مرکزی وزیر داخلہ امت شاہ آج بدھ کے روز مغربی بنگال کے ایک روزہ دورے پر ہیں، تاہم اس بار ان کا یہ سفر مکمل طور پر مذہبی اور روحانی نوعیت کا ہے۔ سیاسی سرگرمیوں سے دور رہتے ہوئے وہ ضلع ندیہ کے مایا پور میں واقع بین الاقوامی کرشن بھاونا مرت سنگھ (اسکان) کے عالمی صدر دفتر پہنچ رہے ہیں، جہاں وہ شریل بھکتی سیدھانت سرسوتی ٹھاکر کی 152ویں جینتی تقریب میں شرکت کریں گے۔ ضلع ندیہ میں ان کے دورے کے پیش نظر سیکیورٹی کے سخت انتظامات کیے گئے ہیں اور مقامی انتظامیہ کو ہائی الرٹ پر رکھا گیا ہے۔ حکام کے مطابق یہ دورہ مکمل طور پر مذہبی پروگراموں تک محدود رہے گا اور کسی سیاسی اجلاس یا کارکنان کانفرنس کا انعقاد نہیں ہوگا۔
مکمل شیڈول کیا ہے؟
طے شدہ پروگرام کے مطابق امت شاہ دوپہر 1 بجکر 35 منٹ پر خصوصی طیارے کے ذریعے کولکاتا ایئرپورٹ پہنچیں گے۔ وہاں سے وہ بی ایس ایف کے ہیلی کاپٹر کے ذریعے سیدھے مایا پور کے لیے روانہ ہوں گے۔ دوپہر تقریباً 2 بجکر 25 منٹ پر وہ مندر احاطے میں پہنچیں گے اور تقریباً دو گھنٹے تک مختلف مذہبی سرگرمیوں میں حصہ لیں گے۔ شام کے وقت وہ دوبارہ کولکاتا ایئرپورٹ لوٹیں گے اور وہاں سے نئی دہلی روانہ ہو جائیں گے۔
شَنکھ بھون سے پدم بھون تک مصروفیات
مایا پور پہنچنے کے بعد وزیر داخلہ سب سے پہلے اسکان کے شنکھ بھون اور اس کے بعد پدم بھون کا دورہ کریں گے۔ ذرائع کے مطابق اس دوران سنتوں اور مذہبی رہنماؤں کے ساتھ ایک خصوصی ملاقات کا بھی امکان ہے۔ امت شاہ، اسکان کے بانی شریل پربھو پاد سوامی کو خراج عقیدت پیش کریں گے اور پھولوں کی نذرانہ عقیدت پیش کیا جائے گا۔ مرکزی تقریب سے قبل وہ بھگوان نرسمہا، شری چیتنیہ مہاپربھو اور رادھا مادھو کے مندروں میں خصوصی پوجا اور آرتی میں شریک ہوں گے۔ اس موقع پر بڑی تعداد میں عقیدت مندوں اور مذہبی شخصیات کی شرکت متوقع ہے۔
سیکیورٹی کے سخت انتظامات
وزیر داخلہ کے دورے کے پیش نظر مندر احاطے اور اس کے اطراف پولیس اور نیم فوجی دستوں کی تعیناتی بڑھا دی گئی ہے۔ داخلی اور خارجی راستوں پر سخت نگرانی رکھی جا رہی ہے۔ انتظامیہ کے مطابق تقریب کے دوران عوامی نظم و ضبط کو یقینی بنانے کے لیے خصوصی بندوبست کیے گئے ہیں۔ قابل ذکر ہے کہ اس سے قبل 31 جنوری کو امت شاہ نے مغربی بنگال میں سیاسی ریلیوں سے خطاب کیا تھا، تاہم آج کا دورہ مکمل طور پر ”بھکتی“ اور روحانیت کے نام رہے گا، جس میں سیاست کی کوئی جھلک دکھائی نہیں دے گی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
