این آئی اے ٹیم پر حملہ
نیشنل انویسٹی گیشن ایجنسی (این آئی اے) کی ایک ٹیم پر ہفتہ (06 اپریل) کی صبح مغربی بنگال کے مشرقی میدنی پور ضلع کے بھوپتی نگر میں اس وقت حملہ کیا گیا جب افسران 2022 کے دھماکے کے معاملے کی تحقیقات کے لیے ترنمول کانگریس کے ایک لیڈر کے گھر پہنچے تھے۔ ہائی کورٹ کی ہدایت پر این آئی اے کی ٹیم بھوپتی نگر دھماکہ کیس کی جانچ کرنے آئی تھی۔ اس واقعہ میں کسی کو پوچھ گچھ کے لیے لاتے ہوئے مرکزی ایجنسی کی گاڑی کی کھڑکیوں کے شیشے ٹوٹ گئے، این آئی اے نے دعویٰ کیا کہ پوچھ گچھ کے دوران انہیں نشانہ بنایا گیا۔
پولیس ذرائع کے مطابق این آئی اے کے افسران پولیس کی جانب سے سیکورٹی فراہم کرنے سے پہلے ہی موقع پر پہنچ گئے۔ پولیس ذرائع نے دعویٰ کیا ہے کہ تحریری شکایت موصول ہونے پر تحقیقات کی جائیں گی۔ اب تک موصول ہونے والی معلومات کے مطابق، این آئی اے کی ٹیم ہفتہ کی صبح وہاں گئی تھی، جب انہیں مخالفت کا سامنا کرنا پڑا اور مبینہ طور پر حملہ کیا گیا۔
دراصل، 2022 میں مغربی بنگال کے مشرقی میدنی پور ضلع کے بھوپتی نگر میں ایک دھماکہ ہوا تھا، جس کی جانچ اے این آئی اے کر رہی ہے۔ اس دھماکے میں ایک مکان گر گیا اور تین افراد بھی ہلاک ہوئے۔ اس معاملے میں ترنمول کانگریس (ٹی ایم سی) کے آٹھ لیڈران سے پوچھ گچھ کی جانی ہے۔ جنہیں گزشتہ ہفتہ کو پیش ہونے کے لیے بلایا گیا تھا، لیکن یہ لیڈر ایک بار پھر قومی تحقیقاتی ایجنسی (این آئی اے) کے سامنے پیش نہیں ہوئے۔ مرکزی تفتیشی ایجنسی ان آٹھ لیڈران کو کسی اور تاریخ کو دوبارہ سمن جاری کر سکتی ہے۔
اس معاملے پر ٹی ایم سی-بی جے پی آمنے سامنے
ٹی ایم سی لیڈر کنال گھوش نے اس واقعہ کے سلسلے میں بی جے پی پر الزام لگایا اور کہا کہ این آئی اے کی تحقیقات کے پیچھے بی جے پی لیڈروں کا ہاتھ ہے۔ انہوں نے دعویٰ کیا کہ بی جے پی نے خود مشرقی مدنی پور کے ٹی ایم سی لیڈروں کی فہرست این آئی اے کو دی ہے۔ ایجنسی ان کے گھروں پر چھاپہ مار کر انہیں گرفتار کرنے کا منصوبہ بنا رہی ہے۔
بھارت ایکسپریس۔
