ایوشمان کھرانہ پریانکا چوپڑا کی فلموں میں بھی کام کیا،یہ اداکار سڑک کنارے پھل بیچنے پر ہےمجبور
Actor Solanki Diwakar: بالی ووڈ کی چمکتی دمکتی دنیا میں ہر کسی کی قسمت نہیں چمکتی۔ ہر روز ہزاروں لوگ اداکار بننے کا خواب لے کر ممبئی پہنچتے ہیں۔لیکن بہت کم کو موقع ملتا ہے۔ قابل ذکر بات یہ ہے کہ آج ہم آپ کو ایک ایسے اداکار کے بارے میں بتاتے ہیں جس نے آیوشمان کھرانہ سے لے کر پریانکا چوپڑا تک کی فلموں میں کام کیا ہے۔ لیکن آج انہیں اپنا اور اپنے خاندان کا پیٹ پالنے کے لیے سڑک کے کنارے پھل بیچنا پڑرہا ہے۔
بڑے ستاروں کی فلموں میں کام کیا
View this post on Instagram
ہم سولنکی دیواکر کی بات کر رہے ہیں۔ انہوں نے ‘ڈریم گرل’، ‘دی وائٹ ٹائیگر’ اور ‘سونچیریا’ جیسی فلموں میں کام کیا۔ لیکن آج وہ پھل بیچنے پر مجبور ہیں۔ اگرچہ وہ پھل فروش ہیں اور فلموں میں چھوٹے موٹے کردار بھی کرتے رہتے ہیں ۔لیکن جب انہیں فلموں میں کام ملنا بند ہوا تو انہوں نے دوبارہ پھل بیچنا شروع کردیا۔ خبر رساں ایجنسی اے این آئی سے بات چیت کے دوران سولنکی دیواکر نے کہا، ‘جیسے جیسے لاک ڈاؤن بڑھتا گیا، مجھے اپنی ضروریات کا خیال رکھنا پڑا۔ مجھے اپنا کرایہ ادا کرنا ہے اور اپنے خاندان کے اخراجات پورے کرنے کے لیے رقم کی بھی ضرورت ہے۔ اس لیے میں نے دوبارہ پھل بیچنا شروع کر دیا ہے۔
رشی کپور کے ساتھ شوٹنگ نہیں ہو سکی
سولنکی دیواکر نے مزید کہا، ‘مجھے شرما جی نمکین میں پھل فروش کا کردار ملا ہے۔ میں نے رشی کپور جی کے ساتھ دو تین ڈائیلاگ کیے تھے۔ مجھے شوٹنگ کے لیے تاریخ بھی دی گئی تھی ۔لیکن دو تین بار تاریخ بدلی گئی اور پھر اچانک رشی کپورکی طبیعت بگڑ گئی اور وہ ممبئی واپس چلے گئے۔ بدقسمتی سے، ان کا انتقال ہوگیا اور شوٹنگ نہ ہو سکی۔ میں ان کے ساتھ شوٹنگ کے لیے بہت پرجوش تھا۔ مجھے ہمیشہ افسوس رہے گا کہ ہماری شوٹنگ نہیں ہوئی۔
میں مجبوری میں پھل بیچ رہا ہوں
میڈیا سے بات چیت کے دوران سولنکی دیواکر نے بتایا کہ اداکاری ان کی پہلی محبت ہے۔ اپنے آبائی شہر اچنیرا (یوپی) میں تھیٹروں میں پاپڑ بیچتے ہوئے انہیں اداکاری میں دلچسپی پیدا ہوئی۔ اگر انہیں مسلسل کام مل رہا ہوتا تو وہ پھل نہیں بیچ رہے ہوتے۔ فلموں سے اچھی آمدنی ہوتی ہے۔ جس سے خاندان کے اخراجات آرام سے پورے ہوتے ہیں۔ اداکار نے کہا کہ یہ میری بدقسمتی ہے کہ مجھے مسلسل کام نہیں مل رہا اور میں پھل بیچنے پر مجبور ہوں۔ اس کے علاوہ میرے پاس کوئی آپشن نہیں ہے۔
بھارت ایکسپریس
