نئی دہلی: پولینڈ کے وزیر اعظم ڈونالڈ ٹسک نے جمعرات کو نئی دہلی کے حیدرآباد ہاؤس میں وزیر اعظم نریندر مودی سے ملاقات کی۔ ملاقات سے قبل دونوں رہنماؤں نے ایک دوسرے کا گرمجوشی سے استقبال کیا۔ اس ملاقات میں ہندوستان اور پولینڈ کے درمیان اسٹریٹجک شراکت داری کو مزید مضبوط بنانے اور تعاون کے نئے مواقع تلاش کرنے پر تبادلہ خیال ہوگا۔وزارت خارجہ کے مطابق، دونوں رہنما تجارت، سرمایہ کاری، دفاعی تعاون، قابل تجدید توانائی اور جدید ٹیکنالوجی سمیت کئی اہم شعبوں میں دوطرفہ تعلقات کو آگے بڑھانے پر بات کریں گے۔ اس کے علاوہ باہمی دلچسپی کے علاقائی اور عالمی امور بھی زیر بحث آئیں گے۔وزارت خارجہ نے سوشل میڈیا پلیٹ فارم ایکس پر ایک پوسٹ میں کہا کہ وزیر اعظم نریندر مودی نے حیدرآباد ہاؤس میں پولینڈ کے وزیر اعظم ڈونالڈ ٹسک کا گرمجوشی سے خیرمقدم کیا۔ دونوں رہنماؤں کی بات چیت کا مقصد ہندوستان اور پولینڈ کے تعلقات کو مزید مستحکم کرنا اور تعاون کے نئے امکانات تلاش کرنا ہے۔
اس سے پہلے ڈونالڈ ٹسک نے نئی دہلی کے راج گھاٹ پہنچ کر مہاتما گاندھی کو خراج عقیدت پیش کیا۔ ہندوستان کے وزیر خارجہ ایس جے شنکر نے بھی پولینڈ کے وزیر اعظم سے ملاقات کی اور دونوں ممالک کے درمیان مختلف شعبوں میں تعاون بڑھانے کے امکانات پر تبادلہ خیال کیا۔جے شنکر نے ایکس پر لکھا کہ پولینڈ کے وزیر اعظم ڈونالڈ ٹسک سے ملاقات کرکے انہیں خوشی ہوئی۔ انہوں نے مختلف شعبوں میں ہندوستان اور پولینڈ کے درمیان تعاون کو گہرا کرنے سے متعلق ٹسک کے خیالات کی ستائش کی اور کہا کہ وہ وزیر اعظم نریندر مودی کے ساتھ ان کی ملاقات کے منتظر ہیں۔
تین روزہ دورے پر ہندوستان پہنچے ٹسک
ڈونالڈ ٹسک بدھ کی شام تین روزہ سرکاری دورے پر نئی دہلی پہنچے۔ اس دورے کا مقصد دفاع، تجارت اور اسٹریٹجک شعبوں میں دونوں ممالک کے درمیان دوطرفہ تعاون کو مضبوط بنانا ہے۔ہوائی اڈے پر پہنچنے پر مرکزی وزیر مملکت برائے خوراک کی ڈبہ بندی کی صنعت اور جل شکتی راج بھوشن چودھری نے ان کا گرمجوشی سے استقبال کیا۔ وزارت خارجہ نے بھی ایکس پر پوسٹ کرکے ان کے ہندوستان پہنچنے کا خیرمقدم کیا اور امید ظاہر کی کہ یہ دورہ ہندوستان اور پولینڈ کی اسٹریٹجک شراکت داری کو نئی رفتار دے گا اور دونوں ممالک کے دیرینہ تعلقات مزید مضبوط ہوں گے۔
تجارتی وفد بھی ٹسک کے ساتھ
پولینڈ کے وزیر اعظم کے ساتھ وہاں کے وزیر خزانہ و معیشت آندرے ڈومانِسکی اور اعلیٰ سطحی تجارتی وفد بھی ہندوستان آیا ہے۔ وزارت خارجہ کے مطابق، وزیر اعظم کے طور پر ڈونالڈ ٹسک کا یہ ہندوستان کا دوسرا دورہ ہے۔ اس سے پہلے وہ اپنے گزشتہ دورِ اقتدار میں 2010 میں ہندوستان آئے تھے۔نئی دہلی میں اپنے پروگرام مکمل کرنے کے بعد ٹسک بنگلورو جائیں گے، جہاں وہ انفارمیشن ٹیکنالوجی اور خلائی شعبے سمیت مختلف کاروباری حلقوں کے نمائندوں سے ملاقات کریں گے۔ ہندوستان اور پولینڈ کے درمیان تجارتی تعاون کو فروغ دینے کے لیے 22 اکتوبر کو نئی دہلی اور 23 اکتوبر کو بنگلورو میں ’ہندوستان۔پولینڈ بزنس فورم‘ کا انعقاد بھی کیا جائے گا۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
