ہندوستان اور پاکستان نے جمعہ کو جموں و کشمیر کے پونچھ ضلع میں لائن آف کنٹرول (ایل او سی) پر سرحد پار سے فائرنگ اور آئی ای ڈی حملوں کے حالیہ واقعات کے بعد کشیدگی کو کم کرنے کی کوشش میں ‘فلیگ میٹنگ’ کی ہے۔ اس ملاقات میں دونوں فریقوں نے سرحد پر امن برقرار رکھنے پر بات کی۔آرکلیم نے ذرائع کے حوالے سے بتایا کہ بریگیڈ کمانڈر کی سطح کی ‘فلیگ میٹنگ’ ‘چکن دا باغ کراسنگ پوائنٹ’ کے علاقے میں ہوئی، جس میں دونوں اطراف نے سرحد پر امن برقرار رکھنے کی ضرورت پر زور دیا۔ انہوں نے کہا کہ 75 منٹ تک جاری رہنے والی ملاقات تقریباً 11 بجے شروع ہوئی۔آر کلیم نے ذرائع کے حوالے سے بتایا کہ ملاقات خوشگوار ماحول میں ہوئی اور دونوں فریقوں نے سرحد پر امن کے وسیع تر مفاد میں جنگ بندی معاہدے کا احترام کرنے پر اتفاق کیا۔ 25 فروری 2021 کو ہندوستان اور پاکستان کے جنگ بندی معاہدے کی تجدید کے بعد سے جموں و کشمیر کی سرحدوں پر جنگ بندی کی خلاف ورزیوں کے واقعات میں کمی آئی ہے۔
واضح رہے کہ ہندوستان اور پاکستان کی فوجوں نے 2021 میں جنگ بندی کا اعلان کیا تھا۔ اس جنگ بندی کے بعد سرحد پر کشیدگی کافی حد تک کم ہو گئی۔ تاہم حالیہ دنوں میں کچھ تشویشناک واقعات رونما ہوئے ہیں۔ 11 فروری کو لائن آف کنٹرول کے اکھنور سیکٹر میں ہندوستانی فوج کے دو جوانوں کی شہادت کے علاوہ پونچھ اور راجوری اضلاع میں لائن آف کنٹرول کے پار پاکستان کی فائرنگ سے دو دیگر فوجی زخمی ہوئے تھے۔ پونچھ سیکٹر میں سرحد پار سے ہونے والی فائرنگ کا بھارتی فوج نے منہ توڑ جواب دیا۔ اطلاعات کے مطابق پاکستانی جانب سے بھی کچھ جانی نقصان ہوا ہے۔
فوج اور سیکورٹی فورسز ایل او سی کے ساتھ اور اندرونی علاقوں میں سخت چوکسی برقرار رکھی ہوئی ہیں کیونکہ جموں و کشمیر میں کم برف باری کی وجہ سے اس موسم سرما میں دراندازی کے روایتی راستے کھلے ہوتے ہیں۔ حالیہ دنوں مرکزی وزیر داخلہ امت شاہ نے جموں و کشمیر پر دو سیکورٹی جائزہ میٹنگوں کی صدارت کی ہے۔ ان ملاقاتوں کے دوران انہوں نے سیکورٹی فورسز کو دہشت گردوں کے خلاف زیرو دراندازی اور زیرو ٹالرنس کو یقینی بنانے کا حکم دیا۔ لیفٹیننٹ گورنر منوج سنہا نے بھی حال میں دو سیکورٹی میٹنگوں کی صدارت کی، ایک سری نگر اور دوسری جموں میں۔ لیفٹیننٹ گورنر نے پولیس اور سیکورٹی فورسز سے کہا کہ وہ دہشت گردوں، ان کے اوور گراؤنڈ ورکرزاور حامیوں کو نشانہ بنا کر دہشت گردی کے نیٹ ورک کو ختم کریں۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
