بنگلہ دیش کی سابق وزیر اعظم بیگم خالدہ ضیاء۔
ڈھاکہ: اسپتال میں زیرِ علاج بنگلہ دیش کی سابق وزیر اعظم بیگم خالدہ ضیاء 13ویں قومی پارلیمانی انتخابات میں حصہ لیں گی۔ پارٹی نے ان کی طرف سے بوگرا-7 حلقے سے نامزدگی فارم داخل کر دیا ہے۔ ڈھاکہ ٹریبیون کے مطابق، بنگلہ دیش نیشنلسٹ پارٹی (بی این پی) کی صدر خالدہ ضیاء کی طرف سے پیر کے روز بوگرا-7 نشست کے لیے نامزدگی کاغذات جمع کرائے گئے۔
پارٹی لیڈران نے کی خالدہ کی نمائندگی
پارٹی چیئرپرسن کے مشیر ہلال الزماں تعلقدار لالو نے دوپہر تقریباً 3 بجے ڈپٹی کمشنر اور ریٹرننگ آفیسر توفیق الرحمٰن کے دفتر میں نامزدگی فارم داخل کیا۔ بوگرا-7 سے الیکشن لڑنے والی خالدہ ضیاء کی نمائندگی پارٹی لیڈران نے کی، جن میں شاہجہان پور اپازیلا بی این پی کے صدر انعام الحق شاہین اور گابتولی اپازیلا بی این پی کے جنرل سیکریٹری انعام الحق نتون شامل تھے۔
ضیاء الرحمٰن کا آبائی علاقہ رہا ہے بوگرا
ہیلال الزماں تعلقدار لالو نے کہا کہ بوگرا-7 نشست بی این پی کے لیے تاریخی اہمیت رکھتی ہے۔ یہ حلقہ پارٹی کے بانی ضیاء الرحمٰن کا آبائی علاقہ رہا ہے۔ خالدہ ضیاء نے پہلی مرتبہ 1991 کے قومی پارلیمانی انتخابات میں اس نشست سے کامیابی حاصل کی تھی اور اس کے بعد 1996 اور 2001 میں بھی یہاں سے منتخب ہوئیں۔
منشی رفیق الاسلام نے بھی داخل کیا فارم
پرتھوم آلو میڈیا آؤٹ لیٹ کے مطابق، ڈھاکہ ساؤتھ سٹی کے بی این پی کنوینر اور خالدہ ضیاء کے انتخابی کوآرڈینیٹر منشی رفیق الاسلام عالم (جو مجنوں کے نام سے بھی جانے جاتے ہیں) نے بھی اسی حلقے سے بی این پی امیدوار کے طور پر اپنا نامزدگی فارم داخل کیا ہے۔
خالدہ ضیاء کا نامزدگی فارم جمع کرانے آئے پارٹی کے نائب صدر عبدالاول منٹو نے کہا کہ اس حلقے کے لیے ایک متبادل امیدوار کا انتظام بھی کیا گیا ہے۔ انہوں نے کہا، ’’چونکہ قائد بیمار ہیں، اس لیے ایک اور امیدوار کو منتخب کیا گیا ہے۔ اگر وہ آخری وقت میں الیکشن نہ لڑ سکیں تو دوسرا امیدوار میدان میں اترے گا۔ حالانکہ، اگر خالدہ ضیاء خود میدان میں نہ بھی ہوں تو بھی ان کی جانب سے انتخابی مہم جاری رہے گی۔‘‘
اس سے قبل، 21 دسمبر کی دوپہر، مرکزی ایگزیکٹو کمیٹی کے رکن ابو طالب کی قیادت میں بی این پی لیڈران نے فینی-1 حلقے کے لیے بھی خالدہ ضیاء کی جانب سے نامزدگی فارم حاصل کیا تھا۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
