مرکزی وزیر گری راج سنگھ
مرکزی وزیر برائے ٹیکسٹائل اور بی جے پی کے سینئر رہنما گری راج سنگھ نے فریدآباد سے بھاری مقدار میں دھماکہ خیز مواد کی برآمدگی کے بعد ایک بار پھر متنازع بیان دے کر نیا تنازع کھڑا کر دیا ہے۔ جموں و کشمیر پولیس نے پیر کے روز فریدآباد میں کارروائی کرتے ہوئے ایک ڈاکٹر کو گرفتار کیا اور بڑی تعداد میں دھماکہ خیز مواد اور گولہ بارود ضبط کیا۔ اسی معاملے پر ردعمل دیتے ہوئے گری راج سنگھ نے الزام لگایا کہ ایسے واقعات میں ہمیشہ “ایک ہی برادری” کے افراد ملوث پائے جاتے ہیں۔
خبر رساں ایجنسی اے این آئی سے بات کرتے ہوئے گری راج سنگھ نے کہا، ’’مودی حکومت اور ریاستی حکومت نے اس سازش کو ناکام بنایا۔ یہ واقعہ ممبئی دھماکوں سے بھی زیادہ خطرناک ہو سکتا تھا۔ بابا باگیشور کی یاترا جاری تھی، جہاں لاکھوں لوگ موجود تھے۔ اگر ان پر حملہ ہو جاتا تو کیا ہوتا؟ مگر جب بھی ایسے لوگ پکڑے جاتے ہیں، وہ ہمیشہ ایک ہی برادری سے نکلتے ہیں… ایک مسلم ڈاکٹر گرفتار کیا گیا ہے‘‘۔
انہوں نے اپوزیشن جماعتوں پر بھی حملہ کرتے ہوئے کہا کہ ایسے سنگین واقعات پر کبھی کوئی سیاسی رہنما بیان نہیں دیتا۔ ’’راہل گاندھی، لالو پرساد یادو، اکھلیش یادو یا اسد الدین اویسی، کوئی بھی اس پر بولتا نہیں۔ یہ افسوسناک اور تشویش ناک بات ہے۔ ملک کے لیے یہ چونکانے والا واقعہ ہے۔ جو لوگ کہتے ہیں کہ دہشت گردی کا کوئی مذہب نہیں ہوتا، میں ان سے پوچھنا چاہتا ہوں کہ پھر تمام پکڑے جانے والے دہشت گرد ایک ہی مذہب سے کیوں ہوتے ہیں؟‘‘ گری راج سنگھ نے کہا۔ انہوں نے کہا کہ پہلگام حملے سمیت حالیہ کئی دہشت گردانہ واقعات میں بھی یہی نمونہ دیکھا گیا ہے۔ ان کے مطابق، ’’یہ سب مذہب سے جڑے ہوئے معاملات ہیں اور اس پر خاموشی اختیار کرنا ملک کے خلاف ہے‘‘۔
واضح رہے کہ جموں و کشمیر پولیس نے فریدآباد سے بڑی مقدار میں آئی ای ڈی بنانے والا مواد اور اسلحہ برآمد کیا ہے۔ پولیس کا کہنا ہے کہ مزید تفصیلات تفتیش کے بعد سامنے آئیں گی۔ یہ پہلا موقع نہیں جب گری راج سنگھ اپنے بیانات کی وجہ سے تنازع میں آئے ہوں۔ گزشتہ ماہ بہار اسمبلی انتخابات کے دوران انہوں نے ایک ریلی میں کہا تھا کہ بی جے پی ’’نمک حراموں‘‘ کے ووٹ نہیں چاہتی۔ انہوں نے الزام لگایا تھا کہ کچھ لوگوں نے سرکاری اسکیموں سے فائدہ تو اٹھایا، مگر ووٹ بی جے پی کو نہیں دیا۔ اپنے متنازع بیانات کے سبب اکثر سرخیوں میں رہنے والے گری راج سنگھ کے اس نئے تبصرے پر سیاسی حلقوں میں سخت ردعمل دیکھنے کو مل رہا ہے، جبکہ حزبِ اختلاف نے ان کے بیان کو ’’فرقہ وارانہ ہم آہنگی کے خلاف‘‘ قرار دیا ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
