بہار کی سیاست میں ایک بار پھر سیاسی بھونچال آنے کے امکانات گہرے ہو گئے ہیں۔ اس بار یہ طوفان راشٹریہ لوک مورچہ (آر ایل ایم) کے دروازے پر دستک دیتا دکھائی دے رہا ہے۔ آر ایل ایم کے صدر اُپیندر کشواہا نے اپنے رہائش گاہ پر لِٹّی–چوکّا ضیافت کا اہتمام کیا تھا۔ امید کی جا رہی تھی کہ اس ضیافت کے بہانے پارٹی کے تمام لیڈروں سے رسمی ملاقات ہو گی اور تنظیم کو مزید مضبوط کرنے پر بات چیت کی جائے گی، لیکن نتیجہ بالکل اس کے برعکس نکلا۔ اُپیندر کشواہا کے اس ضیافت میں انہی کی پارٹی کے تین اراکین اسمبلی—رامیشور مہتو، آلوک سنگھ اور مادھو آنند—شامل نہیں ہوئے، حالانکہ اس دوران وہ پٹنہ میں ہی موجود تھے۔اُپیندر کشواہا کی ضیافت میں ان کی ہی پارٹی کے تین اراکین اسمبلی کے غیر حاضر رہنے کی خبر سیاسی حلقوں میں جنگل کی آگ کی طرح پھیل گئی۔ یہ تینوں اراکینِ اسمبلی اُپیندر کشواہا سے ملنے کے بجائے دہلی روانہ ہو گئے، جہاں انہوں نے بی جے پی کے قومی ورکنگ صدر نتن نبین سے ملاقات کی۔ آر ایل ایم کے تینوں اراکینِ اسمبلی اور نتن نبین کے درمیان ہوئی یہ ملاقات بہار کی سیاست میں بحث کا مرکز بن گئی ہے۔ سیاسی تجزیہ کاروں کے درمیان بار بار یہی سوال اٹھ رہا ہے کہ کیا آر ایل ایم ٹوٹنے جا رہی ہے؟
یہ نوبت کیوں آئی؟
پارٹی کے اندر اس رسہ کشی کی جڑیں بہار میں نئی حکومت کی تشکیل کے بعد ہی مضبوط ہونے لگیں تھیں۔ پارٹی کے کئی اراکینِ اسمبلی اس امید میں تھے کہ انہیں وزیر بنایا جائے گا، جن میں رامیشور مہتو کا نام سب سے زیادہ زیرِ بحث تھا۔ لیکن اُپیندر کشواہا نے انہیں نظرانداز کرتے ہوئے اپنے بیٹے دیپک پرکاش کو وزارت کا عہدہ دے دیا۔ اس فیصلے نے پارٹی کے اندر شدید ناراضگی کو جنم دیا۔
رکن اسمبلی مہتو نے ٹویٹ کے ذریعے ظاہر کی ناراضگی
رکن اسمبلی رامیشور مہتو نے حال ہی میں پارٹی سے متعلق ایک ایسا ٹویٹ کیا، جس نے اندرونی کشمکش کو کھل کر سامنے لا دیا۔ انہوں نے سوشل میڈیا پر لکھا کہ جب قیادت کی نیت دھندلی ہو جائے اور پالیسیاں عوامی مفاد کے بجائے ذاتی مفاد کی طرف مڑنے لگیں، تو عوام کو زیادہ دیر تک گمراہ نہیں کیا جا سکتا۔
سیاسی بھنور میں اُپیندر کشواہا
اگرچہ بی جے پی نے اس ملاقات کو محض ایک رسمی کارروائی قرار دیا ہے، لیکن سیاسی مبصرین اسے ایک مختلف زاویے سے دیکھ رہے ہیں۔ ان کے مطابق تینوں اراکین اسمبلی کا ایک ساتھ اُپیندر کشواہا کی ضیافت کو مسترد کرنا اور دہلی جا کر نتن نبین سے ملاقات کرنا ایک بڑا سیاسی اشارہ ہے۔ ذرائع کے مطابق تینوں لیڈر اُپیندر کشواہا کے ساتھ اب آر یا پار کے موڈ میں ہیں۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
