India-US Trade Talks: امریکہ ساتھ تجارتی مذاکرات اہم مرحلے میں داخل، ہندوستان نے زرعی مصنوعات پر رعایت کے حوالے سے اپنا رکھا ہے سخت موقف

واشنگٹن میں امریکہ کے ساتھ مذاکرات اہم مرحلے میں داخل ہو چکے ہیں اور ہندوستان نے زراعت سے متعلق مسائل پر اپنا موقف سخت کر لیا ہے۔ ایک اہلکار نے یہ بھی کہا کہ محکمہ تجارت میں خصوصی سکریٹری راجیش اگروال کی سربراہی میں ہندوستانی ٹیم کے قیام میں مزید توسیع کی توقع ہے۔ یہ ٹیم امریکہ کے ساتھ ایک عبوری تجارتی معاہدے پر بات چیت کے لیے واشنگٹن میں ہے۔

دونوں فریق 26 فیصد باہمی ٹیرف کے مکمل نفاذ کے لیے 9 جولائی کی آخری تاریخ سے پہلے ایک معاہدہ کرنے کے لیے بات چیت کر رہے ہیں۔ اہلکار نے مزید کہا کہ ’’اگر یہ تجارتی مذاکرات ناکام ہو جاتے ہیں، تو 26 فیصد ٹیرف دوبارہ نافذ ہو جائیں گے۔‘‘ ایسے میں ہندوستانی حکام کے قیام میں پہلے ہی 30 جون تک تین دن کی توسیع کر دی گئی ہے۔ ابتدائی طور پر 26 جون کو مذاکرات شروع ہونے کے بعد وفد کو صرف دو دن قیام کرنا تھا۔

امریکہ زراعت اور ڈیری کے شعبوں میں چاہتا ہے ڈیوٹی میں رعایت

واضح رہے کہ 2 اپریل کو امریکہ نے ہندوستانی اشیاء پر اضافی 26 فیصد اضافی ٹیرف عائد کیا، لیکن اسے 90 دنوں کے لیے معطل کر دیا۔ تاہم امریکہ کی طرف سے عائد کردہ 10 فیصد بیس لائن ٹیرف بدستور برقرار ہے۔ ہندوستان اضافی 26 فیصد ٹیرف سے مکمل استثنیٰ مانگ رہا ہے۔ وہیں امریکہ زراعت اور ڈیری دونوں شعبوں میں ڈیوٹی میں رعایت کا مطالبہ کر رہا ہے، لیکن ہندوستان کے لیے ان مطالبات کو ماننا مشکل ہے، کیوں کہ ان مطالبات کو ماننے سے ہندوستانی کسانوں کو مسائل پیش آئیں گے۔ اس لیے یہ شعبے سیاسی طور پر بہت حساس ہیں۔

یہی وجہ ہے کہ ہندوستان نے اب تک ملک کے کسی بھی آزاد تجارتی معاہدوں میں اپنے کسی تجارتی شراکت دار کے لیے ڈیری سیکٹر نہیں کھولے ہیں۔ امریکہ بعض صنعتی سامان، آٹوموبائلز پر ڈیوٹی رعایت چاہتا ہے – خاص طور پر الیکٹرک گاڑیاں، شراب، پیٹرو کیمیکل مصنوعات، ڈیری، اور زرعی اشیاء جیسے سیب، درختوں کے گری دار میوے اور جینیاتی طور پر تبدیل شدہ فصلوں پر۔ وہیں ہندوستان مجوزہ تجارتی معاہدے میں ٹیکسٹائل، جواہرات اور زیورات، چمڑے کے سامان، گارمنٹس، پلاسٹک، کیمیکل، جھینگا، تیل کے بیج، انگور اور کیلے جیسے محنت کش شعبوں کے لیے ڈیوٹی میں رعایت کا خواہاں ہے۔ اس معاہدے کا مقصد دو طرفہ تجارت کو موجودہ 191 بلین ڈالر سے 2030 تک 500 بلین ڈالر تک بڑھانا ہے۔

بھارت ایکسپریس اردو