ہریانہ میں بی جے پی امیدوار کول جیت سنگھ اجرانا نے پارٹی کا ٹکٹ لوٹا دیا ہے۔
Haryana Assembly Election 2024: ہریانہ اسمبلی الیکشن 2024 میں پیہووا سے بی جے پی امیدوارکول جیت سنگھ اجرانا نے الیکشن لڑنے سے انکار کرتے ہوئے پارٹی کا ٹکٹ واپس کردیا ہے۔ کول جیت سنگھ اجرانا کوسابق وزیرسندیپ سنگھ کا ٹکٹ کاٹ کر پیہووا سے میدان میں اتارا گیا تھا۔ مانا جا رہا ہے کہ بی جے پی میں مقامی سطح پرمخالفت سے مایوس ہوکرانہوں نے الیکشن لڑنے سے انکار کردیا ہے۔ انتخابی تشہیر کے دوران انہیں خوب مخالفت کا سامنا کرنا پڑا تھا۔
سال 2019 میں ہوئے اسمبلی الیکشن میں بی جے پی پیہہووا سیٹ سے سابق ہندوستانی ہاکی کپتان سندیپ سنگھ کو میدان میں اتارا تھا۔ کانگریس کے مندیپ سنگھ چٹّا کو انہوں نے 5314 ووٹوں سے ہرا دیا تھا۔ بی جے پی کی حکومت بننے پرانہیں وزیرکھیل بنایا گیا تھا، لیکن گزشتہ سال ایک جونیئرخاتون کوچ نے ان پر جنسی استحصال کا الزام عائد کیا تھا، جس کے بعد محکمہ کھیل سندیپ سنگھ سے واپس لے لیا گیا تھا۔ جنسی استحصال کے الزام کے سبب ہی پارٹی نے اہیں اس بارٹکٹ نہیں دیا۔ ان کی جگہ پرکول جیت سنگھ اجرانا کو ٹکٹ دیا تھا۔
واضح رہے کہ بی جے پی کے ٹکٹ پرسندیپ سنگھ ہی جیت درج کرپائے تھے۔ ان سے پہلے 2005 اور 2009 میں کانگریس پارٹی کے ہرموہندرسنگھ نے جیت درج کی تھی۔ وہیں، 2014 میں بھی کانگریس کے ہی امیدوار جسویندرسنگھ نے جیت درج کی تھی۔
پاکستانی آرمی کے ساتھ وائرل ہوئی تھی تصویر
کول جیت سنگھ اجرانا کی پاکستان آرمی کے ساتھ تصویر بھی وائرل ہوئی تھی، جس میں وہ پاکستانی افسران کے ہاتھ سے مٹھائی کھاتے ہوئے نظرآئے۔ اس کے علاوہ آرمی جوانوں کے ساتھ تصویر بھی کھنچوا رہے تھے، جس سے متعلق لوگ ان کی مخالفت کررہے تھے۔ کول جیت سنگھ نے ہریانہ کے پارٹی صدر کو خط لکھ کر کہا ہے کہ وہ پیہووا اسمبلی سیٹ سے ٹکٹ دے کرپارٹی نے جو عزت افزائی کی، میں اس کے لئے پارٹی کا تہہ دل سے شکر گزار ہوں، لیکن پارٹی کے کچھ سینئرلیڈران اور کارکنان میری پرچہ نامزدگی کی مخالفت کر رہے ہیں۔ ان کے جذبات کا احترام کرتے ہوئے اپنا ٹکٹ واپس کرتا ہوں۔
بھارت ایکسپریس–
