نئی دہلی: وزیر اعظم نریندر مودی کی جانب سے توانائی کے تحفظ اور وسائل کے محتاط استعمال کی اپیل کے بعد اتراکھنڈ کے وزیر اعلیٰ پشکر سنگھ دھامی نے ایک اہم قدم اٹھاتے ہوئے اپنے سرکاری قافلے کو آدھا کر دیا ہے۔ وزیر اعلیٰ نے کہا کہ وزیر اعظم کی اپیل صرف بجلی، ایندھن اور وسائل کی بچت تک محدود نہیں بلکہ یہ ملک کو خود کفیل، ذمہ دار اور مضبوط بنانے کے قومی عزم کا حصہ ہے۔ پشکر سنگھ دھامی نے اپنے بیان میں کہا کہ جب قوم کا مفاد سب سے مقدم ہو تو ہر شہری، عوامی نمائندے اور سرکاری افسر کی ذمہ داری بنتی ہے کہ وہ وسائل کے تحفظ میں اپنا کردار ادا کرے۔ انہوں نے کہا کہ حکومت کا مقصد صرف اخراجات کم کرنا نہیں بلکہ عوام میں بیداری پیدا کرنا بھی ہے تاکہ توانائی کے استعمال میں احتیاط کو روزمرہ زندگی کا حصہ بنایا جا سکے۔
وزیر اعلیٰ نے تمام وزراء، عوامی نمائندوں اور سرکاری افسران سے بھی اپیل کی کہ وہ غیر ضروری گاڑیوں کے استعمال سے گریز کریں، عوامی ٹرانسپورٹ کو فروغ دیں اور توانائی بچت کی مہم کو عوامی تحریک بنانے میں فعال کردار ادا کریں۔ انہوں نے کہا کہ اتراکھنڈ حکومت وزیر اعظم کے پیغام کو پوری سنجیدگی اور عزم کے ساتھ نافذ کرے گی تاکہ وسائل کے تحفظ کے ساتھ ماحولیات کے تحفظ اور پائیدار ترقی کے اہداف بھی حاصل کیے جا سکیں۔
اس سے قبل وزیر اعظم نریندر مودی نے خود بھی اس مہم پر عمل کرتے ہوئے بدھ کے روز کابینہ اجلاس میں صرف چار گاڑیوں کے قافلے کے ساتھ پہنچ کر مثال قائم کی تھی۔ انہوں نے سرکاری استعمال میں الیکٹرک گاڑیوں کو ترجیح دینے پر بھی زور دیا۔ اطلاعات کے مطابق بی جے پی کے زیر اقتدار کئی ریاستوں کے وزرائے اعلیٰ نے بھی اپنے سرکاری قافلوں میں کمی کرنے کا فیصلہ کیا ہے۔
واضح رہے کہ وزیر اعظم مودی نے حیدرآباد کے سکندرآباد پریڈ گراؤنڈ میں ایک عوامی جلسے سے خطاب کرتے ہوئے عوام سے اپیل کی تھی کہ وہ اگلے ایک سال تک سونے کی خریداری کم کریں تاکہ غیر ملکی زرمبادلہ کی بچت کی جا سکے۔ انہوں نے ایندھن کے کم استعمال، میٹرو اور دیگر عوامی ٹرانسپورٹ کے زیادہ استعمال اور توانائی کے مؤثر تحفظ پر بھی زور دیا تھا۔ سیاسی مبصرین کا کہنا ہے کہ توانائی بچت سے متعلق یہ اقدامات حکومتی اخراجات میں کمی لائیں گے بلکہ عام شہریوں کو ذمہ دارانہ طرز زندگی اپنانے کا پیغام دیں گے۔ ماہرین کے مطابق اگر سرکاری سطح پر ایسے فیصلے بنیادوں پر جاری رہیں تو ملک میں ایندھن کی کھپت اور ماحولیاتی آلودگی میں کمی آسکتی ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
