بنگلورو: انڈین پریمیئر لیگ 2026 کے ایک دلچسپ مقابلے میں دہلی کیپٹلز نے شاندار کارکردگی کا مظاہرہ کرتے ہوئے رائل چیلنجرس بنگلورو کو 6 وکٹوں سے شکست دے دی۔ ایم چناسوامی اسٹیڈیم میں کھیلے گئے اس میچ میں کے ایل راہل اور ٹرسٹن اسٹبز کی نصف سنچریوں کے بعد ڈیوڈ ملر کی جارحانہ بیٹنگ نے ٹیم کو سنسنی خیز جیت دلائی۔ اس فتح کے ساتھ دہلی کیپیٹلز پوائنٹس ٹیبل میں چوتھے مقام پر پہنچ گئی ہے۔
آر سی بی کی مضبوط شروعات
پہلے بیٹنگ کرتے ہوئے رائل چیلنجرس بنگلورو نے مقررہ 20 اوورز میں 8 وکٹوں کے نقصان پر 175 رنز بنائے۔ ٹیم کو وراٹ کوہلی اور فل سالٹ کی اوپننگ جوڑی نے زبردست آغاز فراہم کیا۔ دونوں نے صرف 5.1 اوورز میں 52 رنز کی شراکت قائم کی۔ کوہلی 19 رنز بنا کر آؤٹ ہوئے، جبکہ فل سالٹ نے شاندار بیٹنگ کرتے ہوئے 38 گیندوں پر 63 رنز بنائے، جس میں 3 چھکے اور 4 چوکے شامل تھے۔ دیودت پڈیکل نے 18 رنز کا تعاون دیا، جبکہ ٹم ڈیوڈ (26 رنز)، جیتیش شرما (14 رنز) اور کرنال پانڈیا (12 رنز) نے بھی ٹیم کے اسکور میں اضافہ کیا۔ دہلی کی جانب سے اکشرپٹیل، کلدیپ یادو اور لنگی اینگیڈی نے 2-2 وکٹیں حاصل کیں، جبکہ مکیش کمار نے ایک کھلاڑی کو آؤٹ کیا۔
دہلی کی خراب شروعات
ہدف کے تعاقب میں دہلی کیپٹلز کی شروعات اچھی نہیں رہی۔ ٹیم نے ابتدائی اوورز میں ہی پتھم نسنکا (1)، کرن نائر (5) اور سمیر رضوی (2) کی وکٹیں گنوا دیں۔ یہ تینوں وکٹیں بھونیشور کمار کے حصے میں آئیں، جس سے دہلی دباؤ میں آ گئی۔ مشکل وقت میں کے ایل راہل اور ٹرسٹن اسٹبز نے ٹیم کو سنبھالا۔ دونوں نے چوتھی وکٹ کے لیے 44 گیندوں میں 69 رنز کی اہم شراکت قائم کی۔ راہل نے 34 گیندوں پر 57 رنز کی عمدہ اننگز کھیلی، جس میں 2 چھکے اور 6 چوکے شامل تھے۔ اس کے بعد کپتان اکشر پٹیل نے اسٹبز کا ساتھ دیا اور ٹیم کو ہدف کے قریب پہنچایا۔ تاہم اکشر پٹیل کو دورانِ میچ کریمپ کی شکایت ہوئی اور وہ 26 رنز بنا کر ریٹائرڈ ہرٹ ہو گئے۔
ڈیوڈ ملر کی دھماکہ خیز اننگ
میچ کا سب سے سنسنی خیز مرحلہ آخری اوور میں آیا، جب دہلی کو جیت کے لیے 15 رنز درکار تھے۔ اس موقع پر ڈیوڈ ملر نے جارحانہ انداز اپنایا اور روماریو شیفرڈ کے اوور میں مسلسل دو چھکے لگا کر میچ کا رخ بدل دیا۔ آخری گیند پر چوکا لگا کر ملر نے ٹیم کو شاندار جیت دلائی۔ انہوں نے صرف 10 گیندوں پر 22 رنز بنائے اور ناٹ آؤٹ رہے۔ ٹرسٹن اسٹبز نے بھی شاندار بیٹنگ کرتے ہوئے 47 گیندوں پر 60 رنز بنائے اور آخر تک ناٹ آؤٹ رہے۔ انہوں نے ملر کے ساتھ مل کر 24 گیندوں میں 45 رنز کی ناقابل شکست شراکت قائم کی، جس نے دہلی کو فتح تک پہنچایا۔ اس جیت کے بعد دہلی کیپٹلز نے 5 میں سے 3 میچ جیت لیے ہیں، جبکہ رائل چیلنجرس بنگلورو 6 میں سے 4 میچ جیت کر اب بھی پوائنٹس ٹیبل میں مضبوط پوزیشن پر موجود ہے۔ یہ مقابلہ آئی پی ایل 2026 کے سنسنی خیز میچوں میں سے ایک ثابت ہوا، جہاں آخری اوور تک نتیجہ غیر یقینی رہا اور شائقین کو بھرپور کرکٹ دیکھنے کو ملی۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
