کولکاتا/نئی دہلی: مرکزی وزیرداخلہ امت شاہ ان دنوں مغربی بنگال کے دورے پر ہیں، جہاں وہ مسلسل ممتا بنرجی حکومت کو نشانہ بنا رہے ہیں۔ تازہ بیان میں انہوں نے کہا کہ ریاست میں ’ماں، مٹی اور مانوش‘ تینوں غیر محفوظ ہیں۔
انتخابات میں بی جے پی حکومت ہمارا ہدف
مغربی بنگال کے تین روزہ دورے کے دوران امت شاہ نے 2026 کے اسمبلی انتخابات سے متعلق بی جے پی کے ہدف کو واضح کرتے ہوئے پارٹی کارکنوں سے کہا کہ 2026 کے اسمبلی انتخابات میں مغربی بنگال میں بی جے پی کی حکومت بنانا ہمارا مقصد ہے۔ انہوں نے ممتا بنرجی حکومت پر حملہ کرتے ہوئے کہا کہ اس دور حکومت میں ریاست کے عوام خود کو غیر محفوظ محسوس کر رہے ہیں۔
بدعنوانی اور تشدد کی سیاست پر تنقید
امت شاہ نے کہا کہ بنگال میں ٹی ایم سی کی بدعنوانی، تشدد کی سیاست اور بدانتظامی کے خلاف عوامی غصہ اقتدار کی تبدیلی کا سب سے بڑا اشارہ ہے۔ انہوں نے الزام لگایا کہ درانداز مغربی بنگال کی معیشت، سلامتی اور ثقافت پر بوجھ بن چکے ہیں اور بی جے پی کی حکومت بنتے ہی انہیں چُن چُن کر باہر نکالا جائے گا۔
مرکزی وزیر داخلہ نے کہا کہ کارکنوں کا گھر گھر رابطہ ہی بنگال میں بی جے پی کی بھاری جیت کی بنیاد بنے گا۔ انہوں نے کہا کہ 2016 سے 2025 کے درمیان بنگال میں بی جے پی کے 300 سے زائد کارکنوں نے قربانیاں دی ہیں اور اب ان قربانیوں کو نتیجے تک پہنچانے کا وقت آ گیا ہے۔ امت شاہ نے دعویٰ کیا کہ ممتا بنرجی چاہے بی جے پی کارکنوں پر کتنا ہی دباؤ ڈالیں، بنگال میں ان کا سیاسی وجود ختم ہونے والا ہے۔ بی جے پی کی حکومت بننے کے بعد آنے والے 25 برسوں تک مرکز میں پارٹی کو کوئی ہلا نہیں سکے گا۔
’سونار بنگلا‘ بنانے کا عزم
انہوں نے کہا کہ پہلے کمیونسٹ اور پھر ٹی ایم سی حکومتوں نے بنگال کو پیچھے دھکیل دیا، جبکہ بی جے پی کا مقصد ’سونار بنگلا‘ (سنہرا بنگال) بنانا ہے۔ امت شاہ نے زور دیتے ہوئے کہا کہ مغربی بنگال میں دراندازی پورے ملک کی سلامتی کے لیے سنگین چیلنج ہے، جسے ٹی ایم سی نے منمانی سیاست کے تحت نظرانداز کیا۔ دراندازی روکنا بی جے پی کی سب سے بڑی ترجیح ہے۔ انہوں نے یہ بھی کہا کہ بھرتیوں سے لے کر فلاحی اسکیموں تک، ٹی ایم سی کی بدعنوانی کے خلاف غریبوں اور نوجوانوں میں شدید ناراضگی پائی جاتی ہے۔
کارکنوں کو ہدایات
اس کے ساتھ ہی بدھ کے روز امت شاہ نے بی جے پی کی مغربی بنگال یونٹ کے رہنماؤں کو ہدایت دی کہ وہ آئندہ سال ہونے والے اہم اسمبلی انتخابات کے لیے کولکاتا اور اس کے آس پاس کے چار تنظیمی اضلاع میں آنے والی 28 اسمبلی نشستوں پر خصوصی توجہ مرکوز کریں۔
تین روزہ دورہ
اپنے تین روزہ دورے کے آخری دن بدھ کو پارٹی رہنماؤں کے ساتھ ہوئی میٹنگ میں یہ ہدایات جاری کی گئیں۔ میٹنگ میں بی جے پی کی ریاستی قیادت کے علاوہ چاروں اضلاع کے زمینی سطح کے تنظیمی لیڈروں کو بھی مدعو کیا گیا تھا۔ کولکاتا (جنوبی) اور کولکاتا (شمالی)، جنوبی 24 پرگنہ میں جادوپور اور شمالی 24 پرگنہ میں دمدم یہ چار تنظیمی اضلاع ہیں، جو اتفاقاً چار لوک سبھا حلقوں سے بھی مطابقت رکھتے ہیں۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
