مشرقِ وسطیٰ (مڈل ایسٹ) میں ایک بارپھرکشیدگی خطرناک حد تک بڑھ گئی ہے۔ امریکہ نے بدھ کے روزایران کے خلاف نئے فوجی حملوں کا اعلان کرتے ہوئے کہا ہے کہ اس کارروائی کا مقصد آبنائے ہرمزمیں بین الاقوامی بحری آمد ورفت کومحفوظ بنانا ہے۔ یہ پیش رفت ایسے وقت میں سامنے آئی ہے جب امریکی صدرڈونلڈ ٹرمپ نے واضح کیا ہے کہ ان کے مطابق، ایران کے ساتھ جنگ کے خاتمے کے لئے ہونے والا عبوری معاہدہ اب ختم ہوچکا ہے۔
آبنائے ہرمز کو کھلا رکھنے کے لئے نیا امریکی فوجی آپریشن
امریکی فوج کے مطابق، بدھ کے روزایران کے خلاف نئی فوجی کارروائی شروع کی گئی۔ یہ حملے ایک دن قبل آبنائے ہرمزسے گزرنے والے تین مال بردارجہازوں پرہونے والے حملوں کے بعد کئے گئے۔ امریکہ کا دعویٰ ہے کہ انہی حملوں کے جواب میں اس نے اپنی فوجی کارروائیاں تیزکی ہیں۔ ان حملوں کے بعد ایران کے جنوبی ساحلی علاقوں کے کئی شہروں میں دھماکوں کی آوازیں سنی گئیں، جبکہ بعض علاقوں میں بجلی کی فراہمی بھی متاثرہونے کی اطلاعات ہیں۔
صدر ٹرمپ کی ہدایت پرحملوں میں شدت
امریکی صدرڈونلڈ ٹرمپ کی ہدایت پرامریکی سینٹرل کمانڈ نے ایران کے خلاف اضافی فوجی کارروائیاں شروع کردی ہیں۔ امریکی فوج کا کہنا ہے کہ ان حملوں کا مقصد ایران کی اس صلاحیت کو مزید کمزورکرنا ہے، جس کے ذریعہ، امریکی مؤقف کے مطابق، وہ آبنائے ہرمزمیں بین الاقوامی بحری جہازرانی کی آزادی کے لئے خطرہ پیدا کرسکتا ہے۔ امریکہ نے الزام عائد کیا ہے کہ حالیہ دنوں میں تجارتی جہازوں اوران کے شہری عملے پر ہونے والے مبینہ حملوں کے لیے ایران ذمہ دارہے۔ امریکی بیان کے مطابق، بین الاقوامی بحری راستے سے گزرنے والے جہازوں کی سلامتی کو یقینی بنانے کے لیے یہ فوجی کارروائیاں کی جا رہی ہیں۔
مسلسل دوسرے روزبھی امریکی حملے
امریکہ نے مسلسل دوسرے دن بھی ایران کے مختلف ٹھکانوں کونشانہ بنایا۔ امریکی حکام کے مطابق ان حملوں کا مقصد ایران پردباؤبڑھانا ہے تاکہ وہ آبنائے ہرمزمیں تجارتی جہازوں پرمبینہ حملے بند کرے۔ امریکی خبر رساں ویب سائٹ Axios کے مطابق، واشنگٹن کا کہنا ہے کہ بین الاقوامی سمندری راستے سے گزرنے والے تجارتی جہازوں اوران کے شہری عملے کی حفاظت کویقینی بنانے کے لئے یہ کارروائی ضروری ہے۔
آئی آر جی سی کے سلمان کمانڈ ہیڈکوارٹر کو نشانہ بنانے کا دعویٰ
امریکی حملوں میں جنوب مشرقی ایران کے شہرمیں واقع اسلامک ریولوشنری گارڈ کور(آئی آرجی سی) کے سلمان کمانڈ ہیڈکوارٹرکونشانہ بنانے کا دعویٰ کیا گیا ہے۔ اس کے علاوہ ایران شہرکے ساتھ جنوبی ایران کے چابہار، کنارک، بندرعباس، جاسک، سیریک اورجزیرہ قشم سمیت متعدد علاقوں میں بھی امریکی حملے کیے جانے کی اطلاعات ہیں۔ رپورٹس کے مطابق، جنوبی ایران کے صوبہ بوشہرمیں چوغداک کے قریب واقع اسلامک ریولوشنری گارڈ کورایرواسپیس فورس (آئی آرجی سی اے ایف) کی ایک فوجی تنصیب میں آگ بھڑک اٹھی۔ بتایا جا رہا ہے کہ یہ آگ امریکی فضائیہ اوربحریہ کی جانب سے کئے گئے حملوں کے بعد لگی، تاہم آگ لگنے کی اصل وجہ کی سرکاری طورپرتصدیق نہیں کی گئی ہے۔
بھارت ایکسپریس اردو-
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
