’جب وی میٹ‘، ’راک اسٹار‘، ’ہائی وے‘ اور ’تماشہ‘ جیسی فلموں نے امتیاز علی کوبالی ووڈ کے نمایاں ہدایت کاروں میں شامل کر دیا۔ تاہم بہت کم لوگ جانتے ہیں کہ امتیاز علی کا خواب ہدایت کار بننا نہیں بلکہ اداکار بننا تھا۔
امتیاز علی کی پیدائش، تعلیم اور کریئر
امتیاز علی 16 جون 1971 کو جھارکھنڈ کے شہر جمشید پور میں پیدا ہوئے۔ ان کے والد محکمہ آبپاشی میں انجینئر تھے جبکہ والدہ گھریلو خاتون تھیں۔ ان کا بچپن کچھ عرصہ پٹنہ میں گزرا، جہاں انہوں نے ابتدائی تعلیم حاصل کی، بعد ازاں وہ دوبارہ جمشید پور واپس آ گئے۔ ان کے ایک رشتہ دار کے کئی سنیما گھر تھے اور ایک تھیٹر ان کے گھر کے بالکل قریب تھا، جس کی وجہ سے انہیں فلموں کو قریب سے دیکھنے کا موقع ملا اور ان کی دلچسپی بڑھتی چلی گئی۔اعلیٰ تعلیم کے لیے امتیاز دہلی پہنچے اور دہلی یونیورسٹی کے ہندو کالج میں داخلہ لیا۔ کالج کے دنوں میں انہوں نے تھیٹر میں بھرپور حصہ لیا۔ وہ ڈرامے لکھتے، ان کی ہدایت کاری کرتے اور خود اداکاری بھی کرتے تھے۔ اسی دوران انہوں نے فیصلہ کر لیا تھا کہ وہ تفریحی دنیا میں ہی اپنا مستقبل بنائیں گے۔
فلمی دنیا میں قدم
تعلیم مکمل کرنے کے بعد امتیاز ممبئی آ گئے۔ اس وقت ان کا خواب ایک کامیاب اداکار بننے کا تھا۔ انہوں نے اداکاری کے لیے متعدد کوششیں کیں اور مختلف چھوٹے موٹے کام بھی کیے۔ بعد میں انہوں نے فلم سازی اور ہدایت کاری کی باریکیوں کو سیکھنا شروع کیا۔ ٹی وی انڈسٹری میں کام کرتے ہوئے انہوں نے’کروکشیتر‘، ’امتحان‘ اور ’مہابھارت‘ جیسے شوز کی ہدایت کاری کی، جس سے انہیں کیمرے کے پیچھے کام کرنے کا قیمتی تجربہ حاصل ہوا۔اگرچہ اداکار بننے کا خواب انہوں نے مکمل طور پر ترک نہیں کیا تھا۔ سال 2004 میں انہیں انوراگ کشیپ کی مشہور فلم ‘بلیک فرائیڈے’ میں یعقوب میمن کا کردار ادا کرنے کا موقع ملا۔ تاہم جلد ہی انہیں احساس ہو گیا کہ ان کی اصل صلاحیت اداکاری میں نہیں بلکہ کہانیاں تخلیق کرنے اور انہیں پردۂ سیمیں پر پیش کرنے میں ہے۔ اس کے بعد انہوں نے مکمل توجہ ہدایت کاری پر مرکوز کر دی۔سال 2005 میں ان کی پہلی فلم ‘سوچا نہ تھا’ ریلیز ہوئی۔ ناقدین نے فلم کو پسند کیا، لیکن باکس آفس پر اسے خاطر خواہ کامیابی نہ مل سکی۔ اس کے بعد ‘آہستہ آہستہ’ بھی توقعات پر پورا نہیں اتر سکی۔ مسلسل دو فلموں کی ناکامی کے باوجود امتیاز نے ہمت نہیں ہاری۔ پھر 2007 میں ‘جب وی میٹ’ ریلیز ہوئی اور اسی فلم نے ان کی زندگی بدل دی۔ شاہد کپور اور کرینہ کپور کی اداکاری سے سجی یہ فلم زبردست ہٹ ثابت ہوئی اور امتیاز علی راتوں رات بالی ووڈ کے صفِ اول کے ہدایت کاروں میں شمار ہونے لگے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
