Amit Shah addressed a rally in Mahua: مرکزی وزیر داخلہ امت شاہ نے لالو پرساد یادو پر کی تنقید، کہا — ’’لالو کے دور میں بہار میں صرف گھوٹالے اور قتل عام ہوئے‘‘

ویشالی: مرکزی وزیر داخلہ امت شاہ نے اتوار کو بہار کے ضلع ویشالی کے مہوا میں انتخابی ریلی سے خطاب کرتے ہوئے آر جے ڈی کے سربراہ لالو پرساد یادو پر زبردست نشانہ سادھا۔ انہوں نے کہا: ’’لالو یادو نے اگر بہار میں کچھ کیا ہے تو وہ صرف گھوٹالے ہیں۔ چارا گھوٹالا، نوکری کے بدلے زمین گھوٹالا، تارکول گھوٹالا اور سیلاب راحت گھوٹالا۔‘‘

جنگل راج کو دوبارہ نہیں آنے دینا ہے

امت شاہ نے مہوا کے ووٹروں سے اپیل کی کہ یہ الیکشن صرف کسی کو ایم ایل اے بنانے کا نہیں ہے بلکہ  لالو–رابڑی کے جنگل راج کو دوبارہ لوٹنے سے روکنے کا ہے۔ انہوں نے کہا: ’’لالو–رابڑی کے دور میں بہار میں روز قتل عام ہوتے تھے، اغوا اور تاوان کا دھندہ چلتا تھا اور خواتین کی عزت محفوظ نہیں تھی۔ اب وہی جنگل راج نئے کپڑے اور نئے بھیس میں واپس آ رہا ہے، اس لیے آپ کو اسے روکنا ہے اور وزیرِ اعظم مودی کے ہاتھ مضبوط کرنے ہیں۔‘‘

ویشالی نے دنیا کوجمہوریت کا پیغام دیا

امت شاہ نے کہا کہ ویشالی وہ سرزمین ہے جس نے دنیا کو سب سے پہلے لچّھوی جمہوریہ کے ذریعہ جمہوریت کے اصولوں سے روشناس کرایا۔ یہ وہ مقدس زمین ہے جہاں بھگوان مہاویر اور بھگوان بدھ نے کرم کیے۔ انہوں نے وعدہ کیا کہ اگر عوام این ڈی اے کو اقتدار میں لائیں تو ایک کروڑ نوجوانوں کو سرکاری نوکریاں اور روزگار دیے جائیں گے، 100 ایم ایس ایم ای پارک اور 50 ہزار چھوٹے صنعتی مراکز قائم کیے جائیں گے، زراعت اور انفراسٹرکچر کے لیے ایک لاکھ کروڑ روپے کی سرمایہ کاری کی جائے گی۔

بڑا صنعتی پارک اور میڈیکل کالج کی سوغات

وزیرِ داخلہ نے کہا کہ حکومت نے 1243 ایکڑ زمین پر ایک بڑا صنعتی پارک بنانے کا فیصلہ کیا ہے جس سے ہزاروں لوگوں کو روزگار ملے گا۔ اسی طرح 670 کروڑ روپے سے حاجی پور–مظفرپور قومی شاہراہ تعمیر کی گئی ہے اور 1000 کروڑ روپے کی لاگت سے ویشالی میں ایک بڑا صنعتی علاقہ قائم کیا گیا ہے  جس میں جلد ہی لاکھوں کروڑ روپے کی سرمایہ کاری آئے گی۔ انہوں نے یہ بھی بتایا کہ مہوا میں ایک نیا میڈیکل کالج جلد ہی شروع ہونے والا ہے۔

85 لاکھ کسانوں کو 9 ہزار روپے سالانہ

امت شاہ نے این ڈی اے حکومت کی کامیابیاں گنواتے ہوئے کہا: ’’بہار کے 8 کروڑ 52 لاکھ غریبوں کو ہر مہینے 5 کلو اناج مفت دیا جا رہا ہے۔ 85 لاکھ کسانوں کو پی ایم کسان سمان نِدھی کے تحت ہر سال 6 ہزار روپے مل رہے ہیں اور اب ہم اسے بڑھا کر 9 ہزار روپے کرنے جا رہے ہیں۔‘‘ آخر میں انہوں نے کہا کہ وزیرِ اعظم مودی نے ملک کو محفوظ اور خوشحال بنایا ہے اور وہ ہمیشہ غریبوں کی فلاح و بہبود کے لیے کام کرتے رہے ہیں۔

بھارت ایکسپریس اردو۔