لوک سبھا انتخابات کے نتائج کی گنتی سے پہلے کانگریس نے انڈیا اتحاد کے اپنے تمام اتحادیوں سے ایک اہم اپیل کی ہے۔ کانگریس کی جانب سے اتحاد کے تمام سینئر لیڈروں کو کل رات یا پرسوں تک دہلی میں رہنے کو کہا گیا ہے۔کانگریس کے ذرائع نے بتایا کہ مغربی بنگال کی وزیر اعلیٰ ممتا بنرجی نے بھی اس پر مثبت موقف اپنایا ہے۔ اجلاس انتخابی نتائج کے بعد ہوگا۔ اگر نشستوں کی تعداد توقعات اور اندازوں کے مطابق نہیں آئی تو پھر مظاہرہ،پریس کانفرنس،صدر ہند سے ملاقات سمیت دیگر آپشنز پر بات کی جائے گی، جہاں الیکشن کمیشن کے کردار پر سوالات اٹھائے جا سکتے ہیں۔
سینئر شیو سینا (یو بی ٹی) کے رہنما سنجے راوت نے کہا کہ اپوزیشن 4 جون کو لوک سبھا انتخابات 2024 کے نتائج میں اکثریت حاصل کرنے کے 24 گھنٹوں کے اندر اپنے وزیر اعظم کے امیدوار کا اعلان کرے گا۔ میڈیا سے بات کرتے ہوئے سنجے راوت نے کہا کہ ہمارے پاس وزیر اعظم کے عہدے کے لیے بہت سے امیدوار ہیں لیکن بی جے پی کا کیا ہوگا؟ انڈیا اتحاد نتائج کے اعلان کے 24 گھنٹوں کے اندر اپنے وزیر اعظم کے امیدوار کا اعلان کرے گا۔
اس سے پہلے چیف الیکشن کمشنر (سی ای سی) راجیو کمار نے کہا، ‘ہم پر جھوٹے الزامات لگائے گئے۔ لیکن اس دوران ملک میں ووٹ ڈالنے کا عالمی ریکارڈ بنا۔ یہ ہماری جمہوریت کی مضبوطی ہے۔راجیو کمار نے کہا کہ ‘ہم نے فرضی خبروں کو روکا، لیکن خود پر حملے نہیں روک سکے۔’ کانگریس لیڈر جے رام رمیش کے الزامات کا جواب دیتے ہوئے انہوں نے کہا- حکیم لقمان کے پاس بھی شک کا حل نہیں تھا۔ کانگریس لیڈر نے ہفتہ کو کہا تھا – شاہ نے 150 کلکٹروں کو دھمکی دی ہے۔ پہلی بار پولنگ کے بعد تشدد کو روکنے کے لیے حساس مقامات پر نیم فوجی دستوں کو تعینات کرنے کا فیصلہ کیا گیا ہے۔ یہ فورسز آندھرا پردیش اور مغربی بنگال جیسے مقامات پر پولنگ کے بعد تشدد کو روکیں گی۔الیکشن کمشنر نے کہا کہ ‘ہم نے سوچا تھا کہ ہم پر زیادہ تر حملے باہر سے ہوں گے، لیکن ہم پر ملک کے اندر سے الزامات لگائے گئے۔
بھارت ایکسپریس۔
