بی جے پی نے جموں وکشمیر سے چودھری روشن حسین گجر کو امیدوار بنایا ہے۔
Jammu Kashmir Assembly Election 2024: جموں وکشمیر اسمبلی الیکشن کے لئے بی جے پی نے 15 امیدواروں کی پہلی فہرست جاری کی۔ اب بی جے پی کی طرف سے دوسری فہرست جاری کی گئی ہے۔ بی جے پی نے کوکرناگ سیٹ سے چودھری روشن حسین کو ٹکٹ دیا ہے۔ دوسری فہرست میں صرف ایک ہی امیدوارکوٹکٹ دیا گیا ہے، جس سیٹ سے امیدواراتارا گیا ہے، وہ درج فہرست ذات کے لئے ریزرو(مختص) ہے۔ اس طرح ابھی تک 16 امیدواروں کے ناموں کا اعلان ہوچکا ہے۔ فہرست میں کچھ لوگوں کے نام نہیں ہونے کی وجہ سے اختلاف کی بات بھی سامنے آئی ہے۔
حالانکہ مرکزکے زیرانتظام ریاست کے بی جے پی صدررویندررینا نے فہرست جاری ہونے کے بعد ان افواہوں کو خارج کردیا۔ رویندررینا نے کہا کہ پارٹی میں نئے اورپرانے لوگ سب مل کرکام کرتے ہیں۔ یہ فرق نہیں پڑتا ہے کہ کس کا نام آیا ہے اورکس کا نہیں۔ کچھ لڑتے ہیں اورکچھ لوگ مل کرلڑواتے ہیں۔ بی جے پی ایک فیملی ہے۔ انہوں نے کہا کہ پارٹی نے امیدوارکا اعلان کیا ہے۔ پہلے مرحلے کی نامزدگی کرنے کی تاریخ 27 اگست ہے۔ کشمیرکی کچھ سیٹوں پرجیتنے والے امیدوارکے ساتھ ہماری بات چیت چل رہی ہے۔
BJP releases second list of 1 candidate for upcoming J&K Assembly elections.
Choudhary Roshan Hussain Gujjar to contest from Konkernag. pic.twitter.com/gSmq7mWIAI
— ANI (@ANI) August 26, 2024
بی جے پی نے پہلے 44 امیدواروں کی فہرست جاری کی
دراصل، وزیراعظم نریندرمودی کی موجودگی میں اتوار(25 اگست) کو دہلی میں بی جے پی کی سینٹرل الیکشن کمیٹی کی میٹنگ ہوئی۔ اس میں بی جے پی صدرجے پی نڈا اوروزیرداخلہ امت شاہ نے بھی حصہ لیا۔ میٹنگ میں امیدواروں کے ناموں پرغوروخوض کے بعد امیدواروں کی پہلی فہرست کوآخری شکل دی گئی۔ یہاں غورکرنے والی بات یہ ہے کہ پہلے بی جے پی نے 44 امیدواروں کی فہرست جاری کی، لیکن پھراسے واپس لے لیا گیا اورازسرنو 15 امیدواروں کی پہلی فہرست جاری کی گئی۔
جموں وکشمیر میں پہلے مرحلے میں جنوبی کشمیر کے 16 اسمبلی حلقوں اورجموں علاقے کے 8 اسمبلی حلقوں میں ووٹنگ ہوگی۔ 90 رکنی اسمبلی کے لئے الیکشن کے پہلے مرحلے کے تحت 18 ستمبر، دوسرے مرحلے کے تحت 25 ستمبراورتیسرے اورآخری مرحلے کے تحت یکم اکتوبرکوووٹنگ ہوگی۔ ووٹوں کی گنتی 4 اکتوبرکوکی جائے گی۔
بھارت ایکسپریس–
