کرون نائر کو چوٹ لگنے سے ٹیم انڈیا کو بڑا جھٹکا لگا ہے۔
ہندوستان اورانگلینڈ کے درمیان پانچ میچوں کی ٹسٹ سیریز کی شروعات 20 جون سے ہیڈنگلے، لیڈس میں ہونے جا رہی ہے۔ اس اہم مقابلے سے پہلے ہی ٹیم انڈیا کی تشویش میں اضافہ ہوگیا ہے۔ ایک ایسا بلے باز، جواس دورے پرشاندار فارم میں تھا اور جس نے پریکٹس میچوں میں 259 رن بناکر سب کی توجہ اپنی طرف مرکوز کی تھی، اب زخمی ہوگیا ہے۔ یہ کھلاڑی کوئی اور نہیں بلکہ کرون نائر ہیں، جنہیں 8 سال بعد ٹیم انڈیا میں واپسی کا موقع ملا تھا۔ رپورٹس کے مطابق، کرون نائر کی پسلیوں میں گیند لگنے سے چوٹ آئی ہے۔
کرون نائرہوئے زخمی، ٹیم انڈیا کے لئے بڑا جھٹکا
پہلے ٹسٹ سے پہلے کرون نائر نیٹس میں پریکٹس کررہے تھے۔ اس دوران پرسدھ کرشنا کی ایک گیند ان کی پسلی پر جاکر لگی۔ یہ گیند ان کے بلے سے مس ہوگئی اور سیدھا جاکر ان کی پسلیوں پرلگ گئی۔ اس سے انہیں چوٹ لگی ہے اور اب ان کی فراہمی سے متعلق خدشہ پیدا ہوگیا ہے کہ کیا وہ انگلینڈ کے خلاف پہلا ٹسٹ کھیل پائیں گے؟ فی الحال کرون نائر کی چوٹ پربی سی سی آئی کی طرف سے کوئی باضابطہ بیان نہیں آیا ہے اور نہ ہی یہ بتایا گیا ہے کہ وہ لیڈس ٹسٹ تک فٹ ہوپائیں گے یا نہیں۔ اگران کی چوٹ گہری ہوئی تو نہ صرف ان کے لئے بلکہ ٹیم کے لئے بھی بڑی پریشانی کی بات ہوسکتی ہے۔
کرون نائر نے سفید جرسی میں ہندوستانی ٹیم کے لئے گزشتہ ٹسٹ سال 2017 میں کھیلا تھا۔ اس کے بعد سے انہیں ٹیم میں کھیلنے کا موقع نہیں ملا تھا، لیکن اس بار انہیں ہندوستانی ٹیم کے انگلینڈ دورے کے لئے منتخب کیا گیا تھا۔ انہوں نے انگلینڈ کے خلاف دو پریکٹس میچوں کی تین اننگوں میں 259 رن بنائے تھے۔ یہی نہیں، وہ اس دورے پر اب تک ڈبل سنچری لگانے والے واحد ہندوستانی کھلاڑی بن چکے ہیں۔
کرون نائر کی جگہ پرکس کھلاڑی کو ملے گا موقع؟
کرون نائر کی فٹنس اگرٹھیک نہیں ہوتی ہے، تو ہندوستانی ٹیم کو ان کی جگہ کسی اور بلے باز کو پلیئنگ الیون میں شامل کرنا ہوگا۔ اس صورتحال میں ابھمنیو ایشورن کا نام سامنے آرہا ہے، جو لمبے وقت سے انڈیا اے ٹیم اور گھریلو کرکٹ میں مسلسل اچھی کارکردگی کرتے آئے ہیں۔ حالانکہ ہندوستانی ٹیم منیجمنٹ کو یہ فیصلہ ٹسٹ کی صبح یا ٹاس سے پہلے لینا ہوگا۔ کرون نائر جیسے اِن-فارم بلے باز کا چوٹ کی وجہ سے ٹیم سے باہر ہونا ٹیم کے مڈل آرڈر بیلنس کو متاثرکرسکتا ہے۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
