USISPF Welcomes Settlement of Adani Cases: اڈانی معاملے کے تصفیے سے ہند-امریکہ اقتصادی تعلقات کو تقویت ملے گی: یو ایس آئی ایس پی ایف

نئی دہلی :امریکہ-ہند اسٹریٹجک پارٹنرشپ فورم (USISPF) نے کہا ہے کہ اڈانی انٹرپرائزز سے متعلق قانونی معاملے کے تصفیے نے ہند-امریکہ اقتصادی شراکت داری میں موجود ایک بڑی رکاوٹ کو دور کر دیا ہے، جس سے دونوں ممالک کے درمیان اقتصادی تعلقات مزید مضبوط ہونے کی امید ہے۔ فورم کے مطابق اس پیش رفت سے امریکی منڈی میں ہندوستانی سرمایہ کاری کو بھی نئی رفتار مل سکتی ہے۔یو ایس آئی ایس پی ایف کے صدر اور سی ای او ڈاکٹر مکیش آہوجا نے کہا کہ اس معاملے کے خاتمے سے ہندوستان اور امریکہ کے درمیان اقتصادی تعاون کو مزید فروغ حاصل ہوگا۔ ان کا کہنا تھا کہ دونوں ممالک کے درمیان تجارت، سرمایہ کاری اور صنعتی شراکت داری کے امکانات پہلے سے زیادہ روشن ہو گئے ہیں۔

ڈاکٹر آہوجا کا یہ بیان ایسے وقت سامنے آیا ہے جب امریکی محکمہ خزانہ کے آفس آف فارن ایسیٹس کنٹرول (OFAC) نے ایران سے متعلق پابندیوں کی مبینہ خلاف ورزیوں کے معاملے میں اڈانی انٹرپرائزز لمیٹڈ کے ساتھ 27 کروڑ 50 لاکھ ڈالر کے تصفیے کا اعلان کیا ہے۔انہوں نے کہا کہ اڈانی گروپ کی جانب سے امریکہ میں مجوزہ سرمایہ کاری اس بات کی عکاسی کرتی ہے کہ ہندوستانی کمپنیاں اب امریکی بازار میں اپنی موجودگی کو تیزی سے وسعت دینا چاہتی ہیں۔ ڈاکٹر آہوجا کے مطابق اڈانی انٹرپرائزز کی 10 ارب ڈالر کی مجوزہ سرمایہ کاری حالیہ ان اعلانات سے مطابقت رکھتی ہے جن میں کہا گیا ہے کہ ہندوستانی کمپنیاں امریکہ کے مختلف شعبوں میں مجموعی طور پر 20.5 ارب ڈالر سے زیادہ کی سرمایہ کاری کرنے جا رہی ہیں۔انہوں نے مزید کہا کہ ہندوستانی کاروباری ادارے امریکہ کو اب صرف ایک تجارتی منڈی نہیں بلکہ ایک طویل مدتی اسٹریٹجک اور اقتصادی شراکت دار کے طور پر دیکھ رہے ہیں۔ ان کے مطابق اس طرح کی سرمایہ کاری سے روزگار کے نئے مواقع پیدا ہوں گے، بنیادی ڈھانچے کو تقویت ملے گی اور دونوں ممالک کی معیشتوں کو طویل مدت میں فائدہ پہنچے گا۔

یو ایس آئی ایس پی ایف کے سربراہ نے اس بات پر بھی زور دیا کہ امریکہ میں ہندوستانی سرمایہ کاری مسلسل بڑھ رہی ہے، خاص طور پر بنیادی ڈھانچے، مینوفیکچرنگ، قابل تجدید توانائی اور ٹیکنالوجی کے شعبوں میں نمایاں پیش رفت دیکھی جا رہی ہے۔گزشتہ ایک دہائی کے دوران ہندوستان اور امریکہ کے درمیان تجارت، دفاع، ٹیکنالوجی اور توانائی کے شعبوں میں تعاون میں نمایاں اضافہ ہوا ہے۔ ہندوستانی کمپنیاں امریکہ میں اپنی سرمایہ کاری کو مسلسل وسعت دے رہی ہیں، جس سے دونوں ممالک کے درمیان کاروباری تعلقات اور روزگار کے مواقع مزید مستحکم ہو رہے ہیں۔یو ایس آئی ایس پی ایف نے امید ظاہر کی کہ اڈانی معاملے کے حل سے سرمایہ کاروں کے اعتماد میں اضافہ ہوگا اور ہند-امریکہ اقتصادی تعلقات کو مزید تقویت ملے گی۔

بھارت ایکسپریس اردو