جمعیۃ علماء ہند کے صدر مولانا سید ارشد مدنی۔ (فائل فوٹو)
نئی دہلی: جمعیۃ علماء ہند کے صدر مولانا ارشد مدنی نے فلم ’ادے پور فائلز‘ کے حوالے سے سپریم کورٹ میں حلف نامہ داخل کیا ہے۔ انہوں نے فلم پر اعتراض کرتے ہوئے کہا کہ اس میں ہندوستانی مسلمانوں کو دہشت گردی کے حامیوں کے طور پر دکھایا گیا ہے جس سے فرقہ وارانہ عداوت کو فروغ مل سکتا ہے۔ مدنی نے دعویٰ کیا کہ فلم میں مبینہ طور پر ہندوستانی مسلمانوں کو پاکستانی دہشت گردوں کے ساتھ ہمدردی یا ان کے کہنے پر کام کرتے دکھایا گیا ہے۔ انہوں نے اسے بدنیتی پر مبنی اور فرقہ وارانہ ہم آہنگی کے لیے خطرہ قرار دیا اور وزارت اطلاعات و نشریات کی طرف سے تشکیل دی گئی اسکریننگ کمیٹی کے حکم پر بھی سوال اٹھایا۔
جمعیت نے پرائیویٹ اسکریننگ کرانے کا کیا مطالبہ
انہوں نے کہا کہ وزارت ان کے اعتراضات کو دور کرنے میں ناکام رہی اور صرف کمیٹی کی رپورٹ پر بھروسہ کیا۔ کمیٹی نے فلم میں صرف چھ معمولی تبدیلیاں تجویز کیں جو ان کے مطابق ناکافی ہیں۔ مدنی نے الزام لگایا کہ حکومت نے سینسر بورڈ (سی بی ایف سی) کے ارکان کو ہی اسکریننگ کمیٹی میں شامل کیا ہے، جبکہ جمعیت نے سنسر بورڈ کے سرٹیفکیٹ کو ہی چیلنج کیا ہے۔ یہ مفادات کے ٹکراؤ کا معاملہ ہے۔ انہوں نے کہا کہ حکومت کو ایسی کمیٹی نہیں بنانا چاہئے تھی۔ جمعیت نے سپریم کورٹ سے مطالبہ کیا ہے کہ فلم بنانے والوں کو ہدایت دی جائے کہ وہ ایک پرائیویٹ اسکریننگ منعقد کریں تاکہ عدالت میں سماعت کرنے والے جج فلم کے مواد اور ارادے کو سمجھ سکیں۔
معاملے میں سپریم کورٹ میں جاری ہے سماعت
مولانا ارشد مدنی کا کہنا ہے کہ یہ فلم نہ صرف ہندوستان اور پاکستان کے معاملے پر مرکوز ہے بلکہ اس میں ہندوستانی مسلمانوں کو غلط طریقے سے پیش کیا گیا ہے جس سے ملک میں فرقہ وارانہ کشیدگی بڑھ سکتی ہے۔ اس معاملے میں سپریم کورٹ میں سماعت جاری ہے۔
کنہیا کے قتل کے حقیقی واقعے سے متاثر ہے فلم
فلم ’ادے پور فائلز‘ ایک آنے والی ہندی کرائم تھرلر فلم ہے جو 28 جون 2022 کو ادے پور میں کنہیا لال ساہو کے قتل کے حقیقی واقعے سے متاثر ہے۔ بھارت ایس سری ناتھ اور جینت سنہا کی ہدایت کاری میں بننے والی اس فلم میں وجے راج، رجنیش دگل اور پریتی جھنگیانی مرکزی کردار ادا کر رہے ہیں۔ فلم میں درزی کنہیا لال کے قتل، اس کے بعد کی سماجی و سیاسی خاموشی اور انصاف کی لڑائی کو دکھایا گیا ہے۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
