لاہور: پاکستان نے تیسرے ایک روزہ بین الاقوامی میچ میں آسٹریلیا کو 4 وکٹوں سے شکست دے کر تین میچوں کی سیریز 2-1 سے اپنے نام کر لی۔ قذافی اسٹیڈیم میں کھیلے گئے اس مقابلے میں آسٹریلیائی بلے باز پاکستانی گیند بازوں کے سامنے بے بس دکھائی دیے اور پوری ٹیم صرف 157 رنز پر ڈھیر ہو گئی۔ پاکستان نے 158 رنز کا ہدف 41.5 اوورز میں 6 وکٹوں کے نقصان پر حاصل کر لیا۔
پاکستان کی محتاط بیٹنگ کا آغاز
ہدف کے تعاقب میں پاکستان کی شروعات زیادہ اچھی نہ رہی۔ صاحبزادہ فرحان صرف 6 رنز بنا کر نیتھن ایلس کا شکار بن گئے۔ معاذ صداقت اچھی شروعات کو بڑی اننگز میں تبدیل نہ کر سکے اور 26 گیندوں پر 5 چوکوں کی مدد سے 27 رنز بنا کر آؤٹ ہوئے۔ بابر اعظم نے ذمہ دارانہ بیٹنگ کرتے ہوئے 84 گیندوں پر 40 رنز اسکور کیے اور ایک اینڈ کو سنبھالے رکھا۔ غازی غوری صرف 8 رنز بنا کر پویلین لوٹ گئے جبکہ سلمان آغا بھی 15 رنز بنا کر آؤٹ ہو گئے۔
شاداب اور عبدالصمد کی فیصلہ کن شراکت
مشکل صورتحال میں عبدالصمد اور شاداب خان نے شاندار بیٹنگ کا مظاہرہ کرتے ہوئے ساتویں وکٹ کے لیے ناقابلِ شکست 49 رنز کی شراکت قائم کی اور ٹیم کو فتح سے ہمکنار کیا۔ شاداب خان 42 گیندوں پر 29 رنز بنا کر ناٹ آؤٹ رہے جبکہ عبدالصمد 18 رنز کے ساتھ ناقابلِ شکست واپس لوٹے۔ آسٹریلیا کی جانب سے میتھیو کوہنیمن سب سے کامیاب گیند باز رہے جنہوں نے 3 وکٹیں حاصل کیے۔ نیتھن ایلس اور میتھیو شارٹ نے ایک، ایک کھلاڑی کو آؤٹ کیا۔
آسٹریلیا کی بیٹنگ لائن ناکام
ٹاس جیت کر پہلے بیٹنگ کرنے والی آسٹریلیائی ٹیم کا آغاز انتہائی مایوس کن رہا۔ میتھیو شارٹ بغیر کوئی رن بنائے آؤٹ ہو گئے جبکہ مارنس لبوشین 19 رنز بنا کر پویلین لوٹ گئے۔ الیکس کیری 19 رنز کے انفرادی اسکور پر حارث رؤف کی گیند پر بولڈ ہو گئے۔ کیمرون گرین صرف 7 رنز بنا سکے جبکہ میٹ رینشا 4 اور کوپر کونولی 3 رنز بنا کر آؤٹ ہو گئے۔
جوش انگلس کی مزاحمتی اننگز
آسٹریلیا کی جانب سے جوش انگلس نے سب سے زیادہ 65 رنز اسکور کیے۔ انہوں نے 71 گیندوں کا سامنا کرتے ہوئے 8 چوکے اور ایک چھکا لگایا، لیکن دوسرے سرے سے انہیں کسی بھی بلے باز کا اچھا ساتھ نہ مل سکا۔
پاکستانی گیند بازوں کا شاندار مظاہرہ
پاکستانی کپتان شاہین شاہ آفریدی نے بہترین گیند بازی کرتے ہوئے 30 رنز دے کر 3 وکٹیں حاصل کیے۔ ابرار احمد اور شاداب خان نے دو، دو کھلاڑیوں کو آؤٹ کیا اور آسٹریلیائی بیٹنگ لائن کو بڑے اسکور تک پہنچنے سے روک دیا۔ اس فتح کے ساتھ پاکستان نے سیریز 2-1 سے جیت کر شاندار انداز میں ٹرافی اپنے نام کر لی۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
