واشنگٹن: امریکی صدر ڈونالڈ ٹرمپ کی بیٹی ایوانکا ٹرمپ کو مبینہ طور پر قتل کی سازش کا نشانہ بنایا گیا۔ نیویارک پوسٹ کی رپورٹ کے مطابق عراقی شہری محمد باقر سعد داؤد الساعدی پر الزام ہے کہ وہ ایران کی پاسدارانِ انقلاب یعنی اسلامک ریولوشنری گارڈ کور سے تربیت یافتہ تھا اور اس نے 2020 میں ایرانی کمانڈر قاسم سلیمانی کی ہلاکت کا بدلہ لینے کے لیے یہ منصوبہ بنایا۔ رپورٹ کے مطابق 32 سالہ ملزم کے پاس ایوانکا ٹرمپ کی فلوریڈا رہائش گاہ کا خاکہ موجود تھا۔ ملزم نے مبینہ طور پر سوشل میڈیا پر دھمکی آمیز پیغامات بھی پوسٹ کیے، جن میں کہا گیا تھا: ’’نہ تمہارے محل اور نہ ہی سیکریٹ سروس تمہیں بچا سکے گی۔‘‘ سابق عراقی سفارت کار انتفاض قنبر کے مطابق ملزم اکثر یہ کہتا تھا کہ وہ ’’ٹرمپ کے گھر کو اسی طرح جلا دینا چاہتا ہے جیسے اس نے ہمارا گھر جلایا۔‘‘
ترکی میں گرفتاری، کئی حملوں میں ملوث ہونے کا الزام
محمد باقر الساعدی کو 15 مئی کو ترکی میں گرفتار کیا گیا، جس کے بعد اسے امریکہ کے حوالے کر دیا گیا۔ امریکی حکام کے مطابق اس پر یورپ اور شمالی امریکہ میں 18 حملوں یا حملوں کی کوششوں میں ملوث ہونے کا الزام ہے، جن میں فائر بم حملے، فائرنگ، چاقو حملے اور یہودی مراکز و امریکی سفارتی تنصیبات کو نشانہ بنانے کے واقعات شامل ہیں۔ رپورٹ میں کہا گیا ہے کہ ملزم ایران نواز ملیشیا کتائب حزب اللہ کے لیے کام کرتا تھا اور اس کے ایران کے پاسدارانِ انقلاب سے قریبی روابط تھے۔ محققہ اور سابق یرغمالی الزبتھ تسورکوف کے مطابق الساعدی کے قاسم سلیمانی اور بعد میں ان کے جانشین اسماعیل قاآنی سے قریبی تعلقات تھے۔ تفتیش کاروں کا دعویٰ ہے کہ ملزم عراقی سروس پاسپورٹ اور ایک ٹریول ایجنسی کو بطور پردہ استعمال کرکے مختلف ممالک میں سفر کرتا اور نیٹ ورکس سے رابطے قائم کرتا تھا۔
ایران پر ممکنہ امریکی حملے کی خبریں بھی تیز
اسی دوران امریکی میڈیا رپورٹس میں کہا گیا ہے کہ ڈونالڈ ٹرمپ کی انتظامیہ ایران کے خلاف نئی فوجی کارروائیوں پر غور کر رہی ہے۔ سی بی ایس نیوز کے مطابق ابھی کسی حتمی فیصلے کا اعلان نہیں کیا گیا، تاہم امریکی فوج اور انٹیلی جنس سے وابستہ کئی اہلکاروں نے میموریل ڈے ویک اینڈ کی اپنی تعطیلات منسوخ کر دی ہیں۔ رپورٹس کے مطابق ٹرمپ اب نیو جرسی کے اپنے گالف کلب کے بجائے وائٹ ہاؤس میں ہی قیام کریں گے۔ امریکی حکام کے مطابق محمد باقر الساعدی اس وقت بروکلین کے میٹروپولیٹن ڈیٹینشن سینٹر میں تنہائی کی قید میں ہے اور اس معاملے کی مزید تفتیش جاری ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
