کانگریس نے جمعہ کو لوک سبھا انتخابات 2024 کے لیے اپنا منشور جاری کیا۔ 5 ’نیائے‘ اور 25 ’گارنٹی‘ پر مبنی اس منشور کو نیائے پترا کا نام دیا گیا ہے۔ لیکن اس منشور کے اعلان کے ساتھ ہی سیاسی بحث بھی چھڑ گئی ہے۔ بی جے پی اس معاملے پر مسلسل کانگریس کو گھیر رہی ہے۔اپنی ایک انتخابی ریلی کے دوران پی ایم مودی نے کہا کہ کانگریس کا منشور اسی سوچ کی عکاسی کرتا ہے جو تحریک آزادی کے دوران مسلم لیگ میں تھی۔ اب بی جے پی نے مسلم لیگ کے 1936 کے منشور اور کانگریس کے 2024 کے منشور کے تین نکات کا موازنہ کیا ہے۔
بی جے پی کے مطابق، ‘1936 میں مسلم لیگ نے اپنے منشور میں کہا تھا کہ وہ مسلمانوں کے لیے شرعی پرسنل لاز (ذاتی قوانین) کا تحفظ کرے گی۔ 2024 میں کانگریس نے بھی یہ کہا ہے کہ وہ فیصلہ کرے گی کہ اقلیتوں کے لیے انفرادی قوانین ہونے چاہئیں۔ 1936 میں مسلم لیگ نے کہا کہ وہ اکثریت پرستی کے خلاف لڑے گی۔ 2024 میں کانگریس نے کہا ہے کہ ہندوستان میں اکثریت پسندی کے لیے کوئی جگہ نہیں ہے۔ 1936 میں مسلم لیگ نے کہا تھا کہ ہم مسلمانوں کے لیے خصوصی وظائف اور نوکریوں کے لیے جدوجہد کریں گے۔ 2024 میں کانگریس نے کہا ہے کہ ہم اس بات کو یقینی بنائیں گے کہ مسلم طلباء کو بیرون ملک تعلیم حاصل کرنے کے لیے اسکالرشپ ملے۔
کانگریس کا جواب
کانگریس کی طرف سے بھی جوابی ردعمل سامنے آیا ہے۔ کانگریس کے صدر ملکارجن کھرگے نے کہا، ‘مودی شاہ کے سیاسی اور نظریاتی آباؤ اجداد نے آزادی کی جدوجہد میں ہندوستانیوں کے خلاف انگریزوں اور مسلم لیگ کا ساتھ دیا تھا۔ مودی شاہ کے نظریاتی آباؤ اجداد نے 1942 میں مہاتما گاندھی کی ‘ہندوستان چھوڑو’ کال کی مخالفت کی تھی۔ سب جانتے ہیں کہ سیاما پرساد مکھرجی نے کس طرح 1940 کی دہائی میں مسلم لیگ کے ساتھ اتحاد کر کے بنگال، سندھ اور این ڈبلیو ایف پی میں اپنی حکومتیں بنائیں۔
کھرگے نے کہا، “مودی جی کی تقریروں سے آر ایس ایس کی بو آتی ہے، بی جے پی کا انتخابی گراف دن بہ دن گرتا جا رہا ہے، اس لیے آر ایس ایس کو اپنے بہترین دوست مسلم لیگ کی یاد آنے لگی ہے! سچ یہ ہے کہ کانگریس کا انتخابی منشور 140 کروڑکی امیدوں اور امنگوں کی عکاسی کرتا ہے۔ ہندوستان کے کروڑوں لوگ، ان کی مشترکہ طاقت مودی جی کی 10 سال کی ناانصافی کو ختم کردے گی۔
نڈا نے کانگریس پر لگایا الزام
بی جے پی کے صدر جے پی نڈا نے کہا، ‘کانگریس کا منشور تقسیم کا بلیو پرنٹ ہے، جو جناح کے مسلم لیگ کے ایجنڈے کی واضح نقل ہے۔ قومی اتحاد پر خوشامد کی سیاست کو ترجیح دے کر کانگریس تقسیم کو برقرار رکھنا چاہتی ہے۔ بھارت اس طرح کی تقسیم کی سیاست کو پہلے بھی مسترد کر چکا ہے اور آئندہ بھی کرے گا۔ بی جے پی پولرائزیشن کے اس خطرناک راستے کے خلاف مضبوطی سے کھڑی ہے اور سب کے لیے شامل حکومت کے لیے پرعزم ہے۔
کانگریس نے منشور میں کیا کہا؟
کانگریس نے اپنے منشور میں اقلیتوں سے وعدہ کیا ہے کہ اگر موقع دیا گیا تو اس کی پارٹی آئین کے آرٹیکل 15، 16، 25، 26، 28، 29 اور 30 کے تحت مذہبی اقلیتوں کو دیئے گئے حقوق کا احترام کرے گی اور انہیں برقرار رکھے گی۔ کانگریس نے کہا ہے کہ وہ بیرون ملک تعلیم حاصل کرنے کے لیے مولانا آزاد اسکالرشپ کو دوبارہ نافذ کرے گی اور اسکالرشپ کی تعداد میں اضافہ کرے گی۔ اس کے علاوہ کانگریس نے کہا، ‘یہ یقینی بنائے گی کہ ہر شہری کی طرح اقلیتوں کو بھی لباس، خوراک، زبان اور ذاتی قوانین کی آزادی ہو۔ کانگریس ذاتی قوانین میں اصلاحات کو فروغ دے گی۔ یہ اصلاحات متعلقہ کمیونٹیز کی شرکت اور رضامندی سے کی جائیں گی۔
بھارت ایکسپریس۔
