ووٹنگ سے 1 دن پہلے پول ڈیوٹی میں مصروف گاڑی حادثہ کا شکار، 2 افراد ہلاک
Jammu and Kashmir: جموں و کشمیر میں منگل 24 ستمبر کو ایک بڑا حادثہ پیش آیا۔ یہاں ریاسی میں الیکشن ڈیوٹی میں مصروف ایک گاڑی کو حادثہ پیش آیا۔ اس حادثے میں دو ملازمین کی موت ہو گئی۔ جبکہ ایک ملازم زخمی ہوگیا۔ ڈی سی ریاسی کے مطابق، “جموں و کشمیر کے ریاسی کے گلاب گڑھ علاقے میں ٹکسن کے قریب الیکشن ڈیوٹی گاڑی کے حادثے کا شکار ہونے کے بعد دو افراد کی موت ہو گئی اور ایک زخمی ہو گیا۔”
25 ستمبر کو ہونی ہے دوسرے مرحلے کی ووٹنگ
قابل ذکر ہے کہ جموں و کشمیر کے چھ اضلاع کی 26 اسمبلی سیٹوں کے لیے اسمبلی انتخابات کے دوسرے مرحلے میں 25 ستمبر کو ووٹ ڈالے جائیں گے۔ جن نشستوں پر انتخابات ہوں گے ان میں کنگن (ایس ٹی)، گندیربل، حضرت بل، خانیار، حبّاکدل، لال چوک، چنا پورہ، جدیبل، عیدگاہ، سنٹرل شالٹینگ، بڈگام، بیرواہ، خان صاحب، چرارِ شریف، چڈورہ اور گلاب گڑھ (ایس ٹی) شامل ہیں۔ اس کے علاوہ ریاسی، شری ماتا ویشنو دیوی، کالاکوٹ سندر بنی، نوشہرہ، راجوری (ایس ٹی)، بدھل (ایس ٹی)، تھنامنڈی (ایس ٹی)، سورنکوٹ (ایس ٹی)، پونچھ حویلی اور مینڈھر (ایس ٹی) نشستوں پر بھی ووٹنگ ہوگی۔
کیا تھا انتخابات کے پہلے مرحلے میں ووٹنگ کا فیصد؟
جموں و کشمیر اسمبلی انتخابات کے پہلے مرحلے میں 18 ستمبر کو 7 اضلاع کی 24 اسمبلی سیٹوں پر ووٹنگ ہوئی۔ اس دوران ووٹنگ کا تناسب 58.85 تھا الیکشن کمیشن کے مطابق سب سے زیادہ ووٹنگ کشتواڑ میں 77.23 فیصد اور سب سے کم ووٹنگ پلوامہ میں 46.03 فیصد رہی۔ ڈوڈا 69.33 فیصد کے ساتھ دوسرے نمبر پر، رامبن 67.71 فیصد کے ساتھ تیسرے نمبر پر تھا۔
تیسرے مرحلے کے لیے ووٹنگ یکم اکتوبر کو ہونی ہے۔ اس مرحلے میں 40 اسمبلی سیٹیں شامل ہیں۔ تیسرے مرحلے میں جموں، کٹھوعہ، سانبہ، ادھم پور، بارہمولہ، کپواڑہ اور بانڈی پور اضلاع شامل ہیں۔ جموں و کشمیر اسمبلی انتخابات کے نتائج کا اعلان 8 اکتوبر کو کیا جائے گا۔ قابل ذکر ہے کہ وادی میں 2014 کے بعد پہلی بار اسمبلی انتخابات ہو رہے ہیں۔
-بھارت ایکسپریس
