Sakshee Malikkh on Vinesh and Bajrang Punia joining politics: ’’میں الیکشن نہیں لڑ رہی اور نہ ہی کسی سیاسی جماعت میں شامل ہوں…‘‘، ساکشی ملک نے ونیش پھوگاٹ اور بجرنگ پونیا کے متعلق کہہ دی بڑی بات

نئی دہلی: پہلوان ونیش پھوگاٹ اور بجرنگ پونیا نے جمعہ کے روز کانگریس پارٹی میں شمولیت اختیار کی۔ مانا جا رہا ہے کہ وہ کانگریس کے ٹکٹ پر ہریانہ میں اسمبلی الیکشن لڑیں گے۔ ایسے میں قیاس آرائیاں کی جا رہی تھیں کہ اب ساکشی ملک بھی سیاست میں آ سکتی ہیں۔ لیکن، انہوں نے خود اس پر خاموشی توڑ دی ہے۔ ساکشی ملک نے واضح کر دیا ہے کہ وہ الیکشن نہیں لڑ رہی ہیں اور نہ ہی کسی پارٹی میں شامل ہو رہی ہیں۔ اس کے ساتھ ہی انہوں نے ونیش پھوگاٹ اور بجرنگ پونیا کو کانگریس میں شامل ہونے پر مبارکباد دی۔

ساکشی ملک نے سوشل میڈیا پلیٹ فارم پر لکھا میری پوری توجہ اس وقت کھیلوں میں ہندوستان کو نمبر 1 بنانے پر مرکوز ہے۔ میرا خواب ہے کہ میرے ملک کو کم از کم 50 اولمپک تمغے ملیں۔ اس ملک نے مجھے بہت کچھ دیا ہے اور یہ زندگی ملک کے نام ہے۔ میں ملک بھر کے بچوں کو کھیلوں کی مفت تربیت دینے اور ریسلنگ کو ہر گھر تک پہنچانے کے مشن میں مصروف رہوں گی۔ میں اس بات کو یقینی بنانے کے لیے کام کروں گی کہ ہر شہر میں کھیلوں کی اچھی سہولیات ہوں۔ انہوں نے مزید لکھا، “بجرنگ اور ونیش کا سیاست میں جانا ان کا ذاتی فیصلہ ہے۔ اس کے لیے میری نیک خواہشات۔‘‘

सभी मीडिया के साथियों को सूचित करना चाहती हूँ कि मैं चुनाव नहीं लड़ रही हूँ, ना ही मैं किसी राजनीतिक दल में शामिल हूँ।

मेरा पूरा फोकस इस समय Sports में भारत को Number 1 बनाने पर है।
मेरा सपना है मेरे देश को कम से कम 50 Olympics मेडल मिलें। मुझे इस देश ने बहुत कुछ दिया है और ये…

— Sakshee Malikkh (@SakshiMalik) September 6, 2024

بتا دیں کہ ہریانہ کی 90 اسمبلی سیٹوں پر 5 اکتوبر کو ووٹنگ ہونی ہے۔ ساتھ ہی انتخابات کے نتائج کا اعلان 8 اکتوبر کو کیا جائے گا۔ اس وقت ریاست میں بھارتیہ جنتا پارٹی (بی جے پی) کی حکومت ہے۔ ریاست کے وزیر اعلیٰ نائب سنگھ سینی ہیں۔ وہیں،2019 کے اسمبلی نتائج کی بات کریں تو 90 سیٹوں میں سے بھارتیہ جنتا پارٹی نے 40 سیٹیں جیتی تھیں۔ وہیں کانگریس کو 31 اور جے جے پی کو 10 سیٹیں ملی تھیں۔ جبکہ 9 سیٹیں دیگر نے جیتی ہیں۔

بھارت ایکسپریس۔