PM Modi Bhutan King Talks in Thimphu : وزیر اعظم مودی اور بھوٹان کے بادشاہ کے درمیان وفدسطح کی بات چیت، رابطے، تجارت اور ثقافتی تعلقات کو مضبوط کرنے کے نئے اقدامات کا اعلان

تھمپو (بھوٹان): بھارت کے وزیر اعظم نریندر مودی نے اپنے دو روزہ سرکاری دورۂ بھوٹان کے دوران بھوٹان کے بادشاہ جگمے کھیسر نامگیال وانگچوک کے ساتھ تھمپو میں وفدی سطح کی بات چیت کی۔ اس ملاقات میں دونوں ممالک کے درمیان دوطرفہ تعلقات، رابطہ کاری، اقتصادی شراکت داری، ڈیجیٹل تعاون اور ثقافتی رشتوں کو مزید گہرا کرنے کے موضوعات پر تبادلہ خیال کیا گیا۔ یہ ملاقات اُس وقت ہوئی جب وزیر اعظم مودی نے بھوٹان کے ساتھ رابطے کو مضبوط کرنے کے لیے کئی اہم اعلانات کیے۔ انہوں نے اعلان کیا کہ بھارت بھوٹان کے سرحدی قصبے گیلیفو کے قریب ایک انٹیگریٹڈ امیگریشن چیک پوائنٹ قائم کرے گا، جس سے دونوں ممالک کے درمیان سیاحوں اور سرمایہ کاروں کی آمدورفت میں سہولت ہوگی۔

وزیر اعظم مودی نے تھمپو کے چانگلی میتھنگ اسٹیڈیم میں منعقدہ تقریب میں شرکت کی، جو بھوٹان کے چوتھے بادشاہ جِگمے سنگے وانگچک کی 70ویں سالگرہ کے موقع پر منعقد ہوئی تھی۔ اس موقع پر مودی نے کہا کہ ”میں آج اس پلیٹ فارم سے ایک اہم اعلان کر رہا ہوں۔ بہت جلد بھارت گیلیفو کے قریب ایک امیگریشن چیک پوائنٹ تعمیر کرے گا تاکہ دونوں ممالک کے درمیان سرمایہ کاروں اور زائرین کی نقل و حرکت مزید آسان ہو سکے“۔ انہوں نے مزید بتایا کہ گیلیفو اور سمٹسی کو بھارت کے ریلوے نیٹ ورک سے جوڑنے کا منصوبہ بھی تیار ہے، جس سے بھوٹان کے کسانوں اور صنعتوں کو بھارتی منڈیوں تک بہتر رسائی حاصل ہوگی۔

وزیر اعظم نے کہا کہ بھارت اور بھوٹان دونوں سرحدی بنیادی ڈھانچے کو تیزی سے ترقی دے رہے ہیں، تاکہ نقل و حمل اور تجارت میں آسانی پیدا ہو۔ انہوں نے زور دیا کہ بھارت اور بھوٹان کی ترقی ایک دوسرے سے جڑی ہوئی ہے اور اسی جذبے کے تحت بھارت نے گزشتہ سال بھوٹان کی پانچ سالہ ترقیاتی منصوبہ بندی کے لیے 10,000 کروڑ روپے کی مالی امداد دینے کا اعلان کیا تھا۔ موصولہ اطلاعات کے مطابق، اس رقم میں سے 7,000 کروڑ روپے پروجیکٹ ٹائیڈ اسسٹنس منصوبوں کے لیے، 1,000 کروڑ روپے ہائی امپیکٹ کمیونٹی ڈیولپمنٹ پروجیکٹس کے لیے، 1,500 کروڑ روپے معاشی امدادی پروگرام کے لیے اور 500 کروڑ روپے پروگرام گرانٹ کے طور پر مختص کیے گئے ہیں۔

مودی نے مزید کہا کہ بھارت نے ماضی میں بھی بھوٹان کو ضروری اشیائے خورد و نوش اور ایندھن کی باقاعدہ فراہمی یقینی بنائی ہے۔ اب بھارت ڈیجیٹل رابطے کو بھی بڑھا رہا ہے، جس کے تحت یو پی آئی ادائیگی نظام بھوٹان میں بھی متعارف کرایا جا رہا ہے۔ انہوں نے کہا کہ ”ہم اس بات کو یقینی بنانے کی کوشش کر رہے ہیں کہ بھوٹانی شہری بھارت آنے پر یو پی آئی سہولت سے فائدہ اٹھا سکیں“۔ اس موقع پر وزیر اعظم مودی نے بھارت اور بھوٹان کے روحانی و ثقافتی تعلقات پر بھی روشنی ڈالی۔ انہوں نے کہا کہ ”بھارت میں ہمارے بزرگوں کی تعلیمات ‘واسودھیو کٹمبکم’ یعنی پوری دنیا ایک خاندان ہے پر مبنی ہیں۔ انہی جذبات کے ساتھ بھارت نے بھوٹان میں منعقدہ عالمی دعائیہ تقریب میں شرکت کی ہے، جہاں پوری دنیا کے سنت امن عالم کے لیے دعا کر رہے ہیں اور ان میں 1.4 ارب بھارتیوں کی دعائیں بھی شامل ہیں“۔

انہوں نے مزید بتایا کہ بھارت اور بھوٹان کے درمیان سائنس و ٹیکنالوجی کے میدان میں بھی تعاون بڑھایا جا رہا ہے اور دونوں ممالک ایک مشترکہ سیٹلائٹ کی تیاری پر کام کر رہے ہیں۔ مودی نے کہا کہ ”یہ سیٹلائٹ بھارت-بھوٹان تعلقات کی ایک بڑی کامیابی ہے۔ ہمارے عوام کے درمیان روحانی رشتہ ہی ہماری دوستی کی اصل طاقت ہے“۔

وزیر اعظم مودی نے ثقافتی تعاون کی مثال دیتے ہوئے کہا کہ حال ہی میں راجگیر میں رائل بھوٹانی مندر کا افتتاح کیا گیا اور اب یہی منصوبہ وارانسی میں بھی آگے بڑھایا جا رہا ہے۔ انہوں نے کہا کہ ”بھوٹان کے عوام کی خواہش کے مطابق، بھارت کی حکومت وارانسی میں بھوٹانی مندر اور مہمان خانہ کے لیے زمین فراہم کر رہی ہے۔ ان مندروں کے ذریعے ہم اپنے تاریخی و ثقافتی تعلقات کو مزید مضبوط کر رہے ہیں“۔ بھارت اور بھوٹان کے درمیان یہ بات چیت دونوں ممالک کے درمیان تعلقات کے ایک نئے عہد کی علامت سمجھی جا رہی ہے، جس کا مقصد نہ صرف اقتصادی ترقی بلکہ علاقائی امن، روحانی ہم آہنگی اور مشترکہ خوشحالی کو فروغ دینا ہے۔

بھارت ایکسپریس اردو