کمیونسٹ پارٹی آف انڈیا (مارکسسٹ) نے ہفتے کے روز اعلان کیا ہے کہ وہ 8 اگست 2025 کو ملک بھر میں الیکشن کمیشن کی ’’خصوصی وسیع نظرثانی‘‘ (SIR) مہم کے خلاف احتجاج کرے گی۔ پارٹی نے الزام عائد کیا ہے کہ الیکشن کمیشن بھارتیہ جنتا پارٹی کے حق میں جانب دار ہو چکا ہے اور آر ایس ایس کے ایجنڈے پر عمل پیرا ہے۔
سی پی ایم کے پولٹ بیورو کی جانب سے جاری بیان میں کہا گیا کہ’’الیکشن کمیشن، جو اب تک بی جے پی حکومت کے حق میں کام کرتا آیا ہے، اب آر ایس ایس کے ایجنڈے پر عمل درآمد میں ملوث ہو چکا ہے۔ یہ جمہوری حقوق پر ایک سنگین حملہ ہے، جسے پورے ملک میں نافذ کرنے کی کوشش کی جا رہی ہے۔ اسے ہر صورت روکا جانا چاہیے۔‘‘ بیان میں مزید کہا گیا ہے کہ الیکشن کمیشن، ووٹر فہرستوں کی نظرثانی کے نام پر شہریت کی تصدیق جیسے اختیارات اپنے ہاتھ میں لے رہا ہے جو اس کے آئینی دائرۂ اختیار سے باہر ہیں۔
پارٹی نے دعویٰ کیا کہ ’’ غیر ملکیوں کو نکالنے کے نام پر اقلیتوں اور مخصوص گروہوں کو ووٹر فہرستوں سے خارج کیا جا رہا ہے، جو آئینی حق رائے دہی کی خلاف ورزی ہے۔‘‘ سی پی ایم نے خدشہ ظاہر کیا کہ یہ SIR مہم دراصل NRC جیسی مشق کو در پردہ نافذ کرنے کی کوشش ہے، جس کی ماضی میں بڑے پیمانے پر مخالفت ہو چکی ہے۔
حکومت قومی مفادات کو بالائے طاق رکھتے کر رہی ہے امریکہ اور یورپی یونین سے معاہدے: سی پی آئی (ایم)
علاوہ ازیں پارٹی نے بی جے پی حکومت پر الزام لگایا کہ وہ امریکہ اور یورپی یونین کے ساتھ تجارتی معاہدے ملک کے مفادات کو قربان کرتے ہوئے کر رہی ہے۔ بیان میں کہا گیا کہ’’حکومت کی عجلت میں کی گئی پالیسی سازی سے ڈیری، زراعت، دفاع، فارما اور مالیاتی شعبوں میں قومی خودمختاری کو خطرہ لاحق ہے۔‘‘ سی پی ایم نے مہاراشٹر میں پاس کیے گئے پبلک سیکیورٹی بل کو بھی جمہوری حقوق پر حملہ قرار دیا اور کہا کہ حکومت اختلافِ رائے کو دبانے کے لیے قوانین کو ہتھیار بنا رہی ہے۔
دریں اثنا پارٹی نے مطالبہ کیا کہ جموں و کشمیر کو فوری ریاستی حیثیت واپس دی جائے اور عوامی مینڈیٹ کا احترام کیا جائے۔ سی پی ایم نے آسام میں جبری انخلا، بنگالی بولنے والوں پر مبینہ حملوں اور شمال مشرق میں نسلی تقسیم کو ہوا دینے کے اقدامات کی بھی مذمت کی اور کہا کہ یہ سب اقدامات قومی اتحاد و سالمیت کے لیے نقصان دہ ہیں۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
