وزیر اعلی شیوراج سنگھ چوہان نے پیتھم پور کے یوم روزگار اور "ایک ضلع ایک پروڈکٹ" پروگرام میں شرکت کی
بھوپال، 5نومبر(بھارت ایکسپریس): وزیر اعلی شیوراج سنگھ چوہان نے پیتھم پور میں یوم روزگار اور “ایک ضلع ایک پروڈکٹ” پروگرام سے خطاب کرتے ہوئے کہا کہ، “پیتھم پور مدھیہ پردیش کا صنعتی اور روزگار پیدا کرنے والا دارالحکومت بن گیا ہے۔ یہاں بڑے پیمانے پر صنعتیں قائم ہو چکی ہیں اور صنعتوں کے لیے سرمایہ کاری کا سلسلہ جاری ہے۔ بیٹیوں کے لیے یہاں ایک علیحدہ ویمن انٹرپرینیور پارک بنایا جا رہا ہے۔”
اس دوران انہوں نے1371 کروڑ روپے کے ترقیاتی کاموں کا اعلان کیااور 3 لاکھ 19 ہزار نوجوانوں کو خود روزگار سے جوڑنے کے لیے 2577 کروڑ روپے قرض کی رقم تقسیم کی۔
وزیر اعلیٰ چوہان نےمزید کہا کہ مدھیہ پردیش حکومت نوجوانوں کو روزگار اور خود مختار بنانے کے لیے ایک لاکھ خالی سرکاری ملازمتوں پر آئندہ ایک سال میں بھرتی کی جائے گی۔ نومبر کے مہینے میں 40 ہزار خالی ملازمتوں پر بھرتی کے لیے اشتہارات جاری کیے جائیں گے۔
وزیر اعلیٰ چوہان نے کہا کہ پیتھم پور میں 1100 ایم ایس ایم ای یونٹس میں 12 ہزار 777 کروڑ روپے کی سرمایہ کاری ہے اور 38 ہزار 770 لوگوں کو روزگار ملا ہے۔ یہاں 95 بڑے صنعتی یونٹس قائم ہیں، جن میں 26 ہزار 320 کروڑ روپے کی سرمایہ کاری ہوئی ہے اور 53 ہزار 493 لوگوں کو روزگار ملا ہے۔ اس طرح کل ایک لاکھ سے زائد لوگوں کو روزگار ملا ہے۔ پیتھم پور کے فارما سیکٹر نے کووڈ کی دوائیں دنیا تک پہنچا کر ایک شاندار کام کیا ہے۔
وزیر اعلیٰ چوہان نے کہا کہ کسان بھائیوں سے زمین لے کر 12500 ہیکٹر میں ایک نیا سرمایہ کاری کا علاقہ قائم کیا جائے گا جس میں ایک لاکھ لوگوں کو روزگار ملے گا۔ پیتھم پور ایک شاندار صنعتی علاقہ ہے۔ یہاں صنعتی یونٹس مسلسل سرمایہ کاری کر رہے ہیں۔ یہاں کی صنعتی مصنوعات 11 ہزار کروڑ روپے کی مختلف ممالک کو برآمد کی جاتی ہیں۔
وزیر اعلیٰ چوہان نے کہا کہ پیتھم پور میں سڑکوں کی تعمیر کے لیے 15 کروڑ روپے دیے جائیں گے۔ یہاں ریونیو سیکشن بنا کر مستقل طور پر ایس ڈی ایم آفس قائم کیا جائے گا۔ پیتھم پور اسپتال کو سول اسپتال میں اپ گریڈ کیا جائے گا۔ مقامی عوامی نمائندوں کی جانب سے علاقائی ترقی کے جو مطالبات کیے گئے ہیں وہ بھی پورے کیے جائیں گے۔
وزیر اعلیٰ چوہان نے کہا کہ مدھیہ پردیش کی سرزمین پر کوئی غریب خاندان مکان کے بغیر نہیں رہے گا۔ ایسے تمام خاندانوں کو وزیر اعلیٰ اراضی ہاؤسنگ اسکیم کے تحت زمین دے کر زمین کا مالک بنایا جائے گا۔ تمام اہل افراد کے لیے رہائش بھی بنائی جائے گی۔ ابھی تک صرف دھار ضلع میں ایک لاکھ غریبوں کے گھر بنائے جا چکے ہیں۔
اس دوران دھار ضلع کے انچارج وزیر ڈاکٹر پربھورام چودھری، ایم پی مسٹر چھتر سنگھ دربار، ایم ایل ایز، پرنسپل سکریٹری صنعتی پالیسی اور سرمایہ کاری کے فروغ مسٹر سنجے شکلا، سکریٹری، مائیکرو، سمال اینڈ میڈیم انٹرپرائز مسٹر پی نرہری اور دیگر عوامی نمائندوں نے پروگرام میں شرکت کی۔ پروگرام میں نوجوانوں اور خواتین کے گروپ کے ممبران بھی بڑی تعداد میں موجود رہے۔
