بنگلور: کرناٹک حکومت نے ماہِ رمضان کے پیش نظر ریاست میں اردو میڈیم اسکولوں کے اوقات میں عارضی تبدیلی کا اعلان کیا ہے، جس کے بعد ریاست کی سیاست میں ایک نئی بحث شروع ہو گئی ہے۔ حکم کے مطابق رمضان کے دوران اردو میڈیم جونیئر پرائمری اور سیکنڈری پرائمری اسکولوں کا وقت صبح 8 بجے سے دوپہر 12:45 منٹ تک مقرر کیا گیا ہے۔ یہ ہدایت اردو اور دیگر اقلیتی زبانوں کے اسکولوں کے ڈائریکٹوریٹ کی جانب سے جاری کی گئی ہے، جس میں کہا گیا ہے کہ یہ تبدیلی ایک ماہ کے لیے نافذ رہے گی۔ حکومت کے مطابق اس فیصلے کا مقصد رمضان کے دوران روزہ رکھنے والے طلبہ، اساتذہ اور اسکول اسٹاف کو سہولت فراہم کرنا ہے تاکہ وہ مذہبی فرائض بہتر طور پر ادا کر سکیں۔
حکومتی فیصلے کے اعلان کے فوراً بعد سیاسی ردعمل بھی سامنے آ گیا ہے۔ بھارتیہ جنتا پارٹی نے کانگریس حکومت پر ووٹ بینک کی سیاست کرنے کا الزام عائد کیا ہے۔ بی جے پی کے قومی ترجمان شہزاد پوناوالا نے کہا کہ کرناٹک میں رمضان کے دوران اسکولوں کے اوقات میں نرمی دی جا رہی ہے، لیکن کیا حکومت نے کبھی کسی ہندو تہوار کے موقع پر ایسی سہولت فراہم کی ہے۔
شہزاد پوناوالا نے سوال اٹھایا کہ اگر رمضان میں اساتذہ اور عملے کو جلدی چھٹی دی جا سکتی ہے تو کیا نوراتری یا دیگر ہندو تہواروں کے دوران بھی ایسا ہی کیا جائے گا۔ انہوں نے الزام لگایا کہ کانگریس ہمیشہ اپنے ووٹ بینک کو ترجیح دیتی ہے اور اس کے پاس آئینی اقدار کے مطابق غیر جانبدار اور مساوی طرز حکمرانی کا وژن موجود نہیں ہے۔ بی جے پی ترجمان کا کہنا تھا کہ کرناٹک میں اس طرح کے فیصلے بار بار دیکھنے میں آتے ہیں، جو سماج میں تفریق پیدا کرنے کا سبب بنتے ہیں۔ انہوں نے کہا کہ حکومت کو تمام مذاہب کے ساتھ یکساں رویہ اختیار کرنا چاہیے۔
#WATCH | Karnataka Education Department revises school timings of Urdu schools in view of Ramzan, BJP National Spokesperson Shehzad Poonawalla says,” Now, we are seeing that schools in Karnataka will have different timings during Ramzan. But have you (Karnataka govt) made any… pic.twitter.com/PkWhzaWzBO
— ANI (@ANI) February 2, 2026
کرناٹک حکومت کے جاری کردہ حکم کے مطابق یہ نیا وقت تمام سرکاری، امدادی اور غیر امدادی اردو میڈیم جونیئر، سینئر اور ہائی اسکولوں پر نافذ ہوگا۔ یہ تبدیلی رمضان کے آغاز سے لے کر 20 مارچ 2026 تک نافذ رہے گی۔ واضح رہے کہ ریاست کے اردو میڈیم اسکولوں میں بڑی تعداد میں مسلم طلبہ زیر تعلیم ہیں۔ رمضان کے دوران مسلمان روزہ رکھتے ہیں، جس کی وجہ سے حکومت نے یہ فیصلہ طلبہ اور تعلیمی عملے کی سہولت کے لیے کیا ہے۔
بھارت ایکسپریس اردو-
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
