وزیر خارجہ ایس جے شنکر۔ (فائل فوٹو)
وزیر خارجہ ایس جے شنکر نے پہلی بار کینیڈا کی نئی وزیر خارجہ انیتا آنند سے فون پر بات کی ہے۔ اس دوران دونوں رہنماؤں نے ہندوستان اور کینیڈا کے درمیان تعلقات کو بہتر بنانے پر تبادلۂ خیال کیا۔ انیتا آنند نے اتوار کو سوشل میڈیا پلیٹ فارم ’ایکس‘ پر اس کی خبر دیتے ہوئے ہندوستان اور کینیڈا کے تعلقات پر مفید بات چیت کے لیے وزیر خارجہ ایس جے شنکر کا شکریہ ادا کیا۔
سوشل میڈیا پر شیئر کی جانکاری
انیتا آنند نے ’ایکس‘ پر لکھا ’’کینیڈا اور ہندوستان کے تعلقات کو مضبوط بنانے، اقتصادی تعاون کو بڑھانے اور ہماری مشترکہ ترجیحات کو آگے بڑھانے کے بارے میں آج کی مفید بات چیت کے لیے وزیر ڈاکٹر جے شنکر کا شکریہ۔ میں مستقبل میں بھی مل کر کام کرنے کے لیے پر امید ہوں۔‘‘ واضح رہے کہ کینیڈا کے نئے وزیر اعظم مارک کارنی ہندوستان کے ساتھ اقتصادی تعاون بڑھانے کی خواہش رکھتے ہیں۔
اس کے فوراً بعد وزیر خارجہ ایس جے شنکر نے بھی اپنے آفیشل ’ایکس‘ اکاؤنٹ پر انیتا آنند کے ساتھ بات چیت کی تصدیق کی۔ انھوں نے کہا کہ اس بات چیت میں ہندوستان اور کینیڈا کے تعلقات کے امکانات پر تبادلۂ خیال کیا گیا۔ انھوں نے لکھا ’’کینیڈا کی وزیر خارجہ انیتا آنند کے ساتھ بات چیت قابل ستائش تھی۔ ہم نے ہندوستان-کینیڈا تعلقات کے امکانات پر تبادلۂ خیال کیا۔ میں ان کی کامیاب مدت کے لیے نیک خواہشات کا اظہار کرتا ہوں۔‘‘
Appreciate the telecon with FM @AnitaAnandMP of Canada.
Discussed the prospects of India-Canada ties.
Wished her a very successful tenure.
🇮🇳 🇨🇦
— Dr. S. Jaishankar (@DrSJaishankar) May 25, 2025
ہند نژاد ہیں کینیڈا کی وزیر خارجہ انیتا آنند
58 سالہ ہند نژاد ایم پی انیتا آنند کو اس ماہ کے شروع میں کینیڈا کا نیا وزیر خارجہ مقرر کیا گیا۔ یہ تقرری ایسے وقت ہوئی جب وزیر اعظم مارک کارنی نے کابینہ میں ردوبدل کا اعلان کیا۔ یہ ردوبدل پارلیمانی انتخابات میں لبرل پارٹی کی جیت کے تقریباً دو ہفتے بعد کیا گیا ہے۔ 14 مئی کو وزیر خارجہ ایس جے شنکر نے انیتا آنند کو کینیڈا کا وزیر خارجہ بننے پر مبارکباد دی تھی۔ الیکشن سے پہلے انیتا آنند کینیڈا کی وزیر برائے اختراعات، سائنس اور صنعت تھیں۔ اس سے پہلے وہ وزیر دفاع سمیت کئی اہم ذمہ داریاں بھی نبھا چکی ہیں۔
وہیں وزیر اعظم مودی نے جسٹن ٹروڈو کے استعفیٰ کے بعد مارک کارنی کو کینیڈا کا وزیر اعظم منتخب ہونے پر مبارکباد دی۔ اپنے پیغام میں وزیر اعظم مودی نے ہندوستان اور کینیڈا کے لوگوں کے درمیان مضبوط تعلقات کو اجاگر کیا اور کہا کہ وہ دونوں ممالک کے لیے ’’مزید مواقع کھولنے‘‘ کے منتظر ہیں۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
