تہران: محمد باقر قالیباف، جو ایران کی پارلیمنٹ کے اسپیکر ہیں، نے امریکہ کے فوجیوں کے نام ایک سخت پیغام جاری کیا ہے۔ ان کا یہ پیغام نصیحت سے زیادہ وارننگ کا انداز لیے ہوئے تھا۔ انہوں نے اپنی بات سوشل میڈیا پلیٹ فارم ایکس کے ذریعے سامنے رکھی۔
امریکی سرگرمیوں پر ایران کی نظر
قالیباف نے دعویٰ کیا کہ ایران پوری طرح چوکس ہے اور امریکہ کی ہر سرگرمی، خاص طور پر فوجیوں کی تعیناتی، پر گہری نظر رکھے ہوئے ہے۔ انہوں نے لکھا، ’’جنرلوں نے جو نقصان پہنچایا ہے، اسے فوجی ٹھیک نہیں کر سکتے۔ وہ فریب کا شکار ہو جائیں گے۔ ہمارے عزم کو آزمانے کی کوشش نہ کریں۔‘‘
مشرقِ وسطیٰ میں امریکی فوجیوں کی تعیناتی
درحقیقت مختلف غیر ملکی میڈیا اداروں نے دعویٰ کیا ہے کہ مشرق وسطیٰ میں امریکہ کے ایک ہزار سے زائد فوجیوں کی تعیناتی کی جا رہی ہے، جس کے بعد کشیدگی میں مزید اضافہ دیکھا جا رہا ہے۔
سخت بیانات کی وجہ سے قالیباف زیر بحث
قالیباف اپنے سخت بیانات کی وجہ سے گزشتہ چند دنوں سے خبروں میں ہیں۔ وہ ایکس کے ذریعے کھل کر اپنے خیالات کا اظہار کر رہے ہیں۔ جب ڈونلڈ ٹرمپ نے ’مثبت اور تعمیری مذاکرات‘ کا ذکر کیا تو قیاس آرائیاں کی جانے لگیں کہ شاید یہ بات قالیباف کے حوالے سے کہی گئی ہے۔ حالانکہ، چند گھنٹوں بعد ہی قالیباف نے اس سے خود کو الگ کرتے ہوئے امریکی صدر کے دعوے کو ’فیک نیوز‘ قرار دے دیا۔
ایران کا ڈونلڈ ٹرمپ کے خلاگف سخت مؤقف
قالیباف نے ٹرمپ پر طنز کرتے ہوئے کہا کہ ایرانی عوام حملہ آوروں کے خلاف سخت اور سزا دینے والی کارروائی چاہتے ہیں۔ انہوں نے لکھا کہ جب تک یہ مقصد حاصل نہیں ہو جاتا، تمام ایرانی حکام سپریم لیڈر اور عوام کے ساتھ مضبوطی سے کھڑے رہیں گے۔
امریکہ سے مذاکرات کی تردید
انہوں نے مزید کہا کہ امریکہ کے ساتھ کوئی مذاکرات نہیں ہوئے۔ ان کے مطابق ’فیک نیوز‘ کا استعمال مالیاتی اور تیل کی منڈیوں میں ہیرا پھیری کے لیے کیا جا رہا ہے، تاکہ امریکہ اور اسرائیل اس بحران سے نکل سکیں جس میں وہ پھنس چکے ہیں۔
ٹرمپ کا حملہ مؤخر کرنے کا اعلان
اس سے قبل ڈونلڈ ٹرمپ نے 48 گھنٹے کے الٹی میٹم کی مدت ختم ہونے سے پہلے سوشل میڈیا پلیٹ فارم ٹروتھ سوشل پر لکھا تھا کہ چونکہ بات چیت مثبت رخ اختیار کر رہی ہے، اس لیے پانچ دن تک ایرانی توانائی تنصیبات پر حملہ مؤخر کیا جا رہا ہے۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
