16 Dead In Telangana Due To Heatwaves: تلنگانہ میں گرمی کی شدت اور ’لو کا قہر ‘، ہیٹ ویو سے 16 افراد ہلاک، حکومت نے کیا معاوضے کا اعلان

حیدرآباد: ملک بھر میں شدید گرمی اور لُو کی لہر نے عام زندگی کو بری طرح متاثر کر دیا ہے، جبکہ جنوبی ریاست تلنگانہ میں حالات مزید سنگین ہوتے جا رہے ہیں۔ ریاست کے مختلف اضلاع میں بڑھتے ہوئے درجہ حرارت اور ہیٹ ویو کے باعث اب تک کم از کم 16 افراد کی موت کی اطلاع سامنے آئی ہے۔ دوسری جانب پڑوسی ریاست آندھرا پردیش میں بھی ہیٹ اسٹروک کے 319 معاملات درج کیے گئے ہیں، تاہم وہاں فی الحال کسی ہلاکت کی تصدیق نہیں ہوئی ہے۔ مسلسل بڑھتی گرمی نے عوام کی مشکلات میں اضافہ کر دیا ہے اور دوپہر کے اوقات میں سڑکیں سنسان دکھائی دے رہی ہیں۔ تلنگانہ کے محکمہ ریونیو کی جانب سے منعقدہ ایک اعلیٰ سطحی جائزہ اجلاس میں حکام نے ریاستی وزیر ریونیو پونگولیٹی سرینواس ریڈی کو مختلف اضلاع میں ہونے والی اموات کے بارے میں تفصیلی جانکاری دی۔ سرکاری بیان کے مطابق سب سے زیادہ چار اموات جے شنکر بھوپال پلی ضلع میں درج کی گئی ہیں۔ اس کے علاوہ وارنگل اربن، کریم نگر اور نظام آباد اضلاع میں تین، تین افراد جان کی بازی ہار چکے ہیں۔ اسی طرح جوگولامبا گڈوال، رنگا ریڈی اور سوریہ پیٹ اضلاع میں ایک، ایک ہلاکت کی اطلاع موصول ہوئی ہے۔

ایک سرکاری افسر نے نام ظاہر نہ کرنے کی شرط پر بتایا کہ مختلف اضلاع سے غیر رسمی طور پر تقریباً 34 اموات کی اطلاعات موصول ہوئی ہیں، تاہم ضلعی انتظامیہ نے ابھی تک اس بات کی تصدیق نہیں کی ہے کہ تمام اموات ہیٹ اسٹروک کے سبب ہوئی ہیں۔ حکام کا کہنا ہے کہ ہر معاملے کی الگ الگ جانچ کی جا رہی ہے تاکہ اصل وجہ سامنے آسکے۔ گرمی کی شدت کے باعث اسپتالوں میں بھی مریضوں کی تعداد بڑھتی جا رہی ہے، خاص طور پر بزرگ افراد، بچے اور پہلے سے بیمار شہری زیادہ متاثر ہو رہے ہیں۔ ریاستی حکومت نے متاثرہ خاندانوں کی مدد کے لیے اہم اعلان کرتے ہوئے ہر متوفی کے اہل خانہ کو چار، چار لاکھ روپے بطور معاوضہ دینے کا فیصلہ کیا ہے۔ وزیر ریونیو پونگولیٹی سرینواس ریڈی نے متعلقہ حکام کو ہدایت دی کہ امدادی رقم کی تقسیم میں کسی قسم کی تاخیر نہ کی جائے اور متاثرین کو فوری ریلیف فراہم کیا جائے۔ انہوں نے کہا کہ حکومت عوام کی جانوں کے تحفظ کے لیے ہر ممکن قدم اٹھا رہی ہے اور کسی بھی قسم کی غفلت برداشت نہیں کی جائے گی۔

وزیر ریونیو نے کہا کہ ایل نینو کے اثرات کے باعث ریاست میں درجہ حرارت خطرناک سطح تک پہنچ گیا ہے، جس سے ہیٹ ویو کی صورتحال مزید خراب ہو گئی ہے۔ انہوں نے افسران کو ہدایت دی کہ شدید گرمی سے متاثرہ دیہات کی فوری نشاندہی کی جائے اور وہاں رہنے والے لوگوں کو میڈیا، سوشل میڈیا اور دیگر ذرائع کے ذریعے احتیاطی ہدایات پہنچائی جائیں۔ انہوں نے کہا کہ بس اسٹینڈز، بازاروں، بڑی سڑکوں اور مزدوروں کے کام کرنے والے مقامات پر پینے کے پانی اور او آر ایس کے پیکٹ مناسب مقدار میں دستیاب کرائے جائیں۔

انہوں نے بزرگ شہریوں، حاملہ خواتین، بچوں اور بیمار افراد سے اپیل کی کہ وہ صبح گیارہ بجے سے شام چار بجے کے درمیان گھروں سے باہر نکلنے سے گریز کریں۔ محکمہ موسمیات کے مطابق ہفتہ کی شام پانچ بجے تک تلنگانہ کے 19 اضلاع میں درجہ حرارت 45 ڈگری سیلسیس سے تجاوز کر گیا تھا۔ بھدرا دری کوتھا گوڈیم ضلع کے ڈمگوڈیم اور جگتیال ضلع کے دھرم پوری میں سب سے زیادہ 46.3 ڈگری سیلسیس درجہ حرارت ریکارڈ کیا گیا، جس کے بعد ریاست بھر میں الرٹ جاری کر دیا گیا ہے۔ ماہرین صحت نے شہریوں کو مشورہ دیا ہے کہ وہ دھوپ میں نکلتے وقت سر ڈھانپ کر رکھیں، پانی پئیں اور غیر ضروری سفر سے پرہیز کریں۔ ڈاکٹروں کے مطابق جسم میں پانی کی کمی، چکر آنا، بخار اور بے ہوشی ہیٹ اسٹروک کی علامات ہیں، جنہیں نظر انداز کرنا خطرناک ثابت ہوسکتا ہے۔ انتظامیہ نے سرکاری اسپتالوں میں وارڈ قائم کرنے اور ایمرجنسی خدمات مستعد رکھنے کی ہدایت جاری دی ہے۔

بھارت ایکسپریس اردو۔