NHRC On Heatwaves: ہیٹ ویو پر این ایچ آر سی کا انتباہ، 21 ریاستوں اور دہلی کے لیے فوری اقدامات کی ہدایت

نئی دہلی: ملک بھر میں بڑھتی ہوئی شدید گرمی اور ہیٹ ویو کے خطرات کے پیش نظر نیشنل ہیومن رائٹس کمیشن (این ایچ آر سی) نے 21 ریاستوں اور قومی دارالحکومت دہلی کے لیے اہم الرٹ جاری کرتے ہوئے فوری احتیاطی اقدامات کرنے کی ہدایت دی ہے۔ کمیشن نے واضح کیا ہے کہ موسمیاتی تبدیلی کے باعث گرمی کی شدت اب محض ایک موسمی مسئلہ نہیں رہی بلکہ یہ براہ راست انسانی جان اور روزگار کے لیے سنگین خطرہ بنتی جا رہی ہے۔ این ایچ آر سی کی جانب سے ریاستوں کے چیف سکریٹریز کو ارسال کیے گئے مراسلے میں کہا گیا ہے کہ وہ ہیٹ ویو سے سب سے زیادہ متاثر ہونے والے طبقات کے تحفظ کے لیے فوری اور مؤثر اقدامات کریں۔ ان طبقات میں غریب اور مزدور طبقہ، کھلے آسمان تلے کام کرنے والے افراد، بزرگ شہری، بچے، نوزائیدہ اور خاص طور پر بے گھر افراد شامل ہیں، جو شدید گرمی کے دوران سب سے زیادہ خطرے سے دوچار ہوتے ہیں۔

کمیشن نے اپنے بیان میں کہا ہے کہ ان کمزور طبقات کے پاس نہ تو مناسب رہائش ہوتی ہے اور نہ ہی ضروری وسائل، جس کی وجہ سے گرمی کے اثرات ان کے لیے زیادہ مہلک ثابت ہوتے ہیں۔ اس لیے ریاستی حکومتوں کو چاہیے کہ وہ ان افراد کے لیے فوری بنیادوں پر پناہ گاہوں، ٹھنڈے پانی اور طبی سہولیات کی فراہمی کو یقینی بنائیں۔ اعداد و شمار کا حوالہ دیتے ہوئے کمیشن نے بتایا کہ 2019 سے 2023 کے درمیان ملک میں ہیٹ اسٹروک اور لو لگنے کے باعث 3712 افراد ہلاک ہو چکے ہیں، جو صورتحال کی سنگینی کو ظاہر کرتا ہے۔ کمیشن نے خبردار کیا کہ ۔اگر بروقت اقدامات نہ کیے گئے تو آنے والے برسوں میں یہ تعداد مزید بڑھ سکتی ہے

این ایچ آر سی نے ریاستوں کو ہدایت دی ہے کہ وہ پہلے سے طے شدہ معیاری عملی طریقہ کار (ایس او پیز) اور نیشنل ڈیزاسٹر مینجمنٹ اتھارٹی کے رہنما اصولوں کے مطابق فوری طور پر ریلیف اقدامات نافذ کریں۔ ان اقدامات میں صاف پانی کی دستیابی، شیلٹر ہومز کا قیام، طبی سہولیات کی فراہمی اور عوامی بیداری مہمات شامل ہیں، تاکہ ہیٹ ویو کے مضر اثرات کو کم کیا جا سکے۔ کمیشن نے یہ بھی ہدایت دی ہے کہ تمام ریاستیں ضلع سطح پر کیے گئے اقدامات کی تفصیلی رپورٹ تیار کریں اور اسے یکجا کر کے کمیشن کو ارسال کریں۔ اس کا مقصد پورے ملک میں صورتحال کی مؤثر نگرانی کرنا اور ضرورت پڑنے پر اضافی اقدامات اٹھانا ہے۔

دریں اثنا، دہلی سمیت شمالی ہندوستان کے مختلف علاقے اس وقت شدید گرمی کی لپیٹ میں ہیں، تاہم موسمیاتی تبدیلی کے آثار بھی سامنے آ رہے ہیں۔ محکمہ موسمیات ہند کے مطابق آئندہ 48 گھنٹوں کے دوران دہلی میں موسم میں کچھ بہتری آنے کا امکان ہے اور 28 اپریل کو بارش کی پیش گوئی کی گئی ہے، جس سے درجہ حرارت میں کمی متوقع ہے۔ محکمہ موسمیات کے مطابق 29 اپریل کے لیے دہلی میں یلو الرٹ جاری کیا گیا ہے، جس کے تحت شہریوں کو احتیاطی تدابیر اختیار کرنے کی ہدایت دی گئی ہے۔ منگل کے روز دارالحکومت کا زیادہ سے زیادہ درجہ حرارت 42 ڈگری سیلسیس جبکہ کم سے کم درجہ حرارت 27 ڈگری سیلسیس رہنے کا امکان ظاہر کیا گیا ہے۔ ماہرین کا کہنا ہے کہ موسمیاتی تبدیلی کے باعث ہیٹ ویو کی شدت اور دورانیہ دونوں میں اضافہ ہو رہا ہے، جس کے پیش نظر حکومتی اداروں اور عوام کو مل کر اس چیلنج کا مقابلہ کرنا ہوگا۔ این ایچ آر سی کی جانب سے جاری کردہ یہ الرٹ اسی سلسلے کی ایک اہم کڑی ہے، جس کا مقصد انسانی جانوں کو محفوظ بنانا اور معاشرتی سطح پر نقصانات کو کم کرنا ہے۔

بھارت ایکسپریس اردو۔