایت سطح تک جا کر حکومت کو گھیرنے کی ہے۔
تحریک کو مؤثر بنانے کے لیے کانگریس نے تشہیری مواد پر بھی خاص توجہ دی ہے۔ ایک صفحے پر مشتمل خصوصی پمفلٹ تیار کیا گیا ہے، جسے مقامی زبانوں میں ترجمہ کر کے دیہات میں تقسیم کیا جائے گا۔ اس مہم کا باضابطہ آغاز 10 جنوری کو ضلع سطح پر پریس کانفرنسوں کے ذریعے ہوگا، جب کہ 11 جنوری کو ملک بھر میں ریاستی سطح پر دھرنے دیے جائیں گے۔اس تحریک کا سب سے اہم مرحلہ 12 سے 29 جنوری کے درمیان ہوگا، جب مختلف علاقوں میں ’پنچایت چوپال‘ پروگرام منعقد کیے جائیں گے۔ ان چوپالوں کے ذریعے کانگریس کارکن براہِ راست مزدوروں اور دیہی عوام سے رابطہ کریں گے اور منریگا سے جڑے مسائل پر گفتگو کریں گے۔
26 جنوری، یوم جمہوریہ کے موقع پر کانگریس ایک خصوصی قرارداد بھی سامنے لانے جا رہی ہے، جسے ملک بھر کی گرام سبھاؤں میں بحث اور منظوری کے لیے پیش کیا جائے گا۔ پارٹی کا مقصد یہ دکھانا ہے کہ منریگا میں ہونے والی تبدیلیوں کے خلاف آواز صرف کانگریس کی نہیں بلکہ خود دیہی عوام کی ہے۔
8 جنوری کو ریاستی دارالحکومتوں میں ہونے والی تیاری میٹنگز کو اس مہم کی بنیاد قرار دیا جا رہا ہے۔ ان میٹنگز میں نہ صرف تشہیری مواد کی چھپائی اور ترجمے کا کام مکمل کیا جائے گا بلکہ احتجاجی پروگراموں کے مقامات اور اوقات بھی طے کیے جائیں گے۔ کانگریس کا واضح ہدف ہے کہ منریگا بچاؤ کا پیغام ملک کی ہر گرام سبھا تک پہنچے اور دیہی عوام اپنی آواز مضبوطی سے بلند کریں۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
