بہار اسمبلی انتخابات کے بیچ سماجوادی پارٹی (ایس پی) کے رکنِ پارلیمنٹ سناتن پانڈے کے ایک متنازع بیان نے سیاسی طوفان کھڑا کر دیا ہے۔ اتر پردیش کے بلیا سے سماجوادی پارٹی (ایس پی) کے رکنِ پارلیمنٹ سناتن پانڈے نے ایک انتخابی جلسے کے دوران کہا کہ “اگر آرا، چھپرا اور سیوان نہ ہوں تو یوپی کے لڑکے کنوارے رہ جائیں گے، اس لیے جہیز میں ووٹ دے کر مہاگٹھ بندھن کو جتاؤ۔” اس بیان کے بعد بہار میں بی جے پی سمیت کئی سیاسی جماعتوں نے شدید ردعمل ظاہر کیا ہے۔
بی جے پی نے سناتن پانڈے کے بیان کو نہ صرف خواتین مخالف بلکہ انتہائی توہین آمیز قرار دیا ہے۔ بی جے پی ترجمان نے کہا کہ یہ بیان سماج میں ”لڑکے ہیں، غلطی ہو جاتی ہے“ جیسی ذہنیت کو فروغ دیتا ہے، جو خواتین کی تذلیل کے مترادف ہے۔ پارٹی نے الیکشن کمیشن سے اس بیان کا نوٹس لینے اور کارروائی کرنے کی بھی مانگ کی ہے۔
سناتن پانڈے نے بہار انتخابات کے دوران مہاگٹھ بندھن کے حق میں ووٹ دینے کی اپیل کرتے ہوئے متنازع تبصرہ کیا۔ انہوں نے کہا کہ ”یوپی اور بہار کے درمیان رشتہ شادی بیاہ سے جڑا ہے، اگر بہار کے آرا، چھپرا اور سیوان کے علاقے نہ ہوں تو یوپی کے آدھے لڑکے ابھی تک کنوارے رہ جاتے۔ اس لیے بہار کے عوام جہیز میں ووٹ دے کر مہاگٹھ بندھن کو کامیاب بنائیں“۔
ذرائع کے مطابق، سناتن پانڈے بہار میں مہاگٹھ بندھن کے ایک امیدوار کے لیے انتخابی مہم چلانے والے ہیں، جس پر بی جے پی نے نشانہ سادھا ہے۔ پارٹی نے کہا کہ پانڈے دراصل ”مافیا امیدوار“ کے لیے ووٹ مانگنے جا رہے ہیں۔ اس پر سناتن پانڈے نے وضاحت دی کہ ”یہ ضروری نہیں کہ اگر باپ مافیا ہو تو بیٹا بھی مافیا ہو، ہم بہار کو جرائم سے آزاد کرنے جا رہے ہیں“۔
سماجوادی پارٹی نے بہار اسمبلی انتخابات کے لیے اپنے 20 اسٹار پرچارکوں کی فہرست جاری کی ہے، جس میں اکھلیش یادو، ڈمپل یادو، شیوپال یادو اور اعظم خان سمیت کئی بڑے نام شامل ہیں۔ بہار میں اس بار 234 اسمبلی نشستوں پر دو مرحلوں میں ووٹنگ ہونی ہے۔ پہلے مرحلے کی ووٹنگ 6 نومبر کو جبکہ دوسرے مرحلے کی ووٹنگ 11 نومبر کو ہوگی۔ ووٹوں کی گنتی اور نتائج کا اعلان 14 نومبر کو کیا جائے گا۔ سناتن پانڈے کے اس متنازع بیان نے نہ صرف انتخابی ماحول کو گرما دیا ہے بلکہ مہاگٹھ بندھن کی مہم پر بھی نیا تنازع کھڑا کر دیا ہے۔
-بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
