Ferozpur Road Accident: پنجاب کے فیروزپور میں ہولناک سڑک حادثہ، آخری رسومات سے واپس آنے والے 9 افراد ہلاک، 10 سے زائد زخمی

نئی دہلی :پنجاب کے ضلع فیروزپور میں ہفتہ کی صبح ایک المناک سڑک حادثے میں کم از کم 9 افراد ہلاک،  جب کہ 10 سے زائد افراد زخمی ہو گئے۔ یہ حادثہ اس وقت پیش آیا جب ایک مہندرا پک اپ گاڑی اور ایک ٹرک کے درمیان شدید تصادم ہوا۔ حادثے کے بعد علاقے میں کہرام مچ گیا اور جاں بحق افراد کے اہل خانہ غم سے نڈھال ہو گئے۔پولیس کے مطابق حادثہ فیروزپور-فضلکہ روڈ پر جنگا والا موڑ کے قریب حسین شاہ والا گاؤں کے نزدیک پیش آیا۔ اطلاع ملتے ہی مقامی پولیس، امدادی ٹیمیں اور ضلع کے سینئر پولیس سپرنٹنڈنٹ (ایس ایس پی) موقع پر پہنچ گئے اور امدادی کارروائیاں شروع کیں۔ مقامی افراد کی مدد سے زخمیوں کو فوری طور پر فیروزپور کے سول اسپتال منتقل کیا گیا، جہاں متعدد زخمیوں کی حالت تشویشناک بتائی جا رہی ہے۔

#WATCH | Punjab: Nine people died on the spot and about 15 injured in a collision between a truck and jeep in Ferozepore. They were going to immerse the ashes of a member of their family when the accident took place. pic.twitter.com/VOoINSrAdu

— ANI (@ANI) June 6, 2026

ابتدائی تحقیقات کے مطابق حادثے کا شکار ہونے والے افراد ایک بزرگ خاتون کی آخری رسومات ادا کرنے کے بعد واپس جا رہے تھے۔ بتایا گیا ہے کہ ایک ہی خاندان اور ان کے رشتہ داروں سمیت تقریباً 25 سے 28 افراد جلّال آباد سے مہندرا پک اپ گاڑی میں سوار ہو کر امرتسر جا رہے تھے، جہاں انہیں آخری رسومات سے متعلق مذہبی رسم ادا کرنی تھی۔ راستے میں جنگا والا موڑ کے قریب ان کی گاڑی ایک تیز رفتار ٹرک سے ٹکرا گئی۔عینی شاہدین کے مطابق تصادم اس قدر شدید تھا کہ پک اپ گاڑی مکمل طور پر تباہ ہو گئی اور سڑک کنارے الٹ کر جا گری۔ حادثے کے فوراً بعد اردگرد کے دیہات کے لوگ موقع پر پہنچ گئے اور زخمیوں کو گاڑی سے نکالنے میں مدد کی۔ کئی افراد گاڑی کے ملبے میں پھنس گئے تھے جنہیں بڑی مشکل سے باہر نکالا گیا۔

اس دلخراش حادثے میں 9 افراد موقع پر ہی یا اسپتال پہنچنے سے قبل دم توڑ گئے، جبکہ 10 سے زائد زخمیوں کو طبی امداد فراہم کی جا رہی ہے۔ شدید زخمی افراد کو بہتر علاج کے لیے فرید کوٹ کے گرو گوبند سنگھ میڈیکل کالج و اسپتال ریفر کر دیا گیا ہے۔حادثے کی خبر ملتے ہی جاں بحق افراد کے اہل خانہ اسپتال پہنچ گئے، جہاں رقت آمیز مناظر دیکھنے کو ملے۔ لواحقین اپنے پیاروں کی موت پر آبدیدہ نظر آئے اور اسپتال میں غم و اندوہ کی فضا چھا گئی۔پولیس نے حادثے کی وجوہات جاننے کے لیے تحقیقات شروع کر دی ہیں۔ حکام یہ معلوم کرنے کی کوشش کر رہے ہیں کہ آیا حادثہ تیز رفتاری، لاپروائی یا سڑک کی خراب حالت کے باعث پیش آیا۔مقامی لوگوں کا کہنا ہے کہ فیروزپور-فضلکہ روڈ پر ماضی میں بھی متعدد سنگین حادثات رونما ہو چکے ہیں جن میں کئی قیمتی جانیں ضائع ہوئی ہیں۔ شہریوں نے حکومت سے مطالبہ کیا ہے کہ سڑک کو فوری طور پر کشادہ اور محفوظ بنایا جائے تاکہ مستقبل میں ایسے المناک واقعات سے بچا جا سکے۔ اس تازہ حادثے نے ایک بار پھر سڑکوں کی حفاظت اور ٹریفک انتظامات پر سوالات کھڑے کر دیے ہیں۔

بھارت ایکسپریس اردو