امریکی صدر جو بائیڈن۔ (فائل فوٹو)
Israel Hamas War: اسرائیل اور حماس کے درمیان جاری جنگ کے دوران امریکی صدر جو بائیڈن کا کہنا تھا کہ حماس کو تباہ ہونا چاہیے لیکن فلسطینی ریاست کے لیے راستہ بھی ہونا چاہیے۔ انہوں نے خبردار کیا کہ اسرائیل کا غزہ پر دوبارہ قبضہ ایک بڑی غلطی ہوگی۔
اسرائیلی فوج نے غزہ کی سرحد پر ٹینک تعینات کر دیے ہیں اور کہا ہے کہ شدت پسند گروپ کے خاتمے کے لیے بڑے پیمانے پر آپریشن کیا جائے گا۔ اسرائیل کے شدید فضائی حملوں نے پوری غزہ کی پٹی کو تباہ کر دیا ہے۔ آپ کو بتاتے چلیں کہ حماس اور اسرائیل کے درمیان جنگ پیر کو 10ویں دن میں داخل ہو گئی ہے۔
پانچ جنگوں میں سب سے مہلک
غزہ میڈیا کے مطابق فلسطینی ہلال احمر نے بتایا کہ القدس اسپتال کے قریب پانچ فضائی حملے کیے گئے۔ اسرائیل نے ہسپتال کو خالی کرنے کے لیے ہفتے کی دوپہر تک کی ڈیڈ لائن دی تھی جسے ہلال احمر نے یہ کہتے ہوئے مسترد کر دیا کہ اس حکم کی تعمیل کرنا ناممکن ہے۔ غزہ کی وزارت صحت نے کہا کہ لڑائی شروع ہونے کے بعد سے اب تک 2,670 فلسطینی ہلاک اور 9,600 زخمی ہو چکے ہیں، جو کہ 2014 کی غزہ جنگ کے دوران، جو چھ ہفتوں سے زیادہ جاری رہی تھی، سے زیادہ ہے۔ یہ دونوں فریقوں کے لیے غزہ کی پانچ جنگوں میں سب سے مہلک بن رہی ہے۔
پچھلی جنگ سے زیادہ اموات
حماس کے 7 اکتوبر کے حملے میں 1,400 سے زیادہ اسرائیلی ہلاک ہوئے، جن میں سے زیادہ تر عام شہری تھے۔ اسرائیل کے مطابق بچوں سمیت کم از کم 155 دیگر افراد کو حماس نے پکڑ کر غزہ لے جایا ہے۔ آپ کو بتاتے چلیں کہ 1973 میں مصر اور شام کے ساتھ تنازع کے بعد اسرائیل اور فلسطین کے لیے یہ سب سے مہلک جنگ ہے۔
اس جنگ میں اب تک 10 دنوں میں فلسطینی شہریوں کی ہلاکتیں 2014 کی جنگ کے مقابلے میں بہت زیادہ ہوئی ہیں۔ جب کہ 2014 کی جنگ میں 50 دنوں میں 2200 کے قریب فلسطینی جاں بحق ہوئے تھے، اس بار صرف 10 دنوں میں 2670 افراد ہلاک ہو چکے ہیں۔
-بھارت ایکسپریس
