ممبئی: ریلائنس فاؤنڈیشن کی بانی اور چیئرپرسن نیتا امبانی نے آئچی-ناگویا میں 2026 ایشین گیمز کے اختتام کے بعد ہندوستانی دستے کو مبارکباد پیش کی۔ انہوں نے ہندوستانی کھلاڑیوں کی کارکردگی کو ’’خوشی اور فخر‘‘ کے متعدد لمحات سے تعبیر کرتے ہوئے خاص طور پر خواتین کھلاڑیوں کے نمایاں کردار کو سراہا۔ نیتا امبانی نے کہا ’’ایشین گیمز 2026 میں ہمارے ہندوستانی دستے کو دلی مبارکباد، جس نے ہمیں خوشی اور فخر کے بہت سے لمحات دیے۔ یہ دیکھنا خاص طور پر شاندار رہا کہ ہماری خواتین کھلاڑیوں نے ہندوستان کی تمغوں کی کامیابی میں قیادت کی، نوجوان لڑکیوں کو متاثر کیا اور ملک کا نام روشن کیا۔‘‘ انہوں نے مزید کہا ’’مجھے اپنے ریلائنس فاؤنڈیشن کے کھلاڑیوں پر بھی فخر ہے، جن کی کامیابیاں نوجوان صلاحیتوں پر ہمارے یقین کو مزید مضبوط کرتی ہیں اور ہندوستانی کھیلوں کے مستقبل کی حمایت کے ہمارے عزم کو تقویت دیتی ہیں۔ ہر اس کھلاڑی کا شکریہ اور شاباش، جس نے فخر کے ساتھ ہندوستان کے رنگ پہنے۔‘‘
85 تمغوں کے ساتھ ہندوستان چوتھے نمبر پر
آئچی-ناگویا ایشین گیمز میں ہندوستان 85 تمغوں کے ساتھ مجموعی تمغوں کی فہرست میں چوتھے نمبر پر رہا۔ ہندوستان نے 21 گولڈ، 27 سلور اور 37 برونز میڈل جیتے۔ ان کھیلوں میں ہندوستان نے کئی تاریخی کارکردگیاں انجام دیں۔ کرکٹ، کبڈی اور ہاکی میں ہندوستان نے گولڈ میڈل حاصل کیے، جبکہ کئی کھلاڑیوں نے لاس اینجلس 2028 اولمپکس کے لیے کوٹے حاصل کیے۔ ہندوستانی کھلاڑیوں نے متعدد ریکارڈ قائم کرنے کے ساتھ کئی مقابلوں میں پہلی بار کامیابی بھی حاصل کی۔ ہندوستان کی خواتین کھلاڑیوں نے اس کامیاب مہم میں اہم کردار ادا کیا۔ لوولینا بورگوہین، نیرو ڈھانڈا اور پرنوی ارس کے علاوہ خواتین کی ہاکی، کرکٹ، کبڈی اور ایتھلیٹکس ٹیموں کی کھلاڑیوں نے بھی قابل ذکر کارکردگی کا مظاہرہ کیا۔
ریلائنس فاؤنڈیشن کے 48 کھلاڑی، 29 تمغوں میں حصہ
ریلائنس فاؤنڈیشن نے اپنے پروگراموں اور شراکت داری کے ذریعے ہندوستان کے 29 تمغوں میں تعاون کیا۔ فاؤنڈیشن کی حمایت یافتہ مجموعی طور پر 48 کھلاڑیوں نے ایشین گیمز میں ہندوستان کی نمائندگی کی۔ فاؤنڈیشن نے ٹیم انڈیا کے اسپانسر کے طور پر بھی اپنی خدمات پیش کیں۔ ہندوستان کے 85 تمغوں کی مجموعی تعداد ایشین گیمز میں اس کی دوسری بہترین کارکردگی ہے۔ ہندوستان نے 2023 میں ہانگژو ایشین گیمز میں ریکارڈ 106 تمغے جیتے تھے، جن میں 28 گولڈ میڈل شامل تھے۔ آئچی-ناگویا میں چین 169 گولڈ سمیت 341 تمغوں کے ساتھ سرفہرست رہا۔ میزبان جاپان نے8 گولڈ سمیت 269 تمغوں کے ساتھ دوسری اور جنوبی کوریا نے 39 گولڈ سمیت 150 تمغوں کے ساتھ تیسری پوزیشن حاصل کی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
