PM Modi Warns Fugitives misusing democratic freedoms: ’’جمہوری آزادیوں کا غلط استعمال کرنے والوں کو بنایا جائے گا جواب دہ‘‘، پی ایم مودی نے برطانیہ میں مقیم مفرور ہندوستانی مجرمین کی حوالگی پر کی بات

وزیر اعظم نریندر مودی نے جمعرات کے روز کہا کہ جمہوری آزادیوں کا غلط استعمال کرتے ہوئے جمہوریت کو کمزور کرنے والے عناصر کو جواب دہ بنایا جائے گا۔ انھوں نے یہ بات برطانوی وزیر اعظم کیر اسٹارمر کے ساتھ ایک مشترکہ پریس کانفرنس کے دوران کہی، جو ہندوستان اور برطانیہ کے درمیان جامع اقتصادی و تجارتی معاہدہ (CETA) پر دستخط کے بعد منعقد ہوئی۔

وزیر اعظم مودی نے کہا کہ ’’ہم دہشت گردی کے خلاف جنگ میں دہری پالیسیوں کے لیے کوئی جگہ نہیں مانتے۔ وہ عناصر جو انتہاپسند نظریات کی وکالت کرتے ہیں، انھیں جمہوری آزادیوں کا غلط استعمال نہیں کرنے دینا چاہیے۔ ایسے افراد کو، جو جمہوریت کو ہی کمزور کرنے کی کوشش کرتے ہیں، قانون کے کٹہرے میں لانا ضروری ہے۔‘‘ انھوں نے بتایا کہ دونوں ممالک کی سیکیورٹی ایجنسیاں معاشی مجرموں کی حوالگی کے معاملات پر باہمی تعاون کو مزید مستحکم کریں گی۔ واضح رہے کہ حکومت ہند اس وقت برطانیہ میں مقیم تین اہم مفروروں—للت مودی، نیرو مودی اور وجے مالیا—کی حوالگی کے لیے برطانیہ سے بات چیت کر رہی ہے۔ تینوں افراد بھارت میں مختلف مالیاتی دھوکہ دہی کے کیسز میں مطلوب ہیں اور اس وقت لندن میں پناہ لیے ہوئے ہیں۔

آج کا دور ترقی کا ہے، توسیع پسندی کا نہیں: پی ایم مودی

اس موقع پر وزیر اعظم مودی نے عالمی سطح پر جاری کشیدگیوں پر بھی بات کی، جن میں یوکرین-روس جنگ، اسرائیل-غزہ تنازع اور ہند و بحرالکاہل میں سیکیورٹی کے مسائل شامل ہیں۔ انھوں نے کہا ’’ہم امن و استحکام کی فوری بحالی کے حامی ہیں۔ خودمختاری اور علاقائی سالمیت کا احترام ناگزیر ہے۔ آج کا دور ترقی کا ہے، توسیع پسندی کا نہیں۔‘‘

قبل ازیں دن میں ہندوستان اور برطانیہ کے درمیان آزاد تجارتی معاہدے (FTA) پر دستخط کیے گئے۔ اس معاہدے سے ٹیکسٹائل، چمڑے، جوتے، زیورات، سمندری مصنوعات اور کھلونوں جیسے محنت کش شعبوں کو برآمدات کے وسیع مواقع حاصل ہوں گے۔ وزارت تجارت و صنعت کے مطابق، یہ معاہدہ بھارتی مصنوعات کو 99 فیصد ٹریڈ ویلیو پر زیرو ڈیوٹی رسائی فراہم کرے گا، جس سے برآمدات میں نمایاں اضافہ متوقع ہے۔

بھارت ایکسپریس اردو